Read Konyak Naga WOITEI 30 Bible Online

WOITEI 30 - Konyak Naga bible

WOITEI 30

¹“Sümuk-e dolak jingne nange acacia pee phei wümjong ja lingtüoh.

²Hatüowa üjük üpeam jakih-e ngohlak, üjükte yakkong ja, hüyange üpeamte yakkong ja, hüyange tüopa daopute yakkong ni ngohlak. Tüopa tepu üwonga üpe ja ne hei ngohlak.

³Ükao peli ütok khongkümpute, hüyange tüopa tepu üwongte jaoshepu honne lümtüoh, hüyange tüopa ünah neikon-e honne ünah lingtüoh.

⁴Tüopa pailak jingne hon shüptet ni lingtüoh hüyange tüolan-a sheam leyange pailak jingne üjeng moini yekao me satamtüoh.

⁵Tüolan sheam-a acacia pee phei lingtüoh tüolan te honne phowe tamtüoh.

⁶Tüopa wümjonga nange jiengjeppu ghonu sheshao me jhotyange ngohpu jhotnye ü-at me angtam tüoh. Ümeken me Tao nang phei hüolak ngohnang.

⁷Napjeih she aope vüntük tümtalak jingne Aaron peilakeih, üpe meipu sü Iye tüopa tangme jakke muklak.

⁸Aope ünpong me Aaron vüntük pahyalakeih lye hüke jakih-e muh linglak. Tüopa sümuk-e dopu ngoikülak hipak khongkümpu jingne yephünpe jonlak yang.

⁹Tüopa wümjong tangme yejao yeshapu sü hango, yinmok dopu hango, yejema-a hahying dopu yedolak yang; hüyange tüopa tangme nange wuwüngti hango tahshok tam.

¹⁰Wangpeng te ja me Aaron-e tüopa üwongte tantampu phümwüm lak. Ngoikülak jin khongkümpu me Iye tüopa-a tantampu yinmok iy-e ünu jao tampu linge, ünu jingne dolak yang. Hatüo-a Youngwanpa te loishe shejaopupa.”

¹¹Youngwanpawe Mosa te i,

¹²“Aope nange Israel kahtalan shangtoi ilakei, iman kahta lili-e yoi üyin jingne lanmee üte phalak; hümme nakshih aope shangtoi ilakei, hüwante Ite daktin hango yengoilak.

¹³Shangtoi ipu me ompu kahta lili-e itpu meitam ngin phalak wongpong; Üjao nyoi me itte sheampu shekel tangkhüw phalak yang. Kahta lili-e tüopa-a üte dopu ja ne phalak yang.

¹⁴Shangtoi ipu me omme iyangpu moilanne hüke wangpeng da ngoitephei hüyange tüotok tepu kahta lili-e tüopa meitam-a üte phalak yang.

¹⁵Aope numan-e numan üyin jingne Youngwanpate lanmee dopu yahpeilakeih, hakpawe shekel tangkhüw phei nyei-e sheyong she phalak ne-o yeje, hüyange toiha lan-e sheshoi she phalak ne-o yeje.

¹⁶Israel kahtalan mepu tüopa ünu lantampu ngin shaitüoh hüyange tüopa-a ü-khümjing nyenok paowe tükpu me jontüoh. Tüopa shangtoi ngin-a iman üyin shakpu nginne menglak, hüyange iman üyin yinne anglak jingne Taowe teih tüolak.”

¹⁷Youngwanpawe Mosa te i,

¹⁸“Nange shakphanyan yajenth phei shakphan yan yankhong ja lingtüoh. Khümjing nyenok hei wümjong nipa me tüopa-a angtüoh, hüyange tüo me yeng shokke angtüoh.

¹⁹Aaron hei I halan-e tüowe imanjing yak hei ya tuh pholak.

²⁰Aope iman nyenok-khümjing yejema-a aope iman vün phei Youngwanpate toidolak shaoshanlak jingne wümjong shongte owe peilakeih, iman-e yeng phei tuhpholak, hümme nakshih iman yelilak.

²¹Iman-e imanjing yak hei ya tuh poilak yang, hümme nakshih iman yelilak. Tüopa ngaokenga iman hüyange imanjing huhayimlan ne jin jintepu jingne jonlak.”

²²Üne-o Youngwanpawe Mosate i,

²³“Shemeipupa üpe meipulan yahtüoh; yingwangti üyeng shekel gho nga, hüyange wüngwük-e üpe mei-e pepu longkhok shekel tangkhüw, hatüo-a gho ni denga, hüyange bonggong shekel gho ni denga,

²⁴hüyange cassia üjao nyoi me tok-heipu shekel gho nga hüyange olive minnga litre peli püotüoh.

²⁵Hüyange nange üpe pelak lingpawe lingpu üpe ümei phei nyütyange üjaopa pholak minnga lingtüoh.

²⁶Tüopa yahyange nange khümjing nyenok hei jiengjeppu ghonu te pholak jingne.

²⁷Khao hüyange tüopa me jonne paipu toinan lili, vüntük yongjing hüyange tüopa me jonne paipu toinan,

²⁸hüyange jakke dopu wümjong tüomepu jonpaipu khongküm om-e, hüyange tüopa yonglak yankhong.

²⁹Tüolan toinan khongkümpu hüke jaowe tamtüoh, hüwante tüolan-a lanshe üjao ne menglak, hüyange ütam-e yejema-a ülam jawe tüolante letma-a, tüopa mepu ünganwong kaiye ütuh ne menglak.

³⁰Tüophei me Aaron hei Ihalante minnga phowe tamtüoh, hüyange ü-toishao me iman-e ngengpalanne phünne phawe tamtüoh.

³¹Israel kahtalante tüopa itüoh, ‘Tüopa üjaopa minnga phowe tampu toishao-a ü-shaoshanpu me ngoikülak jin khongkümpu me jontüoh.

³²Hatüowa kahta lili pümte yeshok tamlak yang, yejema-a tüopa lepu me teinyütte numan-e hango yelinglak yang. Hatüowa üjao ngohnang, hüyange numan-e hatüowa üjao toishao ja ne tükke jonlak yang.

³³Aohipawe tüopa le-pume nyütte linglakei, yejema-a aowe tüopawe ngengpa ne üjepu jate jonlakei, I-a shaaji ü-kahtalan yo me ye-omlak.’ ”

³⁴Hüyange Youngwanpawe Mosate i, “Nange üpe meipu stacte hei onycha, hüyange galbanum petilan ja kih kih-e hüyange jaoshepu sü yahtüoh.

³⁵Üpe meipu phei jamlak jingne sünyet jontüoh. Tüopa jaoweshawe hüyange üjaopa me anglak jingne hüm paowe nyüttüoh.

³⁶Tüopa mepu ütam yahyange shemeipupa nihphung ne menge khoi tüoh, khümjing nyenokte tüopa yahpei tüoh, hüyange jiengjeppu ghonu sheshao me shaitam tüoh. Tüopa sünyet-a lanshe üjaopa me jontüoh.

³⁷Numan jingne tüopa lepu me ülao sünyet lingne tüopa wanglam tah jon. Tüopa-a üte jaowe tampu üjao toishao ne jontüoh.

³⁸Kahta ütam-e toishao ütam tüopa lepu me üpe ümei ngailak jingne lingma-a, I-a ü-kahta yo mepu lang winlak.”