Read Konyak Naga WOITEI 27 Bible Online

WOITEI 27 - Konyak Naga bible

WOITEI 27

¹“Nange acacia pee phei wümjong ja lingtüoh. Hatüowa üjük üpeamja kih-e, üjükte yakkong nga hüyange üpeam te yakkong nga; hüyange daopute yakkong lüm lingtüoh.

²Hüyange ünuk peli üju me üwong ngai tamtüoh. tüolan-a wümjong mepu üpüm ja ne hei menglak, hüyange nopu tangme shakphan yanne shoktüoh.

³Hüyange vünla anglak jingne kahmak tük yaotüoh, hüyange kahhoklak, hei yengjon sheng, hüyange yankok hei vünhoklak nange lingtüoh; tüolan jonne pailaklan khongkümpuwa shakphan yanne nange lingtüoh.

⁴Hüyange tüojing ne shakphan yan phei yanjep lingtüoh, hüyange yanjep ünuk peli me yakjonlak ne shakphan yan shüptet peli satamtüoh.

⁵Wümjong ü-atye phangme yanjep-a angtam tüoh; tüokaiye wümjong wosat ngoiye daowe onglak.

⁶Hüyange nange acacia pee phei pailak sheam lingtüoh, hüyange tüolan me shakphan yan phei shitte photüoh;

⁷hüyange sheam lan-a shüptet me huhlak, hüyange pai wante sheam lan-a wümjong ünah ye moini me ngohlak yang.

⁸Kahtang me Taowe nangte hüoyangpu kih-e, wümjonga pekhüw phei lingtüoh, hüyange khwnge ngaine tamtüoh.

⁹“Shemeipupa pengkhai jhotnye phei Tao ompu khümjing jingne ghonyoi lingtüoh. Heyekao me jhotnye lan-a yakkong gho ja laowe linglak,

¹⁰shakphan yan yajenth da tang me shakphan yan shong da ngoiye khüm phei lingpu yankok hei yansholan ngohlak.

¹¹Hüke muh apyekao gho nyoi me-o ja kih-e muh linglak.

¹²Henyip yekao me jhotnye lan-a yakkong denga laowe shong pen hüyange yajenth pen tangme ngohlak.

¹³Heong yekao, ümeken me nokshao yekao ne ngoh nang, tüoken mepu ghonyoi-o khaopu me yakkong denga ngohlak.

¹⁴Taten ükao ja jingne jhotpu lan-a yakkong pen me nga, yajenth lüm hüyange shong lüm phei ngohlak.

¹⁵Jayekao taten me-o jhotpuwa yakkong pen me nga, yajenth lüm hüyange shong lüm phei ngohlak.

¹⁶Ghonyoi nokshao ye jingne wanghüng, phutti, hüyange mattak hase phei hüyange manneyange shemeipupa pengkhai phei takyang phei jhotnye yakkong da ngohlak. Tüopa-a yajenth peli me shong peli nyimlak.

¹⁷Ghonyoi neikonpu shonglan-a khüm yansho phei hüplak, hüyange tüolantepu yankok lan-a khüm phei linglak hüyange tüolantepu yajenth lan-a shakphan yan phei.

¹⁸Ghonyoi üjükte yakkong gho ja, üpeamte yakkong denga, hüyange daopute yakkong nga ngohlak. Jhotnye lan-a shemeipupa pengkhai phei hüyange yajenth lan-a shakphan yan phei linglak.

¹⁹Khümjing nyenok me jonne paipu toinan khongkümpu hüyange khümjing nyenok jingne yahpu hanlag lili hüyange ghonyoi khongkümpuwa shakphan yan phei linglak.”

²⁰“Nange Israel kahtalante yajeih yemahpe pah-e anglak jingne vüntük jingne numan jing shemeipupa olive minnga yah peikei she ngaokeng phatüoh.

²¹Aaron hüyange Ihalanne jiengjeppu ghonu sheshao me khümjing nyenok jhotnye ü-at yeme iman-e vüntük pah anglak yang. Tao ompu tüoken me ün mepu shom ngoiye iman-e pah anglak yang. Tüopa nyanpu ngaokhüm-a Israellan hüyange iman huhayimlanne jin jinte jonlak ngohnang.”