Read Konyak Naga WOITEI 17 Bible Online

WOITEI 17 - Konyak Naga bible

WOITEI 17

¹Israel bangnyuha nopu Sin wanwüng jeng tüohyange, Youngwanpawe ngaokeng phapu kih-e lak jang lak-e tai. Iman Rephidim me lakjing ling; hüpoi tüoken me kahtalan jingne yinglak yeng yenangpe ngoh.

²Tüokhei iman-e Mosa phei tee hüyange i, “Tomante yinglak yeng yahkei.” Mosawe imante jan-e i, “Hangne numan-e ü-phei teepu? Hangne numan-e Youngwanpate tok pu shi?”

³Hüpoi kahtalan yeonge yengle hüyange Mosate yelakpe ngao. Iman-e i, “Toman hüyange toman hayimlan hüyange toman-e tampu yinmoklan yengle-e litamlak ne hangne nange Egypt mepu toman yah ngai ei?”

⁴Tüokhei Mosawe Youngwanpate üngwün, “Tüolan kahtalan phei taowe hang linglak? Iman-e üte longe shüplak jingne yayongne hei ngoh nangki.”

⁵Youngwanpawe Mosate jan i, “Nang phei Israel lwngmeilan ütam woiyah, hüyange kahtalan shaote taitüoh. Nang wongjoi hangheye nange Nile te heap, tüopa nang me jonyange taitüoh.

⁶Horeb me longnyu ja me nang sheshao me Tao yonglak. Longnyute heaptüoh, hüyange kahtalan-e yinglak ne tüopa mepu yeng ngaikülak.” Tüokhei Mosa-e Israel lwngmeilan sheshao me hüke ling.

⁷Iye tüopa nyoi te Masah hüyange Meribah she min, hangjingne Israel lan-e yemeipe ngao ngai hüyange Youngwanpa te tokpu phawe iman-e hüke tonge i, “Teman phei Youngwanpa-a ngohpu heiya yengohpu shi?”

⁸Tüophei me Amaleklan peiye Israel phei Rephidim me hok.

⁹Mosawe Joshua te i, “Ngainyih Amaleklan phei hokne tailak jingne kahta ütam leye ngaitüoh. Kahmüoh shedaopu nyoi me Kahwange üte jontüoh she ipu wongjoi jonyange tao yongyange ngohlak.”

¹⁰Tüokhei Mosawe Ite ngaokeng phapu kih-e Joshuawe ling hüyange Amaleklan phei hoklak jingne yayonge tai; hüyange Mosa, Aaron, hüyange Hur iman-a kahmüoh ütangte ong.

¹¹Hangshin me Mosawe I yak hong yange ngohlakei, Israel lan-e okpu nge, hüpoi aope lye I yak tailakei, hüwante Amalek lan-e okne wange ngoh.

¹²Hüpoi aope Mosa yak khaiye tayapeih, Aaron hei Hur niye I shotlak jingne long ja yahpei, I phin me imni yong, hüyange I yak japong me jonyange wanghe mannyip mannyip noyange yonge tan.

¹³Hükih-e linge Joshua-e Amaleklan lanshe naone tam.

¹⁴Hüyange Youngwanpawe Mosate i, “Tüopa teih tüowe ngohlak jingne, tüopa okpu ngepu jeng laitep me nyan-e angtüoh. Joshuate itüoh, hüke Taowe Amaleklan-a lanshe mahne tamlak.”

¹⁵Mosawe wümjong ja ling hüyange tüopa te “Youngwanpa-a Ü-khüwkam” she nyik.

¹⁶lye i, “Youngwanpa khüwkam yak-e nowe intüoh! Amaleklan phei Youngwanpawe jin ja phei me jin ja yelakpe hoklak.”