Read Konyak Naga WOITEI 3 Bible Online

WOITEI 3 - Konyak Naga bible

WOITEI 3

¹Sha-a aope Mosawe Midian ngengpa I küo Jethro nokjing mantoop yom-e ngoh yapeih, lye mantoop-a kahko yete teine tamyange, Horeb, Kahwang kahtangte leih ye.

²Tüoken phümtümp mepu vünloong ja me Youngwanpa shongmokpa I tangte ngai. Tüopa phümtümp me vünloongpu Mosawe nge hüpoi tüopa hah yeshu!

³Hüwante Mosawe i, “Hangne phümtümp-a hah yekümpu? Tao she-o she wenlakei, hüyange hatüo ngaipu üyongte leilakei.”

⁴Aope Youngwanpawe Mosa-a leilak jingne she-o she wenpu nge, phümtümp mepu Youngwanpawe Ite nyik hüyange i, “Mosa! Mosa!” lye jan, “Oi, tao tüome ngohnang.”

⁵Hüwante Kahwange i, “Tüome shaaji owe tahwen. Nang ya mepu yashom khoktüoh, hangjingne hanghe kahmük me nang yong nang hatüowa üjao nyoi ngoh nang.

⁶Iye üne-o i, Taowa nangjing pajeiyonglan Kahwang, Abraham Kahwang, Isaac Kahwang, hüyange Jacob Kahwang ngoh nang.” Tüokhei Mosawe yoi sheta jüo, hangjingne Kahwang te leilak jingne I nyam.

⁷Hüwante Youngwanpawe i, “Taowe ü-kahtalan Egypt kahtok me shaoshi yatengpu ngeteki; hüyange imante yemeipe jonpu mepu yinpha she iman üngwünpu Taowe jaiteki. Ütingme iman shanghah shaoshipu jeng khongküm Taowe shingnang.

⁸Tüokhei iman Egyptlan yak mepu yinlak, hüyange tüopa kahtok mepu woiye shemeipupa hüyange shekhaopupa kahmük ja hüke kahtok üyao hüyange wangman-e hahnyoi ngohpu kahmükte woiyeteilak jingne hüyange sha-a Kananlan, Hitlan, hüyange Amorlan, hei Perizzlan, hüyange Hivlan hei Jebuslan ngohpu kahtok te iman woiteilak jingne Tao pei.

⁹Israel hayimlan ne üngwünpu ü-tangte ngoiteki hüyange Egyptlan ne iman hanghe shaoshipuwe shaoshi ne tamnang, tüopa-o Taowe ngeteki.

¹⁰Tüokhei yayong tüoh, Taowe ü-kahtalan Israel hayim Egypt kahtok mepu woi teilak jingne Taowe nang Egypt ahngpa tangte shonlak.”

¹¹Hüpoi Mosawe Kahwangte hüke i, “Taowa minshing kahta ja ne-o yeje. Egypt kahtok mepu Israel lan woiteilak jingne ahngpa tangte tao hangke taiye oklak?”

¹²Kahwange jan-e i, “Tao nang phei ngohlak, hüyange aope nange kahtalan Egypt mepu yah ngailakei, nange üte tüopa kahtang me yoppe khümlak. Tüopa toiye hüopu kaiye Taowe nang shonyangki she shinglak.”

¹³Tüoyangpoi Mosawe Kahwangte jan-e i, “Tao Israellan tangte tai-e imante ‘Numan jing pajeiyonglan Kahwange tao numan tangte shon,’ she iwante, iman-e üte, ‘Ite hangke minpu?’ tongma-a, taowe imante hangke ilak?”

¹⁴Kahwange Mosate i, “Taowa Tao” Üne-o lye i, “Israel kahtalante tüo itüoh, ‘Taowe numan tangte Tao shonnang.’ ”

¹⁵Kahwange Mosate i, “Israellante hüke Youngwanpa, numanjing pajeiyonglan Kahwang, Abraham, Isaac, hüyange Jacob Kahwange numan tangte tao shon. Jintepu jingne ü-min-a tüokih hei ngohkülak; hatüo hüke ngoikülak jin üsheime üte nyiklak.

¹⁶Taitüoh hüyange Israel lwngmeilan jamshe shaijem tüoh hüyange imante itüoh hüke Tao Youngwanpa, imanjing pajeiyong Kahwang, Abraham, Isaac, hüyange Jacob Kahwang nang tangte ngai she itüoh. Imante itüoh, hüke Tao iman tangte pei hüyange Egypt lan-e imante hanghe ling, ngeteki she itüoh.

¹⁷Hüyange Taowe jan, Taowe numan Egypt me shanghah shaoshipu mepu Kananlan, Hitlan, Amorlan, Perizzlan, Hivlan, hüyange Jebuslan kahtok, hüyange düamyeng hei zahtai jelo yin-e ngohpu kahtok te woiteilak.”

¹⁸“Nange imante hanghe ilakei ü-kahtalan-e jaikülak. Tüokhei Egypt ahngpa tangte Israel woipalan phei nang tailak yang hüyange Ite itüoh, ‘Youngwanpa Hebrewlan Kahwang I nying nyingke toman tangte ngaiyangki. Sha-a toman Kahwang, Youngwanpa te toidopu phalak jingne wanwüng kahtok te nyih lüm mongme kem-e taine tomante tampha.’

¹⁹Ite kange lingne mantam mantam Egypt ahngpawe numante taine yetam külak-a Taowe shingnang.

²⁰Tüokhei Taowe ü-ünganwong jonlak hüyange iman kahtok me nyam nyam shepu toi linge tampu kaiye Taowe Egypt te shaoshi yateng ne tamlak. Tüophei me lye numan taine tampha lak.

²¹“Numan te Egyptlan-e wangshüm hüolak ne Taowe linge tamlak, tüo kaiye aope ü-kahtalan tailakei iman yakkeng me yetai lak.

²²Israel sheko lili yoi yupinyu Egyptlan tangte tailak hüyange yha nok me nyoi ngohpu Egyptlan sheko jajahi tangte tailak hüyange inkheklan jingne hüyange hon hei khüm juyük jingne tonglak. Hüke Israel lan-e tüolan-a iman hala yhalalan me yah ne tamlak, hüyange Egyptlan jing moth-a kiye tailak.”