Read Konyak Naga WOITEI 35 Bible Online

WOITEI 35 - Konyak Naga bible

WOITEI 35

¹Mosawe Israel hayim ükhong nopu moilan jam-e jemlak jingne nyik, hüyange imante i, “Hatüolan numan-e linge jonlak jingne Youngwanpawe ngao phanang:

²Numan-e yoi toishao linglak jingne nyih wok ngohnang, hüpoi nyit shepupa nyih-a üjao nyih, Youngwanpa üte jaowe tam-e lahnyik mongkowe toloimeipu nyih ne menglak. Kahta ütam-e tüopa nyih me toi ülam ja nehoi lingma-a, I-a li ne tamlak.

³Sabbath me numan noksalan me vün nehoi tah jak.”

⁴Mosawe Israel kahtalan khongkümpu te i, “Youngwanpawe numante ngaopha puwa hatüo ngohnang:

⁵Youngwanpate dopu ja pha tüoh. Aoyinne hüke dohuwe teihyapeih moilan-e dopu yah peitüoh, hüke hon, khüm, yejema-a shakphan yan;

⁶shemeipupa pengkhai, wanghüng, phutti, hüyange mattak; youn min phei lingpu inkhek;

⁷taakke yanti yangphei nyee sho; shemeipupa meisho, acacia pee;

⁸vüntük jingne minnga, minnga pholak jingne üpe meipulan, hüyange wüngwükke pelak jingne sünyet;

⁹onyz long hüyange ngengpa phakshaoh me yahlak jingne hüyange I jing mongkhüp me yahlak ülao juyük peitüoh.

¹⁰“Hüyange numan yo me manyange aijonpu kahtalan peiye Youngwanpawe lingne tampu toi khongkümpu lingtüoh.

¹¹Khümjing nyenok, tüopa me shonglak, hüyange ütok me yüohlak, yankoklan hei pelaolan, wenaolan, shonglan, hüyange yajenthlan;

¹²jiengjeppu ghonu, tüopatepu sheamlan, hei shüpshe shotjing, hüyange büangpu jhotnye;

¹³Khao, tüopatepu sheam, hüyange toinan lili; Kahwangte dopu an;

¹⁴wangngai jingne vüntük yongjing hüyange tüotepu toinan, minga tümyang phei vüntüklan;

¹⁵sünyet jaklak wümjong hüyange tüotepu sheamlan; pholak minnga; wüngwükke pepu sünyet, khümjing nyenok nokshaoye jingne jhotnye;

¹⁶jakke dopu phalak wümjong, tüopa me shakphan yan phüotang khümyange tüotepu sheamlan, hüyange tüotepu toinan lili phei; yengjonlak yankhong hei tüopa mepu yajenth;

¹⁷gho nyoi jingne jhotnye, tüopa tepu shonglan hei yajenthlan; ghonyoi nokshaoye jingne jhotnye;

¹⁸khümjing nyenok tepu ghonyoi jingne hanlag hei wu;

¹⁹hüyange aope iman-e üjao nyoi me shaoshan lakei hüwante ngengpalanne yahlak manyange takke shüngyang phei nyemo-Aaron ngengpa hüyange Ihalan jingne jaowe sayang phei inkheklan tümlak yang.”

²⁰Tüophei me Israel kahtalan khongküm Mosa sheshao mepu yanne tai.

²¹Hüyange kahta lili-e yoi mongjang me henge tampu hüyange yoi yahawe henge tampu lili-e khümjing nyenok toishao jingne, hüyange tüopa toishao khongkümpu jingne, hüyange üjao oleng jingne, Youngwanpa tangte dopu yahpei.

²²Hüyange netan hei sheko hangshinne mongjang me monge ngoh, iman pei, hüyange jupeng pheipu huhwinlak, naju, min takyangpu shüptet, yük, hüyange hon juyük khongkümpu; hüyange kahta lili-e tüolan-a Youngwanpa te jaowe tam.

²³Hüyange kahta lili-e aoyin yak me pengkhai; wanghüng, phutti, yejema-a mattak; youn min pheipu inkhek; taakke yanti yangphei nyee üsho; yejema-a shemeipupa meisho tüolan yahpei.

²⁴Kahta lili-e aowe hon hüyange shakphan yanne dopu okke ngoh, iman-e Youngwanpate dopu yahpei; hüyange kahta aoyin yak me tüopa toishao jingne acacia ngoh, tüopa yahpei.

²⁵Hüyange manneyangpu sheko lili-e yoi yakke ve pheak, hüyange iman-e pheakpu wanghüng, phutti, mattak hüyange pengkhai ünyak yahpei.

²⁶Iman-e üne-o youn min phei-o ve linge ngai.

²⁷Hüyange woipalan-e üjao ngengpa phakshaoh hüyange mongkhüp me anglak jingne onyz hüyange toinyu long yah pei;

²⁸hüyange üpe meipu hei vüntük jingne minnga, pholak jingne minnga, hüyange üpe ümei jingne sünyet yahpei.

²⁹Israel kahtalan khongkümpuwe mongloong dopu Youngwanpa tangte yahpei; Youngwanpawe Mosa yakke linglak jingne ngaophapu kih-e, yoi mongjang me hengtampu netan hüyange sheko lili-e toishao lili tepu jingne shaijem.

³⁰Hüyange Mosawe Israel lante i, “Leihuyah, Judah nokphong mepu, Hur Ihu, tüopa Uri üha min Bezalel, Youngwanpawe leteki;

³¹hüyange I me Kahwange Yaha Üjaowe maawe tamteki, okkeshangpu me, nyinghapu me, jai okpu me, hüyange aimanpa toishao üshei me,

³²manyange ülam linglak me, hon hei khüm hüyange shakphan yan phei,

³³hüyange toinyu long tangpu me, hüyange pee phei yaopu toi me, hüyange manneyange ailingpu toishao üshei jingne!

³⁴Hüyange Iye I hüyange Dan nokphong mepu Ahisamach üha Oholiab, imni moini nyüowe oklak ne I mongjang me hengpu üngan pha.

³⁵Manneyange toi üyong linglak, khüo-e lingpu toi, aipawe jonpu toi hüyange wanghüng, hüyange phutti, mattak hüyange pengkhai ve ünyak-e awfa yantak inne lingpu toi hüyange ülao inkhek toi, toi üyong ülam maawe lingpalan, tüolan toi linglak Iye imante manneyangpu phateki.