Read Konyak Naga WOITEI 19 Bible Online

WOITEI 19 - Konyak Naga bible

WOITEI 19

¹Israel hayimlan Egypt kahtok mepu ngaiyang phei me, leat lüm shepupa me, tüopa nyih me iman Sinai wanwüng jengte pei.

²Hüyange aope iman-e Rephidim mepu yayonge Sinai wanwüng jengte pei, iman-e wanwüng jeng me lakjing ling, hüyange tüoken kahtang yashong me Israel-e lakjing ling.

³Hüyange Kahwang phei hüolak jingne kahtang te Mosa ong. Hüyange Youngwanpawe kahtang mepu Ite nyik hüyange Jacob huhayim Israel lante ngaolak jingne Ite i:

⁴“Tao, Youngwanpawe Egyptlan te hanghe ling hüyange yingphang awlanne yoi yangteng me üha hangke yahpei, hüke Taowe numan tüoken ngoiye yahpeipu numan-e ngeteki.

⁵Tüokhei sha-a, numan-e ü-ngaowüng jailakei she ima-a, hüyange Ü-jiengjeppu jonlakei she ima-a, hüma-a jatlan üshei tangme numan üjingne ü-moth ülaopa ne menglak: hangjingne kahtok khongkümpuwa üjing ngohnang:

⁶Hüpoi numan-a üjingne ngengli ahngching hüyange üjao jat. Tüolan ngao nange Israellan phei ngaolak yang.”

⁷Tüokhei Mosa leihye hüyange kahtalan yo mepu lwngmeilan nyik, hüyange Youngwanpawe Ite ipu ngao khongkümpu iman sheshao me ngaowe tam.

⁸Hüyange kahtalan khongkümpuwe jamshe janne i, “Youngwanpawe ngaopu khongkümpu toman-e linglakei.” Hüyange Mosawe kahtalan ngaowa Youngwanpa sheshao me shingne tam.

⁹Hüyange Youngwanpawe Mosate i, “Leihuyah, Taowe nang phei ngaowante kahtalan-e jailak, hüyange üne-o nangte jinte üting laklak ne, Tao nang tangte jeilehpu wangphom me peilak.” Tüophei me Mosawe kahtalan-e ngaopu Youngwanpa te i.

¹⁰Hüyange Youngwanpawe Mosate i, “Kahtalan tangte taitüoh, hüyange tenyih hei ngainyih nyih ni mongme iman jaowe shawe angtüoh, hüyange iman inkheklan shao ne tamtüoh;

¹¹hüyange lümshepupa nyih jingne tümme tanyah: Tüopa nyih me kahta liliye ngepu oklak ne Tao Sinai kahtang me yulak.

¹²Hüyange kahtalan jingne nange kahtang neikonne yikeng lingtam tüoh, hüyange hatüo itüoh, ‘Numan-e kahtang te ye-onglak hüyange yikengte yeletlak jingne numan yoi nying nyingke kenting yah; aohipawe kahtangte ya letlakei li ne tamlak;

¹³Ite aowe-o yakke yeletpe longe shüppe yejema-a wenglah-e keppe toilak. Tüopa-a kahta hei yinmok moini te jonlak, hüyange li ne tamlak.’ Hüpoi aope laolünge nyawong wünglakei, kahtalan kahtangte onglak.”

¹⁴Tüokhei Mosa kahtang mepu kahtalan tangte yuwe yoppe khümlak jingne tümtüoh she kahtalan te ngaowe tam. Iman-e yoi inkheklan shaowetüm.

¹⁵Hüyange Mosawe kahtalante i, “Lümshepu nyih jingne tümme tanyah; hüyange sheko shongte owe tahwen.”

¹⁶Lüm shepupa nyih napning me kahtang me wang khong wangkhah hüyange wanglüppu, hüyange jeilehpu wangphom, hüyange nyawong wüngpu yeonge yonge ngoh yangki; hüyange lakjing nyoi me ngohpu kahta üshei nyamme nin.

¹⁷Kahwang phei hüolak jingne Mosawe kahtalan lakjing nyoi mepu woiye ngai; hüyange iman kahtang yashong me yong.

¹⁸Hüyange Sinai kahtang khongkümpu vünkhuh-e maa, hangjingne tüopa tangme Youngwanpa vün me yu; hüyange tüopa vünkhuh-a vünloong vünkhuh kih-e ngai, hüyange kahtang khongkümpu yeonge mokh po.

¹⁹Hüyange nyawong wüng shewün shewün she ngai. Mosawe ngao hüyange Kahwange wangkhong pume Ite jan.

²⁰Hüyange Youngwanpa Sinai kahtang me, shedaopupa kahtang ngoiye yu; hüyange Youngwanpawe kahtang üshang ye me Mosate nyik, hüyange Mosa ong.

²¹Hüyange Youngwanpawe Mosate i, “Yutüoh hüyange üte leine ongwante yikeng tahkai she kahtalante deingao itüoh; iman-e yikeng kaima-a, iman maapu lilak.

²²Ngengpalan aoyin ü-shongte peiyapeih iman nehoi iman nying nyingke jaowe shalak wongpong, hüke yeling yahma-a Taowe imante yak lelak.”

²³Mosawe Youngwanpate i, “Kahtalan-a Sinai kahtangte ongpu ye-ok külak, hangjingne nange tomante kahtanga üjao nyoi ne anglak hüyange tüopa neikonne yikeng janne tamlak jingne ngaokeng pha.”

²⁴Youngwanpawe jan-e i, “Yutüoh hüyange nang phei jam-e Aaron woi ongkei. Hüpoi ngengpalan hei kahta-lanpa-a ü-tangte peilak jingne she yikeng kaine yetamlak, kaima-a Taowe imante yak lelak.”

²⁵Tüokhei kahtalan tangte Mosa yu hüyange Youngwanpa hanghe i imante ngaowe tam.