Read Konyak Naga WOITEI 22 Bible Online

WOITEI 22 - Konyak Naga bible

WOITEI 22

¹“Kahta ütam-e mahu ja yejema-a nyee ja kuhma-a hüyange hatüo toima-a, yejema-a yüoküma-a, lye mahu üpong ja nanleiye mahu üpong nga, hüyange nyee ja nanleiye nyee peli shümme yelak yang; ütingme Iye shümpu phalak wongpong; I me hango yenangma-a, lye kuhyangpu jingne I rha ne yüolak.

²“Kuhpaja wangnyak me nok menge onge ngohwante phoma-a, hüyange I shütte toima-a, I iy jingne shüt pupa-a ümeng yejelak.

³Hüpoi wanghe ong pheime hükih-e ngaipu ne mengma-a, hüwantepa-a iy shaiyangpu jingne I ümengne menglak.

⁴Iye kuhpuwa üyin me ngoh-e tüopu ne mengma-a, mahu jeyah, gado jeyah, nyee ne jeyah, lye üphong ni phalak wongpong.

⁵“Aope kahta ütam-e I jing yinmok-e kah yejema-a wuwünglick kah hahne tamlakei, yejema-a yoi yinmok lanne teiye eiha kah hahne tamküma-a, lye yoi kah yejema-a wuwünglick kah shemeipupawe shümlak wongpong.

⁶“Aope kahta ütam-e Inok kah me vün ngaine tam-e hüyange hatüo phaote pah-e eiha nok kah te peiye ngaiye ngohpu tahphao hüyange tahlick hah kümlakei; aowe vün wok lye ütingme shümlak wongpong.

⁷“Kahta ütam-e I yak me kahta ütam ngin yejema-a toinyu angma-a, hüyange hatüo inok mepu kuh teiküma-a, kuhpa pho küma-a Iye üphongni shümme yelak wongpong.

⁸Hüpoi kuhpa yepho ok küma-a, nok nokpuwe eihapa toinyu moth te yak yupu heiya yeyupu tüopa shinglak jingne, I Kahwang sheshao me woi peiye jiengpu yahlak wongpong.

⁹“Toinyu nanha jingne mop ngaipu lili me, mahu jingne jeyah, gado jingne jeyah, nyee jingne jeyah, inkheklan jing jeyah, yejema-a hüke hanghe mahpu jingne jelakei jeyapoi, ütam-e ‘Hatüo üjing üja she ima-a,’ ükhong moini ngaowa Kahwang shongte peilak wongpong; Kahwange ao yeine tamlakei lye yoi pheipupa te üphong ni phalak wongpong.

¹⁰“Kahta ütam-e ütamja jing gado jeyah, mahu jeyah, nyee jeyah yinmok ütam anglak jingne phama-a, hüyange aowe-o ye-ngepe tüopa limahma-a yejema-a mako sama-a yejema-a jange teima-a,

¹¹Iye yoi eihapa moth te jonpu heiya yejonpuweih Youngwanpa sheshao me jiengjeplak wongpong; hüyange nokpuwe tüopa jiengjeppu te monglak wongpong, hüyange eihapawe shaaji Ite shümpu yephalak.

¹²Hüpoi yinmok-a kuh-e teine tamyange ngohma-a, lye tüopa nokpu te shümme yelak wongpong.

¹³Hüpoi tüopa phao yinmok-e toipu ne mengma-a, kahtapawe saki ne üjeam yah peilak yang, hüma-a yinmok-e hanghe toi yangki, tüopa jingne lye shümme yelak yeje.

¹⁴“Kahta ütam-e ülao kahta ja mepu yinmok seaye jon, hüyange nokpuwe manyah wante tüopa mako sama-a yejema-a liküma-a, ütingme tüopa kahtawe shümlak wongpong.

¹⁵Hüpoi nokpu ngohwante hatüo ngaipu ne mengma-a, lye shümlak wongpongne yeje. Hatüo nan shakke jonpu ne mengma-a, tüopa nanmee-a nokpuwe tüolak.”

¹⁶“Kahta ütam-e üne-o mankhümpe ngohpu naoyha yohkah-e yha phei phwngngamma-a, lye ütingme yoi shekonyu ne menglak jingne yha mee phalak yang.

¹⁷Hüpoi naoyha nyu Ipawe lanshe I tangte yha taine mintam she lanma-a lye nyemnya yha mee khakshuwe naoyhanyu üpate phalak wongpong.

¹⁸“Yepahipa lingpu sheko üyin me angne tahtam.

¹⁹“Yinmok phei phwngngampu netan li ne tamtüoh.

²⁰“Aohipawe tao Youngwanpa tokte kaiye ülao kahwang te toidolakei; li ne tamlak ne yeitam tüoh.

²¹“Yinpa te numan-e yemeipe tahjon yejema-a shaoshi ne yetamlak yang; teih tüoyah, numan Egypt kahtok me yinpa ne ngohyangki

²²Numan-e wamnyu yejema-a khah-ha shaoshi ne tahtam.

²³Numan-e iman shaoshi ne tamma-a hüyange iman nehi üte üngwünma-a, ütingme Taowe iman-e üngwünpu jailak;

²⁴hüyange ü-mongshih ngailak, hüyange Taowe wehok me numan toilak; hüyange numan shekonyulan wamnyu ne menglak hüyange numan hayimlan khah-ha ne menglak.

²⁵“Nange ü-kahtalan aoyin toiha ne ngohnang, imante ngin sea pha yahma-a, ngin sea phapalanne lingpu kih-e tahling; hüyange Ite shom-e yepha she tah i.

²⁶Nange ütamja jing inkhek tei janyange yahküma-a, nange Ite wanghe mannyippe muh leihye-e phalak yang;

²⁷hangjingne Ite büanglak tüoshaha ngohnang, hatüowa I sho jingne I inkhek ngohnang. I hanghe phei shilak? Hüyange aope lye Üte jamlak jingne üngwünlakei, Taowe Ite jailak; hangjingne Tao shüpshe phei ngohnang.

²⁸“Nange Kahwangte yaowe leye tah ngao yejema-a kahtalan tangme wanglam lampalan phoiwümme tahling.

²⁹“Aope phalak hipak ngoiyapeih, shon yengohpe numan jing tahlick, numan jing wuwüngti, hüyange numanjing olive minnga mepu üte dopu yahkei. “Nang jing üwangpa halom üte yahkei.

³⁰Nangjing üwangne puhpu mahu üha hei nyee üha üte yahkei. Üwangne puhpu üponghalan ünyu phei nyih nyit ngoh ne tamtüoh, hüyange tet shepupa nyih me üte dopha.

³¹“Numan-a ü-kahtalan, tüokhei phao yinmok-e toipu hanghe yinmok mei-o numan-e yehahlak yang; hahleima, tüopa-a kuihalante phatüoh.”