Read Konyak Naga WOITEI 26 Bible Online

WOITEI 26 - Konyak Naga bible

WOITEI 26

¹“Pengkhai shemeipupa phei wanghüng, phutti, hüyange mattak hase ngaiye takyangpu üpha pen phei Tao ompu Nyenok, Üjaopa nyenok ümongpa lingtüoh. Cherubim ngaiye manneyange linglak yang,

²jhotnye moilan üjük üpeam ja kih-e ngohlak, laopute yakkong da me tet, hüyange khaopute yakkong peli ngohlak.

³Üpha nga-a üpha ja ne sheiye shünglak, hüyange japa üpha nga-o hüke muh ja ne shüngtüoh.

⁴Wanghüng hase pheipu inkhek phei jhotnye ü-at ye üpha lili üjeng yeme üpak lingtüoh.

⁵Üwangpa üpha tepu üwangpa üjep me üpak denga satüoh, hüyange ni shepupa üpha tepu üjep phei teihüowe üpak denga satüoh.

⁶Hüyange hon yankok denga hanghe me üjep ni-a üpha ja ne shünglak, tüo kaiye Khümjing nyenok-a ümongja ne menglak.”

⁷“Hüyange Khümjing nyenok tangme yüohlak jingne nange youn min phei jhotnye üpha pen me ja lingtüoh.

⁸Laopute yakkong delüm hüyange khaopute yakkong peli; jhotnye khongkümpu jakih-e shinne linglak.

⁹Nange jhotnye nga-a üjep ja ne jamme hüyange ülao jhotnye wok-a üjep ja ne she shüngtüoh. Hüyange üpha wok-a khümjing sheshao yeme ni ne nüppe yetüoh.

¹⁰Ükümpa üjep tepu üpha üjeng ye me üpak denga satüoh, hüyange japa üjep ünah yeme üpak denga satüoh.

¹¹“Hüyange nange shakphan yan phei yankok denga lingtüoh, hüyange ünüp ni-a ja ne menge büange linglak jingne üpaklan me tüolan-a künne tamtüoh.

¹²Hüyange jhotnye üjeng tangkhüwpu nyei ngohpuwa khümjing tokphei yeme jhottüoh.

¹³Khümjing te tüopawe neikonne büanglak nanjingne laopu moini yekao mepu yakkong japong towe jhotte anglak yang.

¹⁴“Ü-at yeme shonglak jingne üne-o ülam ni hüke nyee üsho taakke tiyangphei hüyange ja-a shemeipupa meisho phei lingtüoh.”

¹⁵“Khümjing nyenok ütangye püangpeam jingne acacia pee phei lingtüoh.

¹⁶Pelao jaja laopute yakkong pen hüyange khaopu te yakkong japhei me tangkhüw ngohlak.

¹⁷Hüyange pelaolan hüppu oklak jingne üphat nipong phei linglak. Pelao khongkümpu me tüokihpu üphat ngoh-e linglak yang.

¹⁸Heyekao khümjing jingne pelao da yahtüoh,

¹⁹hüyange tüolan me yahlak jingne khüm yajenth deli, pelao ja ja me üphat nipong ngohpute lümlak jingne yajenth nipong ngohlak.

²⁰Khümjing apyekao jingne pelao da yahtüoh;

²¹hüyange khüm yajenth deli, pelao ja me nipong yahlak ne lingtüoh.

²²Khümjing tokphei ye henyip yekao jingne pelao wok yahtüoh,

²³hüyange ünuk me yahlak jingne pelao ni yahtüoh.

²⁴Ünuk me yahpu pelao lanna yashong yeme hüplak hüyange ütangye ngoiye khongkümpu hüppe inlak. Hüke ünuk ni ngaiye tampu pelao ni-a hüppe linglak yang.

²⁵Tüokaiye khüm yajenth pen me wok nangyange pelao tet, pelao ja ja me nipong ngohkülak.”

²⁶“Hüyange nange acacia pee phei mailieng penme nga lingtüoh, khümjing nyenok ükao ja pelao jingne nga,

²⁷hüyange khümjing nyenok jayekao jingne pelao nga, hüyange tokphei ye henyip üjengye jingne pelao nga yahtüoh.

²⁸Üwopa peilei wenao pelao wosat ngoiye khümjing jaye üjeng mepu jaye üjeng ngoiye shalak yang.

²⁹Pelao lante honne photüoh hüyange peilei wenaolante tüklak jingne hon shüptet te ange satüoh, hüyange tüolante-o honne photüoh.

³⁰Kahtang me Taowe nangte hüowe tampu kih-e khümjing nyenok-a weye linglak yang.”

³¹“Shemeipupa pengkhai phei wanghüng, phutti, hüyange mattak phei jhotnye ja taktüoh. Tüopa me cherubim inyange manneyange lingtüoh.

³²Hüyange tüopa-a yankok me shinyange, khüm yajenth peli me nyünyange ngohpu honne phoyang phei acacia shong peli me künne tamtüoh.

³³Jhotnye lanna khümjing nyenok püangme khüng lienge ngohpu yankok me künne tamtüoh, hüyange longsheng ni hinyange ngohpu jiengjeppu ghonu-a jhotnye tokphei me angtam tüoh. Hüwante üjao nyoi hei shejaopupa nyoi nipa me jhotnye-e tienlak.

³⁴Shejaopupa nyoi me ngohpu ghonu tangme shüpshe shotjinga angtüoh.

³⁵Hüyange shejaopupa nyoi ü-at ye me, khaowa khümjing nyenok apyekaote nyien yange hüyange vüntük yongjinga heyekao me nyien yange angtamtüoh.

³⁶“Khümjing nyenok nokshao ye jingne wanghüng, phutti, hüyange mattak hüyange manneyange hase inyange shemeipupa pengkhai-e jhotnye taktüoh.

³⁷Tüopa jhotnye jingne honne phoyange hüyange hon phei lingpu yankok khamme lingyange acacia pee phei shong nga lingtüoh; hüyange tüolan shong jingne shakphanyan yajenth nga lingtüoh.”