Read Konyak Naga WOITEI 23 Bible Online

WOITEI 23 - Konyak Naga bible

WOITEI 23

¹Nange tahleih ngaolan yah-e tahpei; ümengpa phei ngaoting ye ipu saki ne menglak nang yak tahyu.

²Ümeng linglak jingne nange ükhong sheyongpupa pheite tahwoi; yejema-a ükhong sheyongpupa yekaote ngaophünpu lüppe yetamlak jingne ngangpu toi me nange tah ngao;

³hüyange ngaophün wante toiha kahtate sheta leiye tahjon.

⁴“Nange nang wepa jing mahu yejema-a gado lam pienne taiye hüoma-a, hatüo I tangte yah-e ye ne tamtüoh.

⁵Nangte nupu kahta jing gado ja hangki-e shepteiye toitawe ngeküma-a, nange Ite yejampe tahtüoh; nange I phei teijamlak wongpong.

⁶“Toiha kahta ja ngaophünpu me nange ngaophünpu leihkheih-e tahtam.

⁷Tahleih hangpu mepu nang shejai she yanne ngohtüoh; hüyange ümeng yenangpu hüyange ngaoting ipa nange tahtoi; hangjingne aowe hükihpu yeshupu toi lingyapeih Taowe yeitamlak.

⁸Hüyange nange yakjai hango yeyahlak yang; hangjingne yakjaiye üyonglan mük pom tamnang hüyange ngaoting ipa ngao leihkheih-e tamnang.

⁹“Nange yinkempa shaoshi ne tahtam, hangjingne numan Egypt kahtok me yinkempa ne ngohyangpu khei numan-e yinkempa mongjang hangke ngoh shing ngoh nang.”

¹⁰“Wangpeng wok jingne nange kahtokte üli deilak hüyange tüopa mepu ülick shaijem tüoh.

¹¹Hüpoi wangpeng nyit shepupa me-a hüke yiengne tamtüoh, hüyange tüopa me penge lick-e ngaipu hango tahyah. Tüolan mongme hanghe lick-e ngailakei toihalan-e hahne ok, hüyange towe tüohpu lili-a phao yinmoklan-e hahlak. Hüke muh nange wuwünglick kah hüyange olive pelick jingne lingtüoh.

¹²“Nyih wok nange nang toi lingtüoh, hüpoi nyih nyit shepupa me nange toi tah ling; tüome nakshih nang mahu hei gado toloi meipu oklak, hüyange nang rhapalan hei yinkempa lüohe meilak.

¹³“Tao Youngwanpawe numante ngaopu khongkümpu jeng kenting yah. Ülao kahwanglan te tahyop, yejema-a nang ju mepu iman min nehoi ngaine tah tam.”

¹⁴Wangpeng ja me lüm me,

¹⁵Abib leat, hanghepa leat me numan-e Egypt tüohyange yayong, tüopa leat me Taowe hangke numante ngaokeng pha hüke do yenyütpu an mo motüoh. Tüopa mo nyih nyit mongme do nyütyangpu an hango tah hah. Dopu ja yeyahpe üte yoplak jingne aope-o tah pei.

¹⁶Nange nangjing kah me deipu üwangpa ülick phei Tahyah Mo motüoh. Wangküm yeme, aope nange kah mepu ülick yah-shoyalakeih, Lao Mo motüoh.

¹⁷Wangpeng te lüm me netan lili Ütahpa Youngwanpa sheshao me peilak yang.

¹⁸“Nange aope üte toidopu iy phalakeih, do phei nyütyange hangho tahpha. “Üte phapu mo mepu üyao ünepu napte ngoi-e yetüohlak yang.

¹⁹“Nang Kahwang Youngwanpa nokte nange hamme ngaipu üwangpa tahlick shemeipupa yah peitüoh. “Ünyulan düam phei jamme nyeeha yejema-a youn ha tahyang.”

²⁰“Leihuyah, nang lamnyu me woilak hüyange Taowe hanghe kahmük tümyange ngohnang tüoyete nang woiye peilak jingne Taowe nang sheshao yete wangdang shongmokpa ja shonlak.

²¹Kentinge ngohyah hüyange I ngaowüng jaiyah. Hüyange I phei tüi-e tahyong, hangjingne Taowe I shonne tamnang, hüyange hükih-e tüi-e yongpuwa lye ümeng yewinlak.

²²“Hüpoi nang I ngao jaiyange hüyange Taowe ngaowe tampu khongkümpu lingma-a, nang tangte peipu wepalan üshei phei Tao wepa ne menglak, hüyange nang phei yemeipa lan phei Tao yemeilak.

²³“Ü-shongmokpa nang shaote tailak; hüyange Amorlan, hei Hitlan, hüyange Perizzlan hei Kananlan, Hivitlan hei Jebuslan kahmükte nang woipeilak hüyange Taowe iman mahne tamlak.

²⁴Nange iman kahwanglan te khuhtawe yekhümlak, yejema-a iman shao yeshanlak, hüyange iman mengpu wanglam yejonlak, imanjing kahwanglan mahtam tüoh hüyange imanjing üjao long shongnyulan khüw wintam tüoh.

²⁵Nange nang Kahwang Youngwanpate yopkhümtüoh. Taowe nangte hahying hei yeng moiman tamlak hüyange nang daktin khongküm yahteilak.

²⁶Nang kahmük me ao-o yoiha meng winpu yejema-a heepu yengoh tamlak. Taowe jinlao shangshao-e tamlak.

²⁷“Nang phei hokwepu kahtalan Taowe iman-a üte nyamne tamlak; iman pa me üpong yetüope moppu ja Taowe peine tamlak hüyange nang wepalan khongküm nangte tok-lüplak ne ling tamlak.

²⁸Hüyange Taowe nang shaoyete nangtepu wepalante shangtak nyahnyu shonlak; tüo kaiye Hivitlan, Kananlan, hüyange Hittitlan nang sheshao mepu jange teilak.

²⁹Hüpoi Taowe iman-a wangpeng ja me lanshe khongkümpu jange yeteitamlak; Taowe hüke jange teima-a, kahmük-a wanwüng jeng ne mengkülak, hüyange nangte loishe phao yinmoklan ngaikülak.

³⁰Hüleima nang jaalun-e ngaiye, kahmük-a lanshe manyah manyah nang sheshao mepu Taowe iman üjing jingha hei jang teilak.

³¹Taowe nangjing kahmük yikenga Ütak Yengching mepu Euphrates yengyin ngoiye hüyange Mediterranean Yengching mepu wanwüng jeng ngoiye khaowe yonge tamlak, Tüolan kahmük me nyoi ngohpalan tangme okpu ngelak üngan wong Taowe nangte phalak, hüyange nang ngoipu phei jam jamshe nange iman-a jange yanlak.

³²Nange iman phei yejema-a imanjing kahwanglan phei teijanpu hango tah yah.

³³Numan kahtok me tüolan kahtalan ngohne tahtam nange iman ngohne tamma-a, Ü-phei tüi-e iman-e nang nuwe tamphalak. Nange imanjing kahwanglante yoppe khüma-a, hatüowa nang jingne tün ja angpu ne ngoh külak.”