Read Konyak Naga WOITEI 36 Bible Online

WOITEI 36 - Konyak Naga bible

WOITEI 36

¹Hüyange Youngwanpawe ngao phapu kih-e, khümjing lingpu toishao khongküm hangke linglak tüopa shinge okkeshange hüyange nyingha ngohpalan phei Bezalel hei Oholiab niye linglak.”

²Hüyange Mosawe Bezalel hei Oholiab, hüyange lingeyah okpu kahta aoyinte Youngwanpawe okkeshangpu juteih pha, hüyange kahta lili tüopa toishaote peiye linglak yoi mongjang te henge tampulan nyik.

³Hüyange Israel hayimlanne Khümjing toishao linglak jingne yahpeipu dopu khongkümpu Mosa mepu iman-e yah. Hüpoi Israel kahtalan-e Mosa tangte yelakpe napjeih she iman mepu dopulan yahpei.

⁴Hüwante okkeshange aimanpalan aoyinne tüopa toishao me ngoh,

⁵peipuwe Mosate i, “Youngwanpawe lingne tampu toishaolan jingne wongpong ne mengpu phei shenyei she kahtalan-e yah peiteki.”

⁶Tüokhei Mosawe ngaokhüm ja pha, hüyange iman-e tüopa-a lakjingken khongküm pume ponge i, “Netan hüyange sheko aowe-o shaaji khümjing jingne dopu tahjem.” Tüokhei kahtalan-e yah-e peipu mepu tien;

⁷hangjingne iman-e hangshin shaijem yangki tüolan nehoi linglak toishao lili linge shoyange nehoi nyeiye peiyangpu ngoh yangki.

⁸Hüyange okkeshange manneyange toi lingpalan yo mepu ütahpalan-e Khümjing Nyenok-a weyangki. Iman-e tüopa-a shemeipupa pengkhai wanghüng, phutti, hei mattak phei takpu üpha pen phei hüyange awfa yantak inyange cherubim phei ling.

⁹Jhotnye üpha lan-a moilan jakih-e üjükte yakkong da metet hüyange üpeam te yakkong peli li ngohlak.

¹⁰Hüyange iman-e jhotnye üpha nga-a üjep ja ne shüng; hüyange ülao jhotnye nga-a hüke muh üjep ja ne shüng.

¹¹Hüyange iman-e jhotnye üwangpa ü-atye moilan üjeng ye me wanghüng khek phei üpaklan ling. Hüke muh iman-e nishepupa jhotnye üjeng ye me üpaklan ling.

¹²Iman-e üwangpa üphate üwangpa üjep me üpaklan denga sha hüyange nishepupa üpha tepu üjep phei teihaowe üpaklan denga sha.

¹³Üjep ni-a üpha ja ne shünge yahlak jingne iman-e hon yankok denga ling; tüokhei khümjinga ja ne meng.

¹⁴Tüophei me youn min phei lingpu khek üpha pen me ja phei iman-e Khümjing nyenok ütok me küplak jingne ling.

¹⁵Iman-e tüolan khongkümpuwa ja kih-e üjükte yakkong delüm hüyange üpeamte yakkong peli ling.

¹⁶iman-e üpha nga-a ja ne hüyange ülao wok-a üjep ja ne shüng.

¹⁷Iman-e üjep jatepu ükümpa üpha ünah yeme üpaklan denga hüyange japa üjep ünahye me üpaklan denga sha.

¹⁸Iman-e üjep ni-a ja ne mengyange shonglak ne linglak jingne shünge yahne shakphan yan yankok denga ling.

¹⁹Iman-e shonglak üne-o ni ngoiye ling, ja-a nyee sho taakke tiyange hüyange japa-a shemeipupa meisho phei ü-at ye me shonglak jingne ling.

²⁰Iman-e Khümjing nyenok ütangye me yahlak jingne acacia pee phei pelao ling.

²¹Pelao lili laopute yakkong pen, hüyange pelao lili khaopute yakkong ja phei me tangkhüw.

²²Pelao lili me hüppu oklak ne üphat nini lingyange hüke khümjing nyenok pelao khongkümpu jingne iman-e ling.

²³Iman-e hüke heyekao jingne pelao üsho da ling;

²⁴hüyange tüolan me yahlak jingne khüm yajenth deli, pelao ja me üphat nipong ngohpu me yahlak jingne yajenth nipong.

²⁵Iman-e khümjing nyenok apyekao jingne pelao da ling;

²⁶hüyange pelao ja ja me nipong onglak jingne khüm yajenth deli ling.

²⁷Hüyange khümjing nyenok tokphei ye, henyip yekao jingne iman-e pelao wok,

²⁸hüyange ünuk ni jingne pelao ni ling.

²⁹Ünuk me yahpu pelaolan-a yashong yeme hüp, hüyange ütang ngoiye khongkümpu hüppe in. Hüke ünuk ni ngaiye tampu pelao ni-a hüppe ling.

³⁰Tüokhei pelao tet hüyange pelao ja me nipong onglak jingne khüm yajenth pen me wok ngoh.

³¹Hüyange iman-e acacia pee phei peilei wenao pen me nga ling, nga-a khümjing nyenok ükao ja jingne,

³²nga-a jayekao pelao jingne hüyange nga-a henyipye tokphei ye pelao jingne ling.

³³Üwopa peilei wenao-a pelao wosat ngoiye khümjing nyenok jaye üjeng mepu jaye üjeng ngoiye sha.

³⁴Iman-e pelaolante honne pho hüyange peilei wenao lan tüklak jingne hon shüptet-e sha, tüolan me-o honne muh pho.

³⁵Iman-e jhotnye-a shemeipupa pengkhai wanghüng, phutti, hüyange mattak phei takpu hüyange cherubim awfa yantak inyange ling.

³⁶Iman-e jhotnye jhotlak jingne acacia pee phei shong peli ling, tüolan tangme honne pho, hüyange tüolan me hon yankokke kün. Tüophei me shonglan tüklak jingne iman-e khüm yajenth peli ling.

³⁷Khümjing nyenok nokshaoye jingne iman-e shemeipupa pengkhai wanghüng, phutti, hüyange mattak phei tak, hüyange awfa yantak inne ling.

³⁸Tüopa jhotnye jingne iman-e shong nga yankok khümyange, tüolan üju hei üpüm me honne phoyange ling, hüyange shonglan jingne shakphan yan phei yajenth nga ling.