Read Konyak Naga WOITEI 4 Bible Online

WOITEI 4 - Konyak Naga bible

WOITEI 4

¹Hüwante Mosawe Youngwanpa te jan-e i, “Hüpoi leppu ja me Israel lan-e üte ütinglak-e yeteih hüyange taowe hanghe i tüopate üting yelakma-a; hüyange üte nang ngaiye yehüoja she iman-e ima-a taowe hangke ilak?”

²Tüokhei Youngwanpa Ite tonge i, “Nang yak me hanghe jonyange ngoh nangki?” Iye i, “Wongjoi ja.”

³Youngwanpawe i, “Tüopa-a kahtokte shüptam tüoh.” Tüokhei Iye wongjoi-a kahtokte shüp, hüyange tüopa-a pu ne meng, hüwante Mosa tüopa mepu tokphei te shin ye.

⁴Hüwante Youngwanpawe Mosa te i, “Nang yak ngaitüoh, hüyange ünyei me jonyange toon yahtüoh.” Tüokhei I khuhta hüyange tüopa phowe yah, hüyange tüopa-a nishe wongjoi ne meng.

⁵Youngwanpawe i, “Israellante hüke Youngwanpa imanjing pajeiyonglan Kahwang, Abraham, Isaac, hüyange Jacob Kahwang nang tangte ngaiyangpu yang she shinglak jingne tüopa lingtüoh.”

⁶Youngwanpawe Mosa te üne-o ngao, “Nange nang phakshaoh ülao khok me nang yak phoh tüoh.” Hüyange Mosawe hüke I yak phoh, hüyange aope lye yoi yak yah ngaiyapeih, I yak-a ngon maa phei yi kih-e henge ngoh yangki.

⁷Tüophei me Youngwanpawe i, “Nang jing phakshaoh ülao khokte nishe nang yak phoh tüoh.” Tüokhei lye hüke yoi yak nishe phoh, hüyange aope lye tüopa okke ngai, leihuyah, hatüowa ülao tangta kih-e meiteiye ngoh.

⁸Youngwanpawe i, “Iman-e nangte üting yelakma-a, yejema-a üwangpa kahnyingwüngha me mong yehahküma-a, iman-e nishepupa kahnyingwünghawe mong hahkülak.

⁹Hüyange tüopa kahnyingwüngha ni lingyang phei te iman-e üting yelakma-a yejema-a nange hanghe iyangki tüote iman-e minjai she ima-a, hüwante nange Nile mepu yeng shaowe kahtok üwan tangme shoktüoh; hüyange hanghe yeng nange Nile mepu shao in, tüopa kahtok üwan tangme iy ne mengkülak.”

¹⁰Hüpoi Mosawe Youngwanpate i, “Tüone yeje, Youngwanpa, tao tah shon tampha. Taowa aope-o ngao meiye manngao ok, hüyange nange ü-phei ngao phei me peiye taowe aope-o ngao ipa ja ne manmeng. Taowa ngao meiye yengao okpu, monglaowe hüyange nüngneipu kahta.”

¹¹Hüwante Youngwanpawe Ite i, “Aowe kahta te I ju pha pu? Aowe I napanpa ne yejema-a yee shohpa ne lingpu? Aowe Ite mük pha yejema-a I mükmüopa ne linge tampu? Hatüowa Tao, Youngwanpa ne üje a?

¹²Tüokhei sha-a taitüoh! Ngao ngaolak jingne Taowe nangte jamlak, hüyange nange hanghe ngaolak hatüo Taowe nangte ilak.”

¹³Hüpoi Mosawe jan-e i, “Tüone yeje, Youngwanpa; chingmei lam linge ütamja shon shih.”

¹⁴Hüwante Youngwanpawe Mosa phei mongshih ngai, hüyange i, “Levi nokphong me nangjei Aaron yenang a? lye meiye ngaopu oknang she Taowe shing nang. Ütingpa me I sha-a nang phei hüolak jingne peiküpu; hüyange aope lye nang ngelakei, lye yoi mongjang me mongmeiye ngohlak.

