Read Konyak Naga WOITEI 40 Bible Online

WