Read Konyak Naga WOITEI 28 Bible Online

WOITEI 28 - Konyak Naga bible

WOITEI 28

¹“Nangjei Aaron hüyange Ihalan, Nadab, Abihu, Eleazar, hüyange Ithamarlan nang shongte nyik tüoh. Israel kahtalan yo mepu iman yanne angtüoh, hümme nakshih iman-e ngengpaja ne ü-shao shanlak.

²Ite shemei yaomapu hüyange okkeshangpu phei hüowe tamlak jingne nangjei Aaron jingne ngengpa jing nyemo shüngtüoh.

³Aoyinte Taowe okkeshangpu pha tüolan aimanpalan khongkümpu nyik tüoh, hüyange Aaron jing inkheklan takke shünglak; tüophei me ü-toishao jingne ngengpa ja ne jaowe tamlak.

⁴Imante tüolan lingtüoh she itüoh: mongkhüp ja, ngengpa phakshaoh ja, ngeng-ahng phakshao ja, awfa yantak inyangpu phakshao ja, shangnyeih khek, hüyange shienghit ja, iman-e tüokih-e ngengpa nyemo nangjei Aaron hei Ihalan jingne shünge linglak yang; tüome nakshih iman-e ngengpa ja ne menge ü-shaoshan lak.

⁵Aimanpalan-e wanghüng phutti, mattak, hon ve, hüyange shemeipupa pengkhai hase pheipu velan jonne linglak yang.”

⁶“Hüyange iman-e ngengpa phakshaoh-a wanghüng, phutti, hüyange mattak, hon ve, hüyange shemeipupa pengkhai awfa yantak inyange linglak.

⁷Moini üjeng me hüowe shalak ne üjeng nangyange phakwai ni ngohlak.

⁸Jakihpu hase toinan muh yahyange yeonge meiye takpu shienghit khek ngengpa phakshaoh me wailak tüokaiye tüophei ja ne ngohlak.

⁹Hüyange nange onyz long ni yayah hüyange tüopa me Jacob hayim pen me ni min watte nyan tüoh;

¹⁰hüke iman puhpu kih-e jeiyongpa me wange long ja me wok, hüyange japa long me wok she nyantüoh.

¹¹Jacob hayimlan min long ni me watte nyanlak jingne okkeshangpu juyük yaopa yamtüoh, hüyange longa hon ünok ja me yonge tamlak.

¹²Israel nokphong pen me ni ompu hüowe tüolan-a ngengpa phakshaoh phakwai me angtam tüoh. Hükih-e linge Aaron-e iman min-a I phaktang me kiyange kemlak, hümme nakshih Tao, Youngwanpawe jinte ü-kahtalan teih tüolak.

¹³Hüyange nange hon ünok ni lingtüoh;

¹⁴hüyange wu lüppu kih-e lüpyange hon shaha phei yanwu ni lingyange tüo ni-a hon ünok me khümtüoh.

¹⁵“Nange Ütahpa Ngengpawe Kahwangpawe mongpu shinge oklak me yahlak jingne mongkhüp ja lingtüoh. Hatüowa ngengpa phakshaoh yahpu ülamlan muh yahtüoh hüyange awfa yantak inpuwa teilepu me linglak.

¹⁶Hatüowa üjük üpeamjakih-e hüyange ni ne nüplak. Üjük te yakkam ja, hüyange üpeamte-o yakkam ja.

¹⁷Tüopa tangme toinyu long üleng peli neak-e tamtüoh; üwangpa leng me ruby ja, topaz ja, hüyange garnet ja;

¹⁸nishepupa leng me emerald ja, sapphire ja, hüyange diamond ja;

¹⁹lüm shepupa leng me jacinth ja, agate ja, hüyange amethyst ja;

²⁰hüyange peli shepupa leng me beryl ja, onyx ja, hüyange jasper ja. Tüolan-a hon ünok ja me neak-e khümlak yang.

²¹Israel nokphonglan ompu hüowe tüolan long pen me ni jaja me Jacob hayimlan min japong me watte nyanlak.

²²Mongkhüp jingne wu lüppu kih-e lüpyange jaoshepu hon phei honwu lingtüoh.

²³Hon shüptet ni lingtüoh hüyange tüolan-a mongkhüp ütokye ünuk ni me shintüoh.

²⁴Hüyange honwu ni-a tüopa shüptet ni me shintüoh.

²⁵Honwu jayekao üjeng ni-a honnok ni me shintüoh, hükih-e linge ngengpa phakshaoh phakwai ütah ye me khüm tamtüoh.

²⁶Tüophei me hon shüptet ni lingtüoh, hüyange tüo ni-a ngengpa phakshaoh phei neak-e mongkhüp üphang ye ünuk ümongye me shintüoh.

²⁷Üne-o hon shüptet ni lingtüoh, hüyange ngengpa phakshaoh tepu okkeshange takpu shenghit ütok pong hüyange shüngpu pongme phakwai ni ütah üphang yeme shintam tüoh.

²⁸Ngengpa phakshaoh tepu shüptet te mongkhüp shüptet-a wanghüng wu phei satüoh, hümme nakshih mongkhüp-a lanne yetape shenghit tok me monge ngohlak.”

²⁹“Aope Üjao Nyoite Aaron onglakeih, hüwante Israel nokphonglan min watte nyanyangpu mongkhüp lye yahyange onglak, hüwante Tao, Youngwanpawe jinte ü-kahtalan teih tüolak.

³⁰Hüyange mongkhüp tangme Urim hei Thummim angtam tüoh, hümme nakshih aope ü-üjaopa nyoite I peilakeih hüwante Aaron-e tüolan-a yah peilak. Hükih-e onge peipu hipak lili me Iye tüopa mongkhüp yüklak wongpong, hümme nakshih Israel kahtalan jingne Taowe mongpu Iye shinge oklak.”

³¹“Hüyange nange ngengpa phakshaoh tangme yahpu ngeng-ahng phakshaoh-a lanshe wanghüng mat phei linglak yang.

³²Hatüo me üshang ngailak jingne üwo linglak, hüyange tüopa üwo yehitlak jingne yakke takpu mongjü-ongpu khek-e üju neiye paowe shünglak.

³³Tüopa phakshaoh üya ye neikonne wanghüng, phutti, hüyange mattak hase pheipu chamuk lingtüoh, hüyange üpa üpa me hon lüngha jhotte lingtüoh.

³⁴Ngeng-ahng phakshaoh üya neikonpu me hon lüngha ja hüyange chamuk ja, hon lüngha ja, hüyange chamuk ja she ngohlak.

³⁵Aope ngengpa toishao linge jonlakei, Aaron-e tüopa ngengpa phakshaoh shaohlak yang; aope I üjao nyoi, Youngwanpa sheshao me peilakeih yejema-a I tailakei, hatüo lüng wüng jailak hüyange I yetoilak.”

³⁶“Hüyange nange jaoshepu hon phei longsheng yük lingtüoh, hüyange tüopa me ‘Youngwanpa te Jaowetampupa’ she watte nyantüoh.

³⁷Tüopa-a wanghüng wu phei shangnyeih khek sheshao yeme satüoh.

³⁸Aaron-e tüopa-a I shekeng me khümyange ngohlak, tüokaiye kahtalan-e dopu phawante iman-e püohpinpu ngoh yapoi, Tao, Youngwanpawe Israellan-e üte jaowe tamme dopulan khongkümpu Taowe yahlak.”

³⁹“Shemeipupa pengkhai phei Aaron jing phakshaoh hüyange shemeipupa pengkhai phei shangnyeih khek ja hüyange üne-o awfa yantak inyange shenghit ja taktüoh.”

⁴⁰“Hüyange Aaron hayimlan imante shemei yaomawe hüyange okkeshangpu phatamlak jingne phakshaoh, shienghit khek, hüyange shaoshaohlan shünge tamtüoh.

⁴¹Hüyange tüolan inkheklan-a nange nangjei Aaron hüyange I hayimlante shaoh-e tamtüoh. Tüophei me imante olive minnga phowe tamme phünne phawe hüyange jaowe tamtüoh; tüo kaiye iman-e ngengpa ja ne ü-shaoshanlak.

⁴²Hüyange nange iman pümkeng me ngohpu büanglak jingne shieng mepu yung ngoiye yahlak koongshaoh pengkhai khek phei shüngtüoh.

⁴³Aope iman ü-khümjing nyenokte yejema-a ngengpa ja toishao linglak jingne Shejaopupa Nyoi wümjongte owe peilakeih, Aaron hüyange I hayimlan-e jinte tüolan yahyange peilak yang, hümme nakshih iman pümkeng me yengoh teiye yetoilak. Tüopa-a Aaron hüyange Ijing huhayimlan jingne jinte ngohlak ngaokeng ngohnang.”