Read Konyak Naga WOITEI 2 Bible Online

WOITEI 2 - Konyak Naga bible

WOITEI 2

¹Sha-a kahta ja Levi nokphong mepu ngai hüyange iman Levi jat sheko ja muh yah.

²Shekonyu püm yekengpe ngai hüyange netan moija pai; hüyange yhawe I-a wangngoiye naoshe ümei ja she nge, yhawe I lekeng lüm ngoiye lowe ang.

³Aope yhawe shaaji I lowe angpu ye-okpe ngai, ngeihyan phei apu küm ja yahpeiye, hüyange yeng ye-onglak jingne nyeiti hei wüalüng phei shit, hüyange yhawe naha-a tüome nowe peiye yengnah beewem yo me ang.

⁴Hüyange I hangke nangkülakei she leiye I nya-a üjai me yonge ngoh.

⁵Hüwante ahngnok naoyha yengyinte yeng yüone lai, hüwante yha jing shaoshan nyulan yengyin nahme kemme ngoh; mokhshe yhawe phümha yo me küm ja nge, tüopa yahlak jingne rhanyu shon.

⁶Hüyange ahngnok naoyhawe tüopa ep, hüyange netan naha nge; hüyange leihuyah, naha-a shap; hüyange yhawe Ite shüpshe, hüyange i, “Hatüowa Hebrew hayimlan yo me ja ngohnang.”

⁷Hüwante Inyawe ahngnok naoyhate i, “Nang jingne Hebrew sheko yo mepu naote paone ja, hüke yhawe naha-a nang jingne paolak, tao taiye nyik pha ning yao?”

⁸Ahngnok naoyhawe yha te i, “Taitüoh.” Tüokhei naoyha taiye nahapa ünyu muh nyik-e pei.

⁹Hüyange ahngnok naoyhawe yha te i, “Tüopa naha yah teitüoh, hüyange üjingne paokei: hüyange taowe nangte nang nanmee yahpha peih.” Tüokhei nyuyongnyuwe naha yah hüyange pao.

¹⁰Hüyange naha-a jong, hüyange yhawe I ahngnok naoyha tangte woipei, hüyange I yha üha ne meng. Hüyange yhawe I min Mosa she nyik, hüyange yhawe i, “Hangjingne taowe I yeng mepu shuwe ngai.”

¹¹Aope Mosa jongyapeih, nyih ja I yoi Hebrew kahtalan phei hüolak jingne ngaiye tai, hüyange imante hangke kange toi lingne tam tüopa lye nge, tüo shaha ne yeje, Egypt lan-e I pheipu Hebrew kahta ja te shet pu-o nge.

¹²Mosa-e jaye jayete lüpshüp-e lei, hüyange aope kahta ao-o yenang she lye nge, lye Egypt kahta-a toi hüyange I mang pheih yo me jüowe tüoh.

¹³Üne nyih aope I ngai tai, hüwante Hebrew kahta ni jamme tee-e ngoh yangki. Hüyange püohpupate lye i, “Hangne nange nang pheipu Hebrew pate shütte tampu?”

¹⁴Iye jan, “Aowe nang toman tangme üshangpa hüyange kahpa ne menge tam ei? Egyptlan toipu kih-e nange tao toihuwe teih nangkü a?” Hüwante Mosa nyam hüyange I nying nyingte i, “Taowe hanghe ling, kahta lanne shinge okteki.”

¹⁵Aope ahngpawe hanghe ngai tüopa jaiyapeih, lye Mosa toilak jingne yam. Hüpoi Mosa ahngpa sheshao mepu phette tai, hüyange Midian kahtok me ngoh. Nyihjapu hipak me aope yengnung ja ü-o me Mosa shotte ngoh;

¹⁶Midian ngengpa, nok naoyhalan nyit yeng-shaolak jingne hüyange Ipa jing nyee hei youn ükhong jingne aksheng me yenge maawe tamlak jingne pei.

¹⁷Hüpoi nyee yompalan ütam-e Jethro nok yhalalan jange tei. Hüwante imante jamlak jingne Mosa wen hüyange imanjing yinmoklan jingne imante yeng shaowe tam.

¹⁸Aope iman yoipa tangte leih ye, lye imante tong, “Numan tenyih-a hangne hüke teshinne shonge yepu?”

¹⁹Hüyange iman-e jan-e i, “Nyeeyom-palan yak mepu Egypt kahta jawe toman yintam,” hüyange “Üne-o lye toman jingne yeng shaowe tam, hüyange nyee ükhongte yeng shaitam.”

²⁰Hüyange lye yoi yhalalan te i, “Hüma-a I ümeken me ngoh nangki? Hangne numan-e kahta-a tüohpu? Taitüoh hüyange teman phei jamme nükhahlak jingne Ite nyik tüoh.”

²¹Tüokhei tüoken me nyoilak jingne Mosawe mong, hüyange Jethrowe Ite yoiha Zipporah nokne menge tam;

²²aowe Ite netan naha ja puh tam. Mosawe yoi nying nyingte i, “Tüopa kahtok me taowa chingtaipa ja nehei ngoh nang, tüokhei taowe Ite Gershom she nyiklak.”

²³Hipak nang jange ngoh yang phei me, Egypt ahngpa li; hüyangpoi Israel hayim rha yatuhshao me ngohne wong, hüyange iman-e üngwün, hüyange rha yatuh shao me iman-e üngwünpu Kahwang tangte ngoi.

²⁴Hüyange Kahwange iman-e üngwünpu jai, hüyange Abraham phei, Isaac phei, hüyange Jacob phei Kahwange yoi jiengjeppu teih tüo.

²⁵Hüyange Kahwange Israel hayimlan rha me ngohpu nge hüyange iman yatuhshao jingne teih tüo.