Read Konyak Naga WOITEI 38 Bible Online

WOITEI 38 - Konyak Naga bible

WOITEI 38

¹Jakke dolak jingne iman-e acacia pee phei wümjong ling. Tüopa-a üjük üpeamja ke, üjükte yakkong nga, hüyange üpeamte yakkong nga; hüyange daopute yakkong lüm.

²Hüyange tüopa ünuk peli üshang me lye üwong ling; hüyange üwonglan-a tüopa wümjong phei püm ja ne hei ngohyangki; hüyange lye tüolan khongkümpu me shakphan yanne pho.

³Hüyange wümjong me jonlak toinan khongkümpu lye ling; tük-heilak, kahhoklak, yankhong, yankok, hüyange vünhoklak. Tüolan toinan khongküm puwa lye shakphan yan phei ling.

⁴Hüyange wümjong jingne shakphan yan phüotang püangpeam, wosat te ngoiye onge lye ling.

⁵lye pailak shüptet peli ngoiye ling hüyange tüolan-a ünuk peli me shatam.

⁶Iye acacia pee phei pailak sheam ling, hüyange tüolan me shakphan yanne pho;

⁷hüyange tüolan-a wümjong moini yekao me shüptet me inne tam. Wümjonga pekhüw phei ling hüyange hatüowa khwnge ngoh.

⁸Hüyange khümjing nyenok tafün shongme shaoshanpu shekolan jing she-nge yahpuwe shakphan yan yankhong hüyange tüopatepu yajenth lye ling.

⁹Khümjing nyenok ghonyoi lye pengkhai jhotnye phei ling. Heyekao me jhotnye laopute yakkong gho ja;

¹⁰tüotepu shong da hüyange tüolantepu yajenth da-a shakphan yan, hüpoi shonglan künlak hei tüolan khoppulan-a khüm.

¹¹Apyekao jingne yakkong ghoja laopu jhot; tüotepu shong da hüyange yajenth da-a shakphan yan, hüpoi shonglantepu künlak hei khoppulan-a khüm.

¹²Henyip yekao jingne yakkong denga laowe, shong pen hüyange yajenth pen tangme jhot; shonglan künlak hei tüolan khoppu-a khüm.

¹³Hüyange heongye ümeken me tafün ngoh, tüoken me ghonyoi-a yakkong denga.

¹⁴Taten ja yekao me jhotpuwa yakkong pen me nga; shong lüm hüyange yajenth lüm phei ngoh;

¹⁵hüyange jayekao jingne hüke ngoh; hüyange ghonyoi taten jaye jayekao me jhotnye-a yakkong pen me nga, shong lüm hüyange yajenth lüm phei ngoh.

¹⁶Ghonyoi neikonne ngohpu jhotnye khongkümpuwa shemeipupa pengkhai phei takke lingpu.

¹⁷Hüyange shong jingne yajenth lan-a shakphan yanne lingpu, hüyange yankoklan, yansho, hüyange shonglan ütok me phopu khongkümpuwa khüm me lingyange ngoh. Ghonyoi neikonne ngohpu shonglan khongküm puwa khüm yansholanne teishin yange ngoh.

¹⁸Ghonyoi nokshao yemepu jhotnye lan-a shemeipupa pengkhai wanghüng, phutti, hüyange mattak phei takpu hüyange yantak inne lingyang phei ne ngoh yangki. Hatüowa laopute yakkong da, hüyange daopute yakkong nga, ghonyoi tepu jhotnye kih-e ngoh yangki.

¹⁹Tüolan-a shakphan yan yajenth peli me shong peli nyenyange ngoh. Tüolantepu yankok, tüolan tang me büangpu, hüyange tüolantepu yansholan-a khümme lingyange ngoh.

²⁰Khümjing nyenokte yahpu hanlag khongkümpu hüyange ghonyoi neikonpu khongkümpuwa shakphan yan phei lingpu shaha ngoh yangki.

²¹Khümjing nyenok me jonpaipu yantoi yannan phongpu min nyan angpu ümeken me ngaokhüm pen nyanpu longsheng khüo ni angnang hüke ngoh nang. Nyanpu minlan-a Mosawe i-e tam, hüyange tüopa-a Aaron ngengpa üha Ithamar woiyange Levilanne lingpu ngohnang.

²²Judah nokphong mepu Bezalel, Uri üha hüyange Hur ühuwe sheminlam phe Youngwanpawe Mosate hangke i, hüke ling.

²³Ite jampa, Dan nokphong mepu Ahisamach üha Oholiab-a watte nyanpa, awfa yantak inne lingpa, hüyange shemeipupa pengkhai hei wanghüng, phutti, hüyange mattak takpa ne ngoh yangki.

²⁴Üjao khümjing nyenok jingne Youngwanpate jaowe tampu hon khongkümpuwa üjao nyoi me jonpu toklak me tokpu kilogram haja ja ngoh yangki.

²⁵Ükhong shangtoi ipu mepu peipu üjao nyoi me jonpu toklak me tokpu khüm kilogram haja lüm gho peli delüm ngoh.

²⁶Tüolan hüke ngoipuwa shangtoi ipu me min nyanyangpu moilanne phapu me ngoipu ne ngoh, moilanne üjao nyoi me jonpu toklak me khakshuwe tokyange phapu ne ngoh yangki. Wangpeng da hüyange tüo tok tepu kahtalan shangtoi ipu me lakh wok, haja lüm gho nga phei me denga ngoh yangki.

²⁷Tüolan khüm mepu üjao khümjing nyenok yajenth gho ja hüyange jhotnye gho ja jingne kilogram haja lüm gho peli yah; yajenth ja ja jingne kilogram delüm me peli li yah.

²⁸Topulan khüm kilogram delüm me peli phei Bezalelwe yansho, shong jingne, yankoklan hüyange shonglan te lümlak jingne ling.

²⁹Hüyange Youngwanpate jaowetampu shakphan yan khongkümpu kilogram haja ni gho peli phei me da me nga ngoiyangki.

³⁰Tüolan phei Iye khümjing nyenok nokshaoye yajenth jingne, shakphan yan phüotang phei shakphan yan wümjong, hüyange wümjong tepu toinan khongkümpu,

³¹ghonyoi neikonpu yajenth jingne hüyange ghonyoi nokshao ye jingne, hüyange khümjing nyenok tepu hanlag khongkümpu hüyange ghonyoi neikonpu jingne jonne ling.