¹⁵Hüyange nange I phei ngaolak, hüyange ngaowa I ju me hinne tamlak, hüyange Taowe nangju hei I ju phei omme ngohlak, hüyange nangni moi ni-e hanghe linglak Taowe hüolak.

¹⁶I-a nang jingne ngao ipane menglak hüyange nang nanleiye kahtalan phei ngaolak. Hüwante nanga Kahwang kih-e, hanghe ngaolakei Ite ine tam-e ngohlak.

¹⁷Nang phei tüopa wongjoi yahtüoh, hangjingne tüopa phei nange kahnyingwüngha linge ngailak.”

¹⁸Tüophei me Mosa Iküo Jethro tangte leihye, hüyange Ite i, “Egypt kahtok me ngohpu ü-jeihei naolan üne-o üyin me muh ngohlak heiya hangke ngohlakei leilak jingne chingmei lam linge tao taine tampha.” Jethro-e monge yah, hüyange Ite meiye taitüoh she i.

¹⁹Aope Mosa Midian me muh ngoh, Youngwanpawe Ite i, “Egypt kahtok te leih yetüoh; hangjingne aoyinne nang toilak jingne yam iman khongkümpu liteki.”

²⁰Tüokhei Mosawe yoi sheko hei I halan woi peiye gado me iman üshei shotne tam, hüyange iman Egypt kahtokte leih ye, hüyange Mosawe Kahwang wongjoi yoi yak me jon.

²¹Hüyange Youngwanpawe Mosa te üne-o i, “Sha-a nanga Egypt te leih ye nang, hanghepa kahnyingwüngha linglak jingne Taowe nang te ünganwong pha khongkümpu Egypt ahngpa sheshao me linge hüolak teih tüoyah. Hüpoi Taowe ahngpa-a üngei ne linge tamlak, hüyange lye kahtalan taine yetamkülak.

²²Hüwante nange Ite hüke ilak, hüke Tao, Youngwanpawe inang, Israel-a üha, ü-üwangpa ha ngoh nang.

²³Taowe nangte ü-ha taine tamtüoh she inang, hümme nakshih lye üte yoppe khümlak. Hüpoi nange I teilak yemong; Tüokhei, Taowe nangha jeiyongpa toitamlak.”

²⁴Egypt te tailam ümeken me iman lakjing nyoi ling, tüome Youngwanpawe Mosa hüo hüyange I toilak jingne ngang.

²⁵Hüwante Inok shekonyu Zipporah-e ünah pheipu long yahpuwe yoiha üsho khüp, hüyange Mosa ya te tüopawe shahtam; hüyange yhawe i, “Ütingme üjingne iy kaiye nokyam tampu nyemthepa-a nang ngohnang!”

²⁶Tüokhei Youngwanpawe Mosa hüke yinne tam. Hüwante üsho khüppe tampu nanjingne yhawe i, “Iy kaiye nokne mengpu nyemthepa nang ngoh nang.”

²⁷Hüke ngohpu hipak me Youngwanpawe Aaron te i, “Mosa phei hüolak jingne wanwüng jengte taitüoh.” Tüokhei I phei hüolak jingne I tai, hüyange Kahwang kahtang me lye I hüowe Ite omhüp.

²⁸Hüyange Youngwanpa ngao khongkümpu hanghepa ngao ilak jingne lye I shon, hüyange lye Ite kahnyingwüngha khongkümpu hanghe yin linglak jingne tam, tüolan-a Mosawe Aaronte i.

²⁹Tüophei me Mosa hei Aaron ni Egypt te tai hüyange Israel lwngmei kahtalan khongkümpu jamshe jem ne tam.

³⁰Hüyange Youngwanpawe Mosa te ngaopu ngao khongkümpu Aaron-e imante ngaotam, hüyange tüophei me kahtalan sheshao me Mosawe kahnyingwüngha ling.

³¹Hüyange kahtalan-e ütinglak; hüyange Youngwanpawe Israel hayimlan tangte peiteki hüyange lye iman shaoshi yateng ngeteki she aope iman-e jai, hüwante iman ngüm khuhtawe iman-e khüm.