Read Konyak Naga WOITEI 39 Bible Online

WOITEI 39 - Konyak Naga bible

WOITEI 39

¹Üjao nyoi me shaoshanlak jingne, iman-e ngengpalan jingne wanghüng, phutti, hei mattak phei manyange lingpu nyemo tüm. Youngwanpawe Mosate ngaokeng phapu kih-e iman-e Aaron jingne ngengpa nyemo tüm.

²Hüyange iman-e shemeipupa pengkhai-e ngengpa phakshaoh-a wanghüng, phutti, hüyange mattak, hüyange hon ve phei ling.

³Iman-e hon-a pelag-e metyange üpha ne linge ngai hüyange shemeipupa pengkhai hei wanghüng, phutti, hüyange mattaklan me neamme yahlak jingne üpha üpha ne tang.

⁴Iman-e ngengpa phakshaoh jingne phakwai ni ling, hüyange ü-heam moini yekao me tüolan-a shatam.

⁵Jakihpu toinanlan yahyange lingpu shemeipupa me takpu shienghit-a Youngwanpawe Mosate ngaowe tampu kih-e tüolan phei ütüpja ne sheilak jingne ngengpa phakshaoh me shatam.

⁶Hüyange iman-e onyz toinyu long ling, hüyange tüolan-a hon ünok me khümme tam; tüolan-a Jacob hayim pen me ni min watte nyanpu kih-e okkeshange watte ling.

⁷Hüyange Youngwanpawe Mosate ngaowe tampu meimei kih-e, Israel nokphong penme ni ompu hüowe ngengpa phakshaoh phakwai me iman-e tüolan-a ange tam.

⁸Hüyange iman-e mongkhüp-a ngengpa phakshaoh kih-e okkeshange hon, wanghüng, hei phutti, hüyange mattak phei awfa yantak inne ling.

⁹Tüopa-a üjük üpeam jakih kih-e hüyange ni ne nüppe bheiyange, üjükte yakkam ja, hüyange üpeamte yakkam ja.

¹⁰Iman-e tüopa tangme toinyu long üleng peli neakke tam: üwangpa leng me iman-e ruby ja, topaz ja, hüyange garnet ja neakke tam;

¹¹ni shepupa leng me emerald ja, sapphire, ja, hüyange diamond ja;

¹²lüm shepupa leng me turquise ja, agate ja, hüyange amethyst ja;

¹³hüyange peli shepupa leng me beryl ja, carnelian ja, hüyange jasper ja. Tüolan-a hon ünok me neakke khümme tam.

¹⁴Israel nokphonglan ompu hüolak jingne tüolan long pen me ni jaja me Jacob hayimlan min ja pong me watte nyanyangki.

¹⁵Mongkhüp jingne wu lüppu kih-e lüpyange jaoshepu hon phei iman-e hon wu ling.

¹⁶Iman-e hon ünok ni hüyange hon shüptet ni ling hüyange shüptet ni-a mongkhüp ütokye ünuk me shinne tam.

¹⁷Iman-e hon wulüp ni-a shüptet ni me shatam;

¹⁸hüyange hon wulüp ülao üjeng ni-a hon ünok ni me shatam, hükih-e ngengpa phakshaoh phakwai sheshao yeme shinne tam.

¹⁹Iman-e hon shüptet ni ling hüyange tüolan-a mongkhüp üphang ye ünuk me, ngengpa phakshaoh shüngpu ümongye ünahpong me shintam.

²⁰Iman-e üne-o hon shüptet ni ling hüyange tüolan-a ngengpa phakshaoh tepu phakwai üphangye ütah ye me shüngpu pongme hüyange meimawe takpu shienghit tok me shatam.

²¹Youngwanpawe Mosate ngaowe tampu meimei kih-e iman-e ngengpa phakshao tepu shüptet me mongkhüp shüptet-a wanghüng wuwe sha, tüokaiye mongkhüp-a lanne yetape shienghit tokme monge ngoh.

²²Hüyange ngengpa phakshaoh tangme yahpu ngeng ahng phakshaoh-a lanshe wanghüng mat phei takyangki.

²³Üshang ngailak jingne üwo ling hüyange tüopa üwo yehitlak jingne yakke takpu mongjü ongpu khek phei üju neiye shüng,

²⁴Ngeng-ahng phakshaoh üjeng neikonne iman-e wanghüng, phutti, hüyange mattak hüyange shemeipupa pengkhai phei chamuk ling.

²⁵Iman-e üne-o jaoshepu hon phei lüngha ling, hüyange ngeng-ahng phakshaoh üjeng neikonne chamuk nipa me lüngha jhot.

²⁶Hüke Youngwanpawe Mosate ngaowe tampu kih-e shaoshanpu me yahlak ngeng-ahng phakshaoh üya neikonne chamuk ja lüngha ja, chamuk ja lüngha ja she jhottam.

²⁷Üne-o iman-e Aaron hüyange Ihalan jingne pengkhai ümei phei takpu phakshaoh ling;

²⁸hüyange shangnyeih khek, shaoshaoh, pengkhai phakshaoh,

²⁹hüyange Youngwanpawe Mosate ngaowe tampu kih-e shemeipupa pengkhai shienghit hei wanghüng, phutti, hüyange mattak awfa yantak inyang pheilan ling.

³⁰Iman-e jaoshepu hon phei üjaopa jaowetampu yepinlakpa juyük ling hüyange tüopa tangme “Youngwanpate Jaowetampu” she watte nyan.

³¹Hüyange iman-e tüopa-a Youngwanpawe Mosate ngaowe tampu meimei kih-e shangnyeih khek tangme wanghüng wu phei shatam.

³²Hüke khümjing nyenok me lingpu toishao khongkümpu tüm. Hüyange Israel lanne Mosa te Youngwanpawe lingne tampu kih-e toishao lili khakshuwe linge sho.

³³Tüophei me iman-e Mosa tangte khümjing nyenok, hüyange tüotepu toinan lili, yankoklan, pelao, peilei wenao, shonglan, hüyange tüotepu yajenthlan yahpei;

³⁴shonglak jingne nyeesho taakke lingyang phei; shonglak shemeipupa meisho; tienlak jhotnye;

³⁵longsheng khüo, tüotepu sheam pheipu jiengjeppu ghonu; hei tüopatepu shüpshe shotjing,

³⁶khao, tüopatepu toinan khongkümpu, hüyange Kahwangte dopu an;

³⁷jaoshepu hon pheipu vüntük yongjing, tüopatepu vüntüklan, tüopatepu toinan khongkümpu hüyange vüntüklan jingne minnga;

³⁸hüyange hon wümjong; hüyange pholak minnga; hüyange üpe meipu sünyet, hüyange khümjing nyenok nokshaoye jingne jhotnye;

³⁹shakphan yan wümjong, hüyange tüotepu shakphan phüotang, tüopatepu sheam, hüyange tüotepu toinan khongkümpu, hüyange yengjon yankhong hüyange tüopa yajenth;

⁴⁰hüyange ghonyoi jingne jhotnye hüyange tüotepu shong hei yajenth lan; ghonyoi nokshaoye jingne jhotnye hüyange tüotepu wu; khümjing nyenok jingne hanlaglan; khümjing nyenok me jonnepailak shemin lamphe toinan;

⁴¹hüyange üjao nyoi me shaoshan wante ngengpa lan-e yahlak manyange lingpu nyemo-Aaron ngengpa hüyange Ihalan jingne tümpu üjao kheklan yah pei.

⁴²Youngwanpawe Mosate ngaowe tampu kih-e Israel lanne toishao lili ling.

⁴³Mosawe khongkümpute tokke lei, hüyange hüke Youngwanpawe ngaowe tampu khakshuwe iman-e tüolan-a linge shopu nge. Tüokhei Mosawe tüolante moimantam.