Read Konyak Naga WOITEI 24 Bible Online

WOITEI 24 - Konyak Naga bible

WOITEI 24

¹Youngwanpawe Mosa te i, “Nang, Aaron, Nadab, Abihu hüyange Israel lwngmeilan denyit ü-tangte kahtang te ongkei; hüyange numan shejai she ngohyange yop khümtüoh.

²Nang shaha hei japa ülaolan ao-o ü-shongte owe yepeilak. Kahtalan-a kahtangte I phei ye-onglak yang.”

³Mosa peingoi hüyange kahtalan te Youngwanpawe phapu linglak ngaokhüm lili ngaowe tam, hüyange kahta lili-e jamshe ngaopha ja phei i, “Youngwanpawe ngaowe tampu khongkümpu toman-e linglak.”

⁴Hüyange Mosawe Youngwanpawe phapu ngaokenglan khongkümpu nyan. I napning shonge lao, kahtang yashong me lye wümjong ja ling hüyange Israel nokphong jaja jingne long penme ni yonge tam.

⁵Tüophei me Israel naoshelan Youngwanpa te jakke dopu hüyange mahu üpong toiyange chingmei dopu phalak jingne lye shon.

⁶Hüyange Mosawe yinmok iy jakih-e tamme yankhong me ang; hüyange jakih-e tangpu iy-a lye wümjong tang me shai.

⁷Tüophei me jiengjeppu laitep hanghe me Youngwanpa ngaokenglan nyanne ngoh lye jon, hüyange tüopa-a kahtalante üngwün-e iye hüo. Iman-e i, “Toman-e Youngwanpa te jailak hüyange Iye ngaokeng phawe tampu lili linglakei.”

⁸Hüwante Mosawe iy yah, tüopa-a kahtalante shaitam, hüyange i, “Hatüo jiengjeppu iy, tüome ngohpu ngaokenglan khongkümpu kih-e, Youngwanpawe numan phei lingnang.”

⁹Tüophei me Mosa, Aaron, Nadab, Abihu, hüyange Israel lwngmeilan denyit ngoiye kahtang te ong;

¹⁰hüyange iman-e Israel Kahwang nge. I yashong me ngaiphaihpu wanghüng lepu me sapphire toinyu longe kamyange ngohpu kih-e nge.

¹¹Kahwange tüolan Israel üshanglan te I yak yele; iman-e Kahwang nge, hüyange tüophei me iman-e jamme hahying yangki.

¹²Youngwanpawe Mosa te i, “Ü-tangte kahtang yete ongkei, hüyange nang tüo me ngohwante, kahtalante nyüoweleiye Taowe nyanpu hanghe me Taowe phapu ngaokhümlan ngohnang tüopa longsheng khüo Taowe nangte yahpha peih.”

¹³Tüokhei Mosa hüyange Ite jampa Joshua tümme sho, hüyange Kahwang kahtangte Mosa ong.

¹⁴Hüyange Mosawe lwngmeilan te i, “Toman nishe numan tangte leih manye manye lakjing tüome numan-e toman tanne ngohkei. Leihuyah, Aaron hei Hur numan phei ngohnang; tüokhei aowe teingaolak ne ngohyapeih Iye imni shongte peiye ngaone tamtüoh.”

¹⁵Tüophei me Mosa Sinai kahtangte ong, hüyange kahtanga wangphom-e nyeih.

¹⁶Youngwanpa müktishiwa Sinai kahtang me ngohyangki, hüyange wangphom-e hatüo nyih wok büang; hüyange nyit shepupa nyih me wangphom yo mepu Iye Mosate nyik.

¹⁷Sha-a Israel hayim mükte kahtang me Youngwanpa müktishiwa leilak me mahtamlakpa vün kih-e ngoh yangki.

¹⁸Hüyange Mosa wangphom yo te kahtang ngoiye ong; hüyange Mosa kahtang me nyih deli hüyange pha deli ngoh yangki.