Read Konyak Naga WOITEI 31 Bible Online

WOITEI 31 - Konyak Naga bible

WOITEI 31

¹Youngwanpawe Mosate i,

²“Leihuyah, Uri üha, hüyange Hur ühu, Bezalel she minpu Judah nokphong mepu Taowe leteki;

³hüyange Taowe I-a Kahwang yahawe maawe tamnang; Taowe Ite okkeshangpu me, shingeokpu me, jaiye okpu me, hüyange khongküm yaowe okpu me,

⁴hon, khüm, hüyange shakphan yan-e okkeshange manyangpu toi linglak,

⁵yonglak jingne toinyu long tanglak, hüyange pee yaowe linglak jingne, hüyange yaowe lingpu toishao lili jingne Taowe Ite shinge oklak phateki.

⁶Hüyange leihu, Taowe I phei Ahisamach üha Dan nokphong mepu Oholiab leteki. Hüyange okkeshangpu mongjang üshei phei, iman-e Taowe nangte lingne tampu khongkümpu linglak jingne, Taowe imante hintamteki.

⁷Khümjing nyenok, ghonu, hüyange tüopa tangme ngohpu shüpshe shotjing, hüyange nyenok me toinan khongkümpu;

⁸hüyange khao hei tük-hei-sheng hüyange hon shaha pheipu vüntük yongjing hüyange itepu wongponglan khongkümpu, hüyange sünyet jakke dopu wümjong,

⁹hüyange tük-hei-sheng hüyange yengjon yankhong hüyange tüotepu yajenth,

¹⁰hüyange shemei yaomapuwe lingpu nyemolan, hüyange Aaron ngengpa jingne üjao nyemo, hüyange ngengpa toishao me shaoshanlak jingne Ihalan jingne nyemo;

¹¹hüyange pholak minnga, hüyange üjao nyoi jingne sünyet üpe meipu; tüolan khongkümpu Taowe nangte ngaophapu kih-e iman-e khongkümpu linglak yang”.

¹²Youngwanpawe Mosate i,

¹³“Nange Israel kahtalan te hüke itüoh; ‘Sabbath, Tao toloimeipu nyih nyüowe nyoilak yang; hangjingne hatüowa ngoikülak hipak khongkümpu me Tao Youngwanpawe ü-kahtalanne menglak jingne numan lingyangki she hüolak jingne Tao hei numan nipa me hatüowa yepinlakpa ne menglak.

¹⁴Numan-e Sabbath toloimeiye nyoilak yang, hangjingne numan aohipawe tüopa nyih jaowe ye-angpe tüopa nyih me toi linglakei, I-a li ne tamlak.

¹⁵Numan-e yoi toishao linglak jingne nyih wok ngohnang, hüpoi nyit shepupa nyih-a üte jaowe tam-e yihnoonlak nyih ngoh nang. Aohipawe tüopa nyih toi ülamja nehoi linglakei, I-a li ne tamlak yang.

¹⁶Tüojing ne Israel kahtalan-e Sabbath nyih-a jiengjeppu füo nyih ne jinte jonlak yang.

¹⁷Hatüowa Tao hüyange Israel kahtalan nipa me jintepu jingne füo ja ngohnang; hangjingne nyih wok mongme Tao, Youngwanpawe wangdang hüyange kahtoknyu linge ngai, hüyange nyit shepupa nyih me Taowe toi lingpu lak hüyange toloimei.’ ”

¹⁸Aope Sinai kahtang me Kahwange Mosa phei ngaowe sho, Kahwange yoi yaklanne nyanpu ngaokhüm longsheng khüo ni lye Mosate pha.