Read Konyak Naga WOITEI 32 Bible Online

WOITEI 32 - Konyak Naga bible

WOITEI 32

¹Aope kahtalanne Mosa kahtang mepu yelak shonteki she ngeye ok, kahtalanne iman nying nyingke jamshe Aaron tang te jem-e Ite i, “Hüla, toman shaote kemlak tomante kahwanglan lingpha; hangjingne tüopa Mosa aowe toman Egypt kahtok mepu yahyange woiye pei, I hangne mengyapeih toman-e yeshing ok.”

²Hüyange Aaron-e imante i, “Numan shekolan, numan hayim hei yhalalan na mepu hon shüptetlan yahtüoh, hüyange tüolan ü-tangte yah peikei.”

³Tüokhei kahta lili-e yoi me ngohpu hon naju yahyange Aaron tangte yah-e pei.

⁴Hüyange lye iman yak mepu hatüo yah, hüyange tüopa yaowe lingpa toinanne tüopa linge mahu üpong ja shokke lingengai; hüyange iman-e i, “O Israel, hatüowa teman kahwang aowe teman Egypt kahtok mepu woipei!”

⁵Tüophei me hon mahu üpong sheshao me Aaron-e wümjong ja ling, hüyange hüke shingne tam, “Youngwanpa te yihnoonlak jingne ngainyih moja ngohlak.”

⁶Üne nap shomme iman-e yinmok ütam jakke toidolak jingne hüyange ülaolan-a shüppe jempu dopu ne hahlak jingne yahpei. Mo hahlak jingne kahtalan shot, hüyange hatüowa jokke ngawe yingpu hüyange nuwekshakpu mo ja ne meng.

⁷Youngwanpawe Mosate “Mamshe yutüoh! Hangjingne nang kahtalan, aoyin nange Egypt kahtok mepu yahngai, yeshuyemeipe lingteki.

⁸Taowe imante hanghe ngaowetam tüo mepu iman mamshe lüp yeteki hüyange iman jingne mahu üpong moung howe lingteki. Iman-e tüopate khuhtawe khüm hüyange toidopu pha-e hüke inang: ‘O Israel, tüolan-a numan jing kahwanglan, aoheye numan Egypt mepu woi ngai!’ ”

⁹Youngwanpawe Mosate i, “Hatüo kahtalan hangshin üngei ne meng Taowe ngeteki.

¹⁰Sha-a ü-shaha tüohtüoh, hümme nakshih ü-mongshih ngaipu iman kaiye loonglak, hüyange aowe iman hahshulak; tüophei me Taowe nanga jatnyu ne lingtamlak.”

¹¹Hüpoi Mosawe yoi Kahwang Youngwanpate yoppetowe i, “Youngwanpa, nang kahtalan aoyin nange nang üngan wong üyong hüyange wongnangpu yak kaiye Egypt kahtok mepu yah ngaiye woitei, iman phei tüi-e hangne nang mongshih ngai nangki?

¹²Hüke nange nang kahtalan kahtang me iman toiwinlak tümyange hüyange iman lanshe mahtamlak jingne tümyange Egypt kahtok mepu yah ngaiyangpu yang she, hangne Egyptlante ngaone tamlak shi? Nang nyamlakpa ne mongshih ngaipu mepu laktüoh; hüyange nang kahtalan te ümeng linglak jingne ngohpu mepu nang juteih jeileitüoh.

¹³Nang shaoshanpa Abraham, Isaac, hüyange Jacob imante nange nang nying nyingke jiengjeppe ngaopu tüopa teihtüoyah, ‘Wangdang shanhalanke Taowe nang hu nangha jaluntamlak, hüyange Taowe tüopa kahtok jeng ngaopu khongkümpu nangte yahpha ning, hüyange hatüo jin jintepu jingne iman-e mothleilak.’ ”

¹⁴Tüokhei Youngwanpawe yoi kahtalante yemeipe linglak she teihpu phei nyamshaopu mepu yoi juteih jeilei.

¹⁵Tüophei me Mosa lüp hüyange longsheng khüo ni moini yekao me Ngaokhümlan nyanyangpu paiyange kahtang mepu leihye.

¹⁶Longshenga Kahwang I toishao ne ngohyangki hüyange tüolan tangme ngaokhüm lanna watte nyanyangki.

¹⁷Aope kahtalanne üngwünpu hei moppu ngaowüng Joshua jaiyapeih, lye Mosate i, “Lakjing kenme shapju ngaowüng taowe jainangki.”

¹⁸Hüpoi Mosawe jan, “Ngaowüng hatüowa okpu jingne üngwünpu ngaowüng yeje, yejema-a ngaowüng hatüowa ye-okpu ngeyange moppu ngaowüngo yeje, hüpoi hatüowa hemlokpulan ngaowüng taowe jainang.”

¹⁹Aope Mosa lakjing shongte owe wen, hüyange mahu üpong hei kahtalan polokpu ngeyapeih, I yeonge ümengpa me mongshih ngai. Tüoken kahtang yashong me lye paiyange ngohpu longsheng ni-a lye shüppe tai hüyange tüolan-a paitam.

²⁰Hüyange iman-e lingpu mahu üponga lye yahpuwe vün me jak, hüyange hatüo nihphung ne khoihyange yengtang me shai tamyange lye Israel kahtalante yingne tam.

²¹Mosawe Aaronte i, “Nange tüolan kahtate ünu teshinne kiyetamlak ne, iman-e nangte hanghe lingpu?”

²²Hüyange Aaron-e janne i, “Ü-nokpu, mongshih meiyange/loonge tahngaikei; hatüo kahtalan hangshin yemeipe ngohnang hatüo nange nang nying nyingke shingnang.

²³Iman-e üte i, ‘Toman shaote tailak tomante Kahwanglan lingtam pha, hangjingne hatüo Mosa, aowe toman Egypt kahtok mepu yahngaiye woiye pei, I hanghe ne meng toman-e yeshing ok.’

²⁴Tüokhei taowe imante i, ‘Aoyin me hon ngoh, yah ngaitüoh’; hüyange iman-e tüolan-a üte phayangki. Taowe vünte shüp hüyange tüo mepu tüopa mahu üpong ngaiyangki!”

²⁵Hüyange Aaron-e kahtalan tükpu ye-okpe lüowe taine tam hüyange iman nying nyingke imanjing wepalan sheshao me üngapa ne linge tam she Mosawe nge ok.

²⁶Tüokhei I lakjing peten pongme yong hüyange üngwünne tam, “Ao Youngwanpa yekao me ngohnang tüopa me peikei!” Hüwante Levilan khongkümpu I neikonne jem;

²⁷hüyange lye imante i, “Hüke Youngwanpa Israel Kahwange inang, kahta liliye yoi yanglow leapyange lakjing kaiye peten jaye mepu peten jaye ngoiye taitüoh hüyange yoi jeiheinaolan, yoi shümpalan hüyange yoi yupilan toitüoh.”

²⁸Levilan-e Mosa ngao jai hüyange tüonyih kahta haja lüm nanjing toi.

²⁹Mosawe Levilante i, “Tenyih numan nying nyingke numan jing ha-naolan hüyange jeiheinaolan toiyange Youngwanpa shaoshanpu me ngengpa ja ne leye jaowe tamteki; tüokhei Youngwanpawe numante yoi moiman phateki.”

³⁰Üne nyih Mosawe kahtalante i, “Numan-e nyam nyam shepu ünu omyangki; tüoyangpoi sha-a tao nishe Youngwanpa kahtangte ongshih nüng; aoweshing, numan jingne ünu wintampu ngao taowe tüone ok.”

³¹Tüokhei Mosa Youngwanpa tangte leihye hüyange i, “Tüolan kahtalanne nyam nyamshepu ünu omteki. Iman-e hon yahpuwe kahwangne ling hüyange tüopate yoppe khümteki.

³²Hüpoi sha-a, chingmei lamlinge iman ünu wintam shih; nange hüke yewintam okne ima-a, hüma-a hanghepa laitep me nange nang kahtalan min nyanyangki tüomepu ü-min yah teitüoh.”

³³Tüopoi Youngwanpawe jan-e i, “Aoyinne ü-phei tüi-e ünu omyangki, tüolan jing min ü-laitep mepu Taowe phutte winlak.

³⁴Sha-a yetüoh, Taowe nangte ipu nyoite kahtalan woitüoh. Teih tüoyah hüke ü-shongmokpawe nang lam woilak, hüpoi tüolan kahtalante Taowe iman ünu jingne shaoshi ne tamlak hipak peiküki.”

³⁵Tüokhei Youngwanpawe kahtalante daktin shon, hangjingne ima-a hon mahu üpong linglak jingne iman-e Aaronte kang.