Read Konyak Naga WOITEI 33 Bible Online

WOITEI 33 - Konyak Naga bible

WOITEI 33

¹Youngwanpawe Mosate i, “Nang hüyange Egypt kahtok mepu nange woiye peipu kahtalan-e tüopa nyoi tüotüoh, hüyange Taowe Abraham, Isaac, hei Jacob hüyange imanjing huhayimlante phalak jingne janpu kahtokte taitüoh.

²Nang shaote wangdang shongmokpa Taowe shonlak; hüyange Kananlan, Amorlan, Hitlan, Perizzlan, Hivitlan, hüyange Jebuslan Taowe jange teilak.

³Düamyeng hei zahtai jelo yünne ngohpu kahmükte taitüoh. Hüpoi numan üngei kahtalanne mengpu jingne, Taowe numan lamnyu me mah tam-e ngohyalak yangshe, Tao numan phei ye-onglak.”

⁴Aope kahtalan-e tüopa ngaolan ümeng jai, iman yoonge shap; hüyange kahta aowe-o yoi juyük yeyah.

⁵Youngwanpawe Mosate hüke ilak jingne ngaokeng pha, “Numan-a kahta üngeilan ngohnang. Üten japu mongme nehoi tao numan phei taine ngaima-a, Taowe numan lanshe mahtam ne ngohkülak. Sha-a numan jing juyük khoktüoh, hüyange Taowe numante hanghe linglak ü-nying nyingke teihlak.”

⁶Tüokhei Israellan-e Horeb kahtang me pei-e iman nying nyingke iman jing juyük khok-e tüoh.

⁷Sha-a hangke tingme Israel kahtalanne lakjing lingya lakei, Mosawe nyenok yahlak hüyange lakjing mepu shejai she linglak. Tüopate Youngwanpa ompu Khümjing Nyenok she Iye nyik; hüyange aoyinne Youngwanpate lamphe li jingne tonghu yapeih I-a tüopa nyoite peiye tonglak.

⁸Hangke tingme tüopa nyoite Mosa onglakeih, kahtalan-a imanjing nyenok tafün shongme yonglak hüyange Mosa ümongte manong manong lei ngohlak.

⁹Nyenok mongte Mosa ongyang phei me, wangphom shongnyu yulak, hüyange nyenok tafün shong me ngohlak, hüyange Youngwanpawe Mosate wangphom mepu ngaolak.

¹⁰Aope kahta lili-e nyenok tafün shongme wangphom shongnyu ngelakei kahta lili yonglak hüyange moilan-e yoi yoi nyenok tafün shongme khuhta-e khümlak.

¹¹Youngwanpawe Mosa phei kahta jawe yoi shümpa phei ngaopu kih-e sheta teihaowe ngaolak. Tüophei me Mosa-a lakjingte leih yelak. Hüpoi Nun üha Joshua aohipa naoshe Ite teijampa ne ngoh, I-a nyenok me ngohlak.

¹²Mosawe Youngwanpate i, “Leitüoh, nange üte inang, ‘Tüolan kahta woitei tüoh;’ hüpoi ü-phei ao shonlak tüopa-a nange üte ye-i. Tüoyangpoi nange i, ‘Taowe nang min shingnang, hüyange üte nange mong hahpu tüoteki.’

¹³Tüokhei sha-a, taowe nangte yoppe tongnang, nang sheshao me taowe monghahpu tüopune mengma-a, hüke monghahpu tüolak jingne, hüyange taowe nang shinglak jingne, sha-a nang lamnyulan üte hüopha. Hüyange tüopa jat-a nangjing jat she teih tüoyah.”

¹⁴Youngwanpawe i, “Tao nang phei jam-e tailak, hüyange Taowe nangte toloimei phalak.”

¹⁵Mosawe jan-e i, “Nang toman phei jam-e yetaine ima-a, tüopa nyoi mepu toman yanne tah tampha.

¹⁶Nang toman phei jam-e yetaima-a, hangke aowe nange nang kahtalan hüyange üte monghah nangki she shinglak? Toman phei nang omme ngohpu kaiye kahtoknyu ülao kahtalan phei toman yoi yoi ne hüolak.”

¹⁷Hüyange Youngwanpawe Mosate i, “Nange iyangpu kih-e Taowe khakshuwe linglak, hangjingne Taowe nang mei meiye shingnang hüyange Taowe nangte monghah nang.”

¹⁸Mosawe tonge i, “Chingmei lamlinge nang ompu phihlangpu wangngai taowe ngene tam pha.”

¹⁹Hüyange Youngwanpawe jan-e i, “Tao meipu khongkümpu nang sheshao me ngene tampha ning, hüyange nang sheshao me Youngwanpa Ü-üjaopa min shingne tampha ning. Taowa Youngwanpa, hüyange aoyin kahtalan Taowe leyangki, imante Taowe yayeng shüpsheye teihpu hüolak.

²⁰Hüpoi Iye i, Taowe nangte ü-sheta ngene yetam phalak hangjingne, kahtawe Tao ngeyange üyin ngohpu ye-oklak;”

²¹Youngwanpawe yelakpe i, “Ü-tokphei yeme nyoi jing ja ngohnang, tüoken me nang longnyu tangme yongpu oklak.

²²Hüpoi aope Tao ompu phihlangpu wangngai linne tailakei, Taowe nanga longnyu eampa me ange tamlak hüyange Tao linne mantai mantai ü-yakke nangte büangyange anglak.

²³Tüophei me Taowe ü-yak yah teilak, hüwante nange ü-sheta yeje hüpoi tokphei ye ngelak.”