Read Konyak Naga WOITEI 29 Bible Online

WOITEI 29 - Konyak Naga bible

WOITEI 29

¹“Sha-a Ü-shaoshanpu me ngengpa ja ne iman phünne phalak jingne nange hatüo kih-e linglak yang. Mahu üpongha ja hüyange nyeepong ni tushangpu hango yenangpu yayah.

²Shemeipupa wheat ankhoih yahtüoh, do tahjon, hüyange minnga phei ütam hüyange minnga yenyütpe ütam she an lingtüoh, hüyange ütam-a minnga phei kange an üwan ne-o lingtüoh.

³Hüyange tüolan-a küm ja me angtüoh, hüyange nange aope mahu üpong hei nyeepong ni toido yalakei hüwante tüolan-a üte dotüoh.”

⁴Nange Aaron hüyange I hayimlan Khümjing Nyenok nokshao me woipei tüoh; hüyange imante jaoshawe yeng yüotüoh she itüoh.

⁵Tüophei me Aaronte ngengpa oleng tüm tamtüoh, hüke phakshaoh, ngengpa phakshaoh, ngeng-ahng phakshaoh, hatüowa ngengpa phakshaoh tangme yahlak, mongkhüp, hüyange shienghit.

⁶Ime shangnyeih khek nyeihtam tüoh, hüyange tüopa tangme “Youngwanpate Jaowetampupa” she jaowetampu toishao jingne watte nyanpu satamtüoh.

⁷Tüophei me pholak minnga yayah, I shangme tüopa shokke tamtüoh, hüyange Ite phowe tamtüoh.

⁸“Tüophei me nange I hayimlan woipei tüoh hüyange imante phakshaoh shaohtam tüoh.

⁹Iman shieng me shienghit hitte tamtüoh hüyange iman shang me shaoshaoh satamtüoh. Nange hükih-e linge Aaron hüyange Ihalan phünne phawe tamlak yang. Iman ne ngengpa ja ne jinte ü-shaoshanlak.”

¹⁰“Tüophei me Khümjing nyenok nokshao me mahu üpong woi peitüoh, hüyange tüopa mahu üpong shangme Aaron hüyange Ihalan-e yakke shünglak.

¹¹Khümjing nyenok nokshao yeme Tao-ompu üjao nyoi me mahu üponga toitüoh.

¹²Hüyange mahu üpong iy ütam yahtüoh hüyange khümjing üwong me nang yaklanne yahyange phowe tamtüoh. Hüyange topu iy khongkümpuwa wümjong yajenth te shok tamtüoh.

¹³Tüophei me seatük me lümyange ngohpu seashop khongkümpu shemeipupa mongphang, hüyange üyao-o omme titoi ni yahtüoh hüyange tüolan-a wümjong me üte dopu ja ne jaktüoh.

¹⁴Hüpoi mahu üpong mei, tüopa üsho, hüyange tüopa tepu üyeilan-a nange khümjing ü-at me vün me jakke wintüoh. Tüopa-a ünu jakke dopu.

¹⁵“Tüophei me nange nyeepong ni yo mepu ja yahtüoh, hüyange Aaron hei Ihalanne nyeepong shangme yakke shünglak.

¹⁶Tüopa toitüoh, hüyange tüopa mepu iy yahtüoh hüyange wümjong ünuk peli khongkümpu me shaitam tüoh.

¹⁷Tüophei me nange nyeeponga khoihnyai-e tehlak yang, hüyange tüomepu üyei ütang hei yashok yakshok lanna poitüoh, tüolan-a ülao mei phinhalan phei shang tangme angtam tüoh.

¹⁸Nyeepong no shepu hahying dopu ja ne wümjong me jakke tamtüoh. Tüopa dopu üpe meipuwe üte mongmei ne tamnang.”

¹⁹“Nyeepong ülaopa-o yahtüoh jaowe tampu jingne jonpupa nyeepong hüyange Aaron hei Ihalante tüopa shang tangme yakke shünglak.

²⁰Tüopa toitüoh, hüyange tüopa mepu iy ütam yahtüoh hüyange tüopa-a Aaron hei Ihalan yakjahye nakoksa me, iman jing yakjah ye yakpenyu me, hüyange imanjing yakjahye yapenyu lan me phowe tamtüoh. Hüyange topu iy-a wümjong ükao peli khongkümpute shaitam tüoh.

²¹Wümjong me ngohpu iy ütam hüyange phowe tamlak minnga ütam yahtüoh, hüyange tüopa-a Aaron hüyange Ijing inkheklante hüyange ihalan hei imanjing inkheklante shaitam tüoh. I, Ihalan, hüyange imanjing inkheklan-a hüwante üjingne jaowe tamnang.”

²²“Nange nyeepong üyao, ünyei üyao, üyei ümong me ngohpu üyao, hüyange mongphang me lümpu üyao, hüyange titoi ni, hüyange tüopa tangme ngohpu üyao hüyange yakjahye üyung wette yahtüoh, (hangjingne hatüowa phünne phapu nyeepong ngohnang).

²³Hanghepa üte doyapeih tüopa an küm mepu ülam lili mepu an ü-oun japong yahtüoh: olive minnga phei lingpu an üpha ja, hüyange minnga ye-ompe lingpu an üpha ja, hüyange an üpe ja.

²⁴Tüolan hahying khongkümpu Aaron hüyange Ihalan yak me angtam tüoh, hüyange yak yüppe dopu ja ne üte jaowe tam-e yak yüptüoh she imante itüoh.

²⁵Hüyange nange iman yak mepu tüolan-a yahtüoh hüyange üte hahying dopu ja ne jakke dopu ütangpa me wümjong me tüolan-a jakke tamtüoh. Tüopa dopu üpe meipuwe üte monghah ne tamnang.”

²⁶“Tüopa nyeepong jing jakuh yahtüoh hüyange tüopa-a yak yüppe dopu ja ne üte jaowe tamtüoh. Tüopa yinmok meitam-a nang jingne menglak.

²⁷“Aope ngengpa ja phünne phalakei, phünne phalak jingne jonpu nyeepong jing jakuh hei yung ni-a yakyüppe dopu ja ne üte jaowe tamlak yang, hüyange tüolan-a Aaron hüyange Ihalan jingne khatte anglak yang.

²⁸Hatüowa yejeilei ne Taowe tümyangpu ja hüke aope ü-kahta lanne iman-e shüppe shapu do pu phayalakei, yinmok tepu jakuh hüyange üyunga Aaron hei Ihalan jing. Hatüowa Youngwanpa üte kahtalanne phapu hünghao ngohnang.”

²⁹“Aaron-e yahpu ngengpa oleng-a aope iman phünne phalakei iman-e yahlak jingne I liphei ma-a Ihalan te phawe tüohlak.

³⁰Aaron üha aowe ngengpa ja ne I nanleilakei hüyange Üjao Nyoite shaoshanlak jingne khümjing nyenok te ao onglakeih, lye tüolan oleng-a nyih nyit mong jingne yahlak.”

³¹“Phünne phapu me yahpu nyeepong mei yahtüoh, hüyange tüopa-a üjao nyoi me yangtüoh.

³²Khümjing nyenok tafün shongme küm me towe tüohpu an phei iman-e tüopa-a hahlak.

³³Iman phünne phawante hanghepa ünu tantamlak jingne jonyangki iman-e hahlak. Hatüowa üjao hahying ngohnang. Tüokhei tüopa hahyinga ngengpalan shahawe hahne oklak.

³⁴Hüyange tüopa phünne phapu mei ütam yejema-a an ütam napning ngoiye towe ngohma-a, hüwante tüopa-a vün me jakke tamlak yang; hatüo yehahlak yang, hangjingne hatüo üjao ngohnang.

³⁵“Hüke Aaron hüyange Ihalante Taowe nangte lingne tampu khongkümpu nange lingtüoh; nyih nyit ngoiye nange iman phünne pha ne tamtüoh.

³⁶Hüyange ünu tantamlak jingne nyih jeih she nange mahu üpong ja toidopu ja ne phatüoh; tüo kaiye ünu wintampu pha ne ok. Tüowe wümjonga jaowe tamlak. Tüophei me tüopa üjao ne menge tamlak jingne olive minnga phei phowe tamtüoh.

³⁷Nyih nyit mongme nyih jeih she tüopa-a lingtüoh. Hüwante wümjonga lanshe jaolak, hüyange ütam-e yejema-a ülam jawe tüopate letma-a, tüopa jaowe shapu üngan wonge ütuh ne mengkülak.”

³⁸“Sha-a ngoikülak hipak khongkümpu me nyih jeih she wangpeng ni nyeeha ni ni wümjong me toidotüoh.

³⁹Nyeeha ja napning hüyange ülao japa-a ünpong me she toidotüoh.

⁴⁰Üwangpa nyeeha phei jam-e shemeipupa wheat ankhoih kilogram ja me jaoshepu olive minnga litre ja nyütyange dotüoh. Tüophei jam-e wuwüngti litre ja dopu ja ne shokke tamtüoh.

⁴¹Nishepupa nyeeha-a ünpong me toido tüoh, hüyange tüopa me-o ankhoih hei olive minnga, wuwüngti shomme yahpu shinne muh yahyange dotüoh. Tüolan-a Youngwanpa üjingne hahying dopu ne mengnang, hüyange tüopa üpeameipuwe üte mongmei ne tamnang.

⁴²Ngoikülak hipak khongkümpu jingne khümjing nyenok tafün shong me numan-e tüopa jakke dopu dolak yang. Tüoken me Taowe ü-kahtalan phei hüolak hüyange nang phei ngaolak.

⁴³Tüoken me Taowe Israel kahtalan phei hüolak, hüyange Tao ompu phihlangpu wangngaiye tüopa nyoi-a jaowe tamlak.

⁴⁴Taowe khümjing hüyange wümjong jaowe tamlak, hüyange Taowe Aaron hüyange Ihayimlan ngengpa ja ne ü-shaoshanlak jingne khatte anglak.

⁴⁵Tao Israel kahtalan yo me ngohlak, hüyange Taowa iman Kahwang ne ngohlak.

⁴⁶Hüyange iman-e Taowa iman Youngwanpa Kahwang she aowe iman phei ngohlak jingne Egypt kahtok mepu iman woipei tüowa Tao she shinglak. Taowa imanjing Kahwang Youngwanpa.