Read Konyak Naga WOITEI 18 Bible Online

WOITEI 18 - Konyak Naga bible

WOITEI 18

¹Jethro, Midian ngengpa, hüyange Mosa üküowe, hangke Youngwanpawe Egypt mepu Israellan woiye pei, hüyange Mosa hei Israel kahtalan jingne hangke Kahwange toi ling khongkümpu jai.

²Mosawe yoi shekonyu Zipporah shon teiyang phei me, Iküo Jethro-e yha,

³hüyange yha ha ni yah. Naoshe jate Gershom she min, hangjingne Mosawe i, “Heangching kahtok me tao yinpa ja ne ngohyangki.”

⁴Hüyange japate Eliezer she min, hangjingne Iye i, “Üpalan Kahwang-a üte jampa; Iye Pharaoh yanglow mepu tao yintam.”

⁵Mosa sheko hüyange Iha ni phei üjao kahtang ümeken me Mosa-e lakjing lingyange ngoh tüopa wanwüng jeng te Jethro pei.

⁶Iye Mosate ngaolan shon-e i, “Tao nangküo Jethro nenok sheko hüyange Iha ni phei, nang tangte peiküki.”

⁷Tüokhei Mosa Iküo pongte yuwe Ite wangshüm hüowe khuhtawe khüm, hüyange Ite omhüp. Hüyange iman-e meiye ngohyangpu heiya yengohpu teingao, tüophei me Mosa jing nyenok ümongte ong.

⁸Hüyange Israellan yin-e tamlak jingne Youngwanpawe ahngpa hüyange Egyptlante lingyangpu üshei, Mosawe Jethro te i. Hüyange lye üne-o lamme imante ngoipu shaoshi khongkümpu, hüyange Youngwanpawe iman hangke yin-e tam tüolan jeng Mosawe Iküo te i.

⁹Egyptlan yak mepu Israel yintamlak jingne Youngwanpawe lingpu, meipulam khongkümpu jai-e Jethro mongmei yangki.

¹⁰Jethrowe i, “Youngwanpate minyongtüoh, aohe-e Egyptlan hüyange Ahngpa mepu numan yintam!

¹¹Sha-a taowe shing, ülao kahwanglan üshei phei Youngwanpa sheyongpupa ngoh nang; hangjingne, aope iman-e Israellan te yemeipe ling, lye Egyptlan yak mepu kahtalan yinne tam.”

¹²Hüyange Jethro, Mosa Iküo-e, jak dolak hüyange Kahwangte toidolak yahpei; hüyange Kahwang ompu phei Mosa Iküo phei hahyinglak jingne, Israel woipalan khongkümpu phei Aaron pei.

¹³Üne nyih Mosa-e kahtalan ngaophünlak jingne shot; hüyange kahtalan-e shom mepu ün ngoiye Mosa neikon-e yonge nan yengai tampe ngoh.

¹⁴Aope shemin lamphe Mosa shahawe linglak ne ngaipu Jethrowe nge, lye tong; “Nange kahtalan jingne ling hümpu tüolan lili-a hangkihpu shi? Shom mepu ün ngoiye nang phei ngaolak jingne kahta khongkümpu yongne tam-e, nang shahawe tüolan khongkümpu hangne linghümpu!”

¹⁵Mosawe Iküote jan i, “Taowe tüopa lingne ngainang, hangjingne kahtalan-e Kahwangpawe mongpu shinghupu jingne ü-tangte peinang.

¹⁶Aope kahta nipa me moppu ngohlakei, iman ü-tangte peinang, hüyange iman pa me aohipa shuwe ngohnang, taowe hüke ngao phünne tamnang, hüyange taowe imante Kahwang ngaokhüm hüyange lye phünne tampu shingne tamnang.”

¹⁷Mosa Iküo-e Ite i, “Nange hanghe lingnang hatüo-a meipu yeje.

¹⁸Ütingme nang hüyange nang phei ngohpu tüolan kahtalan-a nyai-e shonlak. Hangjingne hatüo toishaolan nang shahawe linglaka jamloi nang.

¹⁹Sha-a taowe nangte shemeipupa kon ütam yah phaning, hüyange nang phei Kahwang omme ngohlak. Kahwang sheshao me kahtalan woi peiye tamlaka hüyange iman moppu Ite peitamlaka nang jingne tingpu toishao ngohnang.

²⁰Nange imante Kahwangpa ngaokhüm nyüowe tamlak yang hüyange iman hangke nyoilak hüyange iman-e hanghe linglak meimei-e nyüoweleiye tamlak yang.

²¹Hüpoi tüo tokte, nange hünghao ngohpu kahta ütam lelak yang hüyange kahtalan woipalan ne menglak jingne iman letamlak yang: haja tang me, gho ja tangme, denga tangme, hüyange pen tangme woipa ne menge tamlak yang. Iman-a Kahwang te nyampu hüyange kahtalan-e monghahlak ne ngoh okpu, hünghao lojai te yekenpu kahtalanne menglak yang.

²²Hüyange kahtalan tangme hipak lep iye iman-e ngaophünne tamtüoh; hüyange ngaonyu khongkümpuwa iman-e nang tangte yah-e peilak, hüpoi üjoi ünao ngao lili-a iman nying nyingke phünlak. Hükih-e iman-e nang toishao te jampu kaiye nangjing ne hangki yih shelan she ngohlak.

²³“Hükih-e nange lingma-a hüyange hatüowa Kahwange mongpu ne mengma-a nang teshin-e tonyaipu yenanglak, hüyange ngao phün shophei me kahtalan-a chingmei me yoi yoi nokte yekümlak.”

²⁴Tüokhei Mosawe Iküo-e ipu ngao me yah hüyange Iye ipu khongkümpu ling.

²⁵Hüyange Mosawe Israel üshei mepu hünghao pheipu kahta le; hüyange haja tangme, gho ja tangme, denga tangme, hüyange penlan tang me woipa ne menge tam.

²⁶Hüyange hipak lep iye iman-e kahtalan ngaophün, ye-okpu ngaonyu iman-e Mosa tangte yah pei, hüpoi ngao üjoi ünao khongkümpu iman-e iman nying nyingke phün.

²⁷Tüophei me Mosawe yoi küo taine tam; hüyange Jethro yoi lamnyu yoi kahtok te leihye.