Read Konyak Naga WOITEI 25 Bible Online

WOITEI 25 - Konyak Naga bible

WOITEI 25

¹Youngwanpawe Mosa te i,

²“Ü-jingne iman-e dopu ja phatüoh she Israel hayimte itüoh. Kahta aowe hangkih pu dopulan phahuyapeih yahtüoh.

³Hüyange numan-e iman mepu yahlak dopuwa hatüolan ngohkülak: hon, khüm, hüyange shakphan yan;

⁴pengkhai, wanghüng, phutti, hüyange mat tak; youn min phei takpu inkhek;

⁵taakke yanti yangphei nyee sho, shemeipupa meisho; acacia pee;

⁶vüntük jingne minnga, pholak jingne muli, hüyange üpe-meipu sü;

⁷ütahpa ngengpa jing phakshaoh ülao hei I jing mongkhüp me onyx long hei ülao juyüklan ngohlak.

⁸Hüyange Tao iman phei ngohlak jingne Ü-jingne iman-e üjaopa nyoi ja lingne tamtüoh.

⁹Taowe hangke üshei nangte khümjing nyenok hüyange tüome toinan jeng hüoyangki hüke hei nange linglak yang.

¹⁰“Acacia pee phei jiengjeppu ghonu ja lingtüoh, üjükte yakkong ni phei me tangkhüw, hüyange üpeamte yakkong ja phei me tangkhüw, hüyange daopute yakkong ja phei me tangkhüw.

¹¹Hüyange nange hatüowa hon shaha phei ümong yeme hüyange ütahye me shittüoh hüyange tüopa ünah neikonne honne shitte büangtüoh.

¹²Hüyange tüopa jingne nange hon shüptet peli linglak yang, hüyange hatüo üya peli me, jaye me shüptet ni hüyange jaye me shüptet ni angtüoh.

¹³Hüyange nange acacia pee phei sheam lingtüoh hüyange tüopa tangme honne photüoh.

¹⁴Hüyange nange sheam-a ghonu ünah ye me ngohpu ükamte letamtüoh; tüome ghonu-a pailak.

¹⁵Tüopa ghonu tepu shüptet ükamme sheam-a leyange anglak, hüyange tüopa-a aope-o teakke yeyahlak.

¹⁶Tüophei me Taowe nangte phalak longsheng ni hanghe me ngaokhümlan nyanyange ngohnang tüopa ghonu me hintüoh.

¹⁷“Tüophei me nange hon shaha phei shüpshe shotjing ja lingtüoh; tüopa üjükte yakkong ni phei me tangkhüw, hüyange üpeamte yakkong ja phei me tangkhüw.

¹⁸Hüyange shüpshe shotjing ünah moi ni yekao me meimeiye jopyang phei honne cherubim ni nange lingtüoh.

¹⁹Ünah jayekao me cherub ja, hüyange ünah jayekao me cherub ja she shüpshe shotjing ja me ünah moini yeme cherubim ngohyange lingtüoh.

²⁰Hüyange cherubim-a iman sheta teihüowe, shüpshe shotjing iman üyange yüohyange, iman üyanga ütang yeme saayange linglak yang.

²¹Nange shüpshe shotjinga ghonu tang me angtüoh; hüyange Taowe nangte phapu jiengjeppu-a tüome hintüoh.

²²Hüyange tüome Taowe nang phei hüolakei, hüyange ghonu tangme cherubim nipa mepu, shüpshe shotjing mepu, Israel hayimlante ngaokhüm hanghepa Taowe nangte phalak, khongkümpu jeng Taowe nang phei ngaolak.

²³“Nange acacia pee phei khaoja lingtüoh; tüopa üjükte yakkong ni, hüyange tüopa üpeamte yakkong ja, hüyange tüopa daopute yakkong ja phei me tangkhüw.

²⁴Hüyange tüopa tangme nange jaoshepu hon phei phowe büangtüoh; hüyange tüopa neikonne honne shittüoh.

²⁵Hüyange nange tüopa neikonne yakpha khop nanjing khaowe üju lingtüoh, hüyange tüopa üjute honne phoyange lingtüoh.

²⁶Hüyange tüopa jingne nange pailak hon shüptet peli lingtüoh; hüyange tüolan-a ümeken me üya peli ngohnang, tüopa ünuk peli me angtam tüoh.

²⁷Khao pailak jingne sheam lelak shüptet lan-a üju pong me anglak yang.

²⁸Sheamlan-a acacia pee phei lingtüoh, hüyange tüolante honne shitte büangtüoh.

²⁹Sheng, wan, yengsheng, hüyange yankhonglan wuwüngti dowante jonlak jingne lingtüoh. Tüolan khongkümpuwa jaoshepu hon phei lingtüoh.

³⁰Khaowa jiengjeppu ghonu sheshao me anglak, hüyange tüopa khao tangme üte dopu üjao an jinte anglak yang.

³¹“Nange jaoshepu hon phei vüntük yongjing ja lingtüoh. Tüopa tepu yajenth hei üya-a meimei-e joppe yaoyang phei hon phei lingtüoh. Tüopatepu oleng, jupenglan, pengpu üju hei üyak lan-a tüopa phei üpee ja ne hei jam-e linglak.

³²Tüopa vüntük yongjing mepu üphat wok, moini yekao me lümpong phatte yanlak.

³³Üqui wok phatte yanpu üphat moilan me almond jupeng penge jupeng üyak-o omme jupeng lümpong linglak.

³⁴Vüntük yongjing üya-a almond jupeng pengpu üpeng hei jupeng üyaklan omme lingyang phei jupeng peli ngohlak.

³⁵Jupeng üqui phatpu lüm moilan phang me jupeng pengpu japong ngohlak.

³⁶Pengpu jupeng üju, phatte yanpu üquilan, hüyange vüntük yongjing khongkümpu-a hon shaha joppe lingyang phei üpe ja ne menglak yang.

³⁷Vüntük yongjinglan jingne vüntük nyit lingtüoh, hüyange hüke tüolanne sheshao yeme wangngai teelak jingne tüolan tangme angtam tüoh.

³⁸Tüome jonlak jeplak hei süjak shenglan-a jaoshepu hon phei lingtüoh.

³⁹Vüntük yongjing hüyange tüome yahpu toinan khongkümpu linglak jingne jaoshepu hon kilogram delüm me nga yah jontüoh.

⁴⁰Taowe nangte kahtang me hangke hüo tüo kih-e tüolan-a linglak jingne namnotüoh.