Read Konyak Naga WOITEI 21 Bible Online

WOITEI 21 - Konyak Naga bible

WOITEI 21

¹“Tüolan-a linglak ngaokhüm, kahtalan sheshao me nange phalak yang.

²Aope nange Hebrew rhaja shaklakei, lye wangpeng wok nang shao shanlak. Wangpeng nyit shepupa me lye ümee hango phane yetampe lantamlak.

³I shaha peipu ne mengma-a, I shaha tailak; hüpoi I nokne meng teiye peipu ne mengma-a, hüpa ma-a, shekonyu I phei yahyange tailak.

⁴I tepu nokpuwe I te shekonyu phawe ngohtampu ne mengma-a hüyange yhawe hala yhala nge-e ngohpune mengma-a, shekonyu hüyange yhahayimlan-a Itepu nokpu jingne menglak, hüyange I shaha tailak.

⁵Hüpoi rhapawe hango yeteihpe, ‘Taowe ü-nokpu, ü-sheko hüyange ü-hayimte kennangki, tao lantampu tüowe mintai she ima-a;’

⁶hüma-a I nokpupawe I-a Kahwang shongte woi peilak. Tüoken me I-a lye tashüp yejema-a taküp me nyenge yongne tamlak hüyange Ite vemeiye na shunge tamlak. Hüma-a I jin küm-e Itepu rha ne menglak.

⁷“Aope kahta jawe yoi yhala rhanyu ne menglak jingne yüolakei, yha-a netan rhapalan taine tampu kih-e yetaitamlak yang.

⁸Yha-a yoi shekonyu ne menghupu kahta ütamte yha yüoyange ngoh, hüpoi lye yha yelengma-a, hüma-a yha-a yoipa te muh yüowe yene tamlak yang; Yha nokpupawe kahheng lante yha yeyüo lak yang, hangjingne lye yhate yemeipe jon.

⁹Hüyange kahta jawe yoiha te yha sheko ne yah ne tamhuwe rhanyu ja shakpune mengma-a, lye yha te yoiha kih-e jonlak yang.

¹⁰Kahta jawe nishe sheko yahma-a, lye üwangne yahpu shekote yelakpe yakjüng me hah ying, hei inkheklan, hüyange yhawe üwangne ngohpu meitam khakshuwe phalak yang.

¹¹Hüyange tüolan toishaolan lye yhate yelingma-a lye yha-a hango ümee yeyahpe lantampu phawe teilak yang.”

¹²“Aowe kahta jate yak le hüyange I toi ne tam, üting me I-a li ne tamlak yang.

¹³Hüpoi hatüowa yeteih tüopu ütuh ja ne hei hüopu ne mengma-a, hüyange Kahwange I yak me li ne tampu ne mengma-a, hüwantepa-a I ümeken me lolakei tüopa nyoijing ja Taowe nangte le ne tamlak, tüoken me I tai ngoh lak.

¹⁴Hüpoi aope kahta ja mongshih ngaiyange hüyange shingjang shinge nginme ülao kahta ja toipu ne mengma-a, nange ü-wümjong mepu I-a yah-e li ne tamlak.

¹⁵“Aowe yoipa yejema-a yoinyute shütlakei, üting me I-a li ne tamlak yang.

¹⁶“Aowe kahta phoyange hüyange yüoyange ngohpu yejema-a Iphei muh ange ngoh-e kuh pholakeih, I-a li ne tamlak yang.

¹⁷“Aowe yoipa yejema-a yoinyu phoiwümlakei, I-a li ne tamlak yang.

¹⁸“Aope kahtalan teelakei hüyange shejawe japa te longe shüpma-a yejema-a yakke tüpma-a, hüyange I yeli yapoi leng me ngohlak ne ngaima-a,

¹⁹hüpoi tüophei me I nishe laowe yoi wongjoi yahyange kempu okma-a, aowe shüt I-a lantamlak; hüke nanmah yangpu jingne hei lye nan mee phalak, hüyange I meimei-e meine tamlak yang.

²⁰“Aope rha nokpu jawe yoi rhapa yejema-a rhanyu te shengshaohwe shütyange, hüyange I yak me rha lilakei, rha nokpu te shaoshi ne tamlak.

²¹Hüpoi rha nyih ja yejema-a nyih ni phei me meimahpu ne mengma-a; shaoshi phapu yengohlak; hangjingne ima-a rha-a I jing moth.

²²“Aope netanlan teengai, hüyange püm yekengpe ngohpu sheko te shütte showe nao mengpu ngailakei, hüpoi yhate ümeng hango yengaima-a; shekonyu netanpawe Ite yupu kih-e ütingme Ite tang yulak yang; hüyange kahpalan-e phünne tampu kih-e lye phalak wongpong.

²³Hüpoi shekonyu-o mayah yange ngohküma-a, hüwantepa-a üyin nanleiye üyin phalak yang.

²⁴Mük nanleiye mük, fa nanleiye fa, yak nanleiye yak, ya nanleiye ya,

²⁵jakke tampu nanleiye jakke tampu, üko nanleiye üko, shütte tampu nanleiye shütte tampu.

²⁶“Aope rha nokpu jawe yoi rhapa yejema-a rhanyu mükte shütlakei, hüyange hatüo menglakei, lye rhapa-a mük jingne hüke lanne tamlak yang.

²⁷Hüyange lye yoi rhapa yejema-a rhanyu fa khaitam-e shütpu ne mengma-a, I fa nanjingne I lantampu phalak yang.”

²⁸“Aope mahu üpong jawe netan yejema-a sheko ja te shuwe toilakei, mahu üponga longe shüppe toilak yang, hüyange I mei-a yehahlak yang; hüpoi mahu üpong nokpupa-a ümengne üjelak.

²⁹Hüpoi mahu üponge üshong wante-o shuwe wenpu ne mengma-a, hüyange hatüo nokpute shingne tamyang pheite lye hatüo küowe ye-angpu ne mengma-a, hüyange tüowe netan yejema-a sheko jate shu ne tampu ne mengma-a, mahu üponga longe shüppe toilak, hüyange nokpupa-o li ne tamlak.

³⁰Tüoyangpoi I üyin shaklak ne yupu ja ngohma-a, Ite hanghe yin yulakei, lye yoi üyin te shange phalak wongpong.

³¹Mahu üponge netan nahate jeyah sheko nahate jeyah shuma-a, tüopa ngaokhüm kih-e muh Ite jonlak.

³²Mahu üponge rhapa yejema-a rhanyu te shuwe toima-a, mahu nokpupawe rha nokpupate khüm ngin khüo delüm phalak yang, hüyange mahu üponga longe shüppe toilak.

³³“Aope kahta jawe kahsa eppe tüohlakei, yejema-a kahsa ja shaoyange hatüo yebüangpe ngohpute mahu yejema-a gado tüome yei ma-a,

³⁴kahsa nokpupawe mahpuwa shümlak, yinmok nokpu te lye ngin phalak wongpong, hüyange yinmok ümanga yoi jingne menglak.

³⁵“Kahta ütam jing mahu üponge eiha jing ja te shuyange toi ma-a, hüma-a üyin ngohpupa mahu üpong yüoyange hatüo ümee-a imnipa me tamme yahlak, hüyange lipu yinmok mei-o imniye tamme yahlakyang.

³⁶Hüpoi üshongpe mahu üponge shupu shinge ngoh yang pheite nokpuwe hatüo küowe ye-angpe ngohpu ne mengma-a, Iye ütingme mahu üpong nanleiye mahu üpong üyin ja phalak; hüyangpoi yinmok ümangpa-a Iye hahlak yang.”