Read Konyak Naga WOITEI 34 Bible Online

WOITEI 34 - Konyak Naga bible

WOITEI 34

¹Youngwanpawe Mosate i, “Üwangpa kih-e longsheng khüo ni tangtüoh, hüyange üwangpa nange menge winpu longsheng tangme ngohpu ngaoyin-a Taowe tüopa me nyanlakei.

²Ngainap tümme tayah hüyange Sinai kahtang te ongkei, hüyange tüome kahtang shedaopupa me ü-phei hüokei.

³Hüyange kahta ao-o nang phei ye-onglak yang; yejema-a kahtang me hanghe me-o aowe-o nge ne yetamlak yang; yejema-a kahtang yashong me nyee yejema-a mahu ükhong hanghete-o heei uh ne yetamlak yang.”

⁴Tüokhei Mosawe üwangpa kih-e longsheng khüo ni tange yah; hüyange Youngwanpawe Ite ngaowe tampu kih-e ünenap shomme Sinai kahtang te tüolan paiyange ong.

⁵Youngwanpa wangphom me yuwe tüoken me I phei yong, hüyange I üjaopa min Youngwanpa shingne tam.

⁶Youngwanpa I sheshao me lintai, hüyange pongetam; “Youngwanpa, Youngwanpa-a yayeng shüpshe hüyange nyakkenpu pheipu Kahwang, mongshih ngaine monglaowe, hüyange yeonge yonge kenpu hei monghümpu,

⁷jin haja jingne kenpu hüyange monghümpu ange, nushakpu hei kaiye taipu hüyange ünu-a wintamnang hüpoi iman nyupalan ünu ümeng jingne hayim hei huhayimlan jin lüm hei peli ngoiye shaoshi tamlak mepu yeshailak.”

⁸Hüyange Mosawe mamshe kahtokte I sheta khuhta, hüyange khüm.

⁹Hüyange lye i, “Sha-a, nang sheshao me taowe yayeng shüpshe tüopu ne mengma-a, O Youngwanpa, taowe yoppe tongnang, Youngwanpa toman phei taine tamtüoh; hatüowa üngei kahtalan ne mengpoi toman ünu ümeng wintampha, hüyange toman-a nang mothleipalan-e mengtam pha.”

¹⁰Youngwanpawe Mosate i, “Leihuyah, Taowe sha-a Israel kahtalan phei jiengjeppu ja lingnang. Iman sheshao me kahtoknyu ümeken me-o hüyange ao jatlan me-o manlingpu toinyu üyong Taowe linglak. Tao Youngwanpawe hanghe toinyu üyong linglakei kahta lili ngelak, hangjingne Taowe numan phei nyamlakpa toishao linglak.”

¹¹“Taowe nangte phapu ngaokhümlan jontüoh. Numan ngoipu phei jam jamshe Taowe Amorlan, Kananlan, Hitlan, Perizzlan Hivitlan hüyange Jebuslan jange teilak.

¹²Hanghe kahmük te numan tainang tüopa kahmük mepu kahtalan phei teijanpu hango tahyah, hangjingne hatüowa numan jingne lilakpa tün ja ne mengkülak.

¹³Hüleima, imanjing wümjonglan khüoh tamtüoh, imanjing üjao shongnyulan menge tamtüoh, hüyange imanjing Asherah kahwanglan peshaolan lange wintam tüoh.

¹⁴“Ülao Kahwang hanghete-o tahyop tahkhüm, hangjingne Tao, Youngwanpawe hokke weye yongpute nünne yengohlak.

¹⁵Kahmük mepu kahtalan phei chingmei hango tahling, hangjingne aope iman-e imanjing ülao jat kahwanglan te yoppe khümlak hüyange tüolante toidolak iman-e numante iman phei omkei she nyik phalak, hüyange imanjing kahwanglan te dopu hahying hahlak jingne numante tok phalak.

¹⁶Numan jing hayimlanne ülao jat shekolan yahne ngaikülak, hangheye imante üte üting yelak lakne woilak hüyange imanjing ülao kahwanglan te yoppe khümne ngailak.

¹⁷“Numan-e yan phei kahwanglan tahling.

¹⁸“Do yenyütpu an mo nange motüoh. Taowe nangte ngaokeng phapu kih-e Ahib leat me nyih nyit mongme do yenyütpu an hahtüoh, hangjingne tüopa leat me numan-e Egypt kahtok tüohyange yayong yangki.”

¹⁹“Üwangne puhpu netan ha lili hüyange tampu yinmoklan üwangne puhpu üpong lili-a üjing;

²⁰hüpoi nange üwangne puhpu gado ühalanna tüopa nanleiye nyee ha ja doyange shakke yelak yang. Nange tüopa shakke üyepu ne mengma-a nange tüopa üngwaan phakke tamlak yang. Üwangne puhpu netan nahalan lili shakke yetüoh.” “Yakkeng me ao-o ü-sheshao me peine ye-ok.”

²¹“Nyihwok mongme numan-e toi lingtüoh, hüpoi nyit shepupa me nange toloi meitüoh; kah hokwante jeyah hüyange tah yahwante jeyah nange toloimeilak yang.”

²²“Numan jing üwangne lickpu wheat tah yahne ükong wangwante, tahyah mo ngohtüoh, hüyange aope numan-e numan jing pelick khailakei, laojee hipak me pemsheam mo ngohtüoh.

²³Wangpeng te lüm me numan netanlan khongkümpuwe Israel Kahwang, Youngwanpa üte yoppe khümlak jingne peilak yang.

²⁴Numan sheshao me jatlan Taowe jange teiyang phei me hüyange numan jing yikeng khaowe tamyang phei me, tüopa mo lüm ngohpu mongme aowe-o numan kahtok chinghah ne yenganglak.”

²⁵“Numan-e üte yinmok toido wante dophei nyütyangpu an phei tahdo. Lintaipu Mo me toipu yinmok üjeng ja nehoi ünepu nap ngoiye tah ang.”

²⁶“Numan kahtok tepu üwangne shemeipupa ne ngaipu ülick numan Kahwang Youngwanpa nokte yahpeilak yang. Numan-e ünyu düam phei younha tahyang/tahhong.”

²⁷Youngwanpawe, Mosate i, “Tüolan ngao nyantüoh; hangjingne tüolan ngao me Taowe nang phei hüyange Israel phei jiengjeppu lingyangki.”

²⁸Mosa tüoken me Youngwanpa phei nyih deli hüyange pha deli ngoiye hango yehah hüyange yeyingpe nyoi ngoh. Hüyange Iye longsheng me jiengjeppu ngaolan-ngaokhüm pen nyan.

²⁹Aope Mosa Sinai kahtang mepu ngaokhüm pen paiyange leih ye, I sheta-a müktishiwapu phei hangjingne ima-a, I Youngwanpa phei teingaowe ngohyangpu jingne ngoh: hüpoi Iye hatüo shinge yengoh.

³⁰Aaron hüyange ülao kahtalan khongkümpuwe Mosate lei hüyange I sheta-a müktishiwa-e ngohpu iman-e nge, hüyange I shongte owe wenlak jingne iman nyam.

³¹Hüpoi Mosawe imante nyik, hüwante Aaron hüyange ükhong woipalan üshei, I tangte leihye; hüyange Mosawe iman phei ngao.

³²Tüophei me Israel kahtalan khongkümpu owe wen, hüyange Sinai kahtang me Youngwanpawe Ite ngaokhüm me phapu kih-e, I phei ngaopu khongkümpu lye imante pha.

³³Aope Mosawe imanphei ngaopu lak, Iye yoi sheta shanglümkhek phei büang.

³⁴Hangkih tingme Youngwanpa phei ngaolak jingne khümjing nyenok te Mosa onglakeih, Iye shanglüm khek-a khokke tüoh. Aope I nokshaote yuyapeih, Ite ngaone tampu khongkümpu Israel kahtalante ngaowe tam.

³⁵Hüyange I sheta müktishiwapu phei iman-e nge. Tüophei me Youngwanpa phei ngaolak jingne I nishe manye manye Mosawe shanglüm khek-e yüoh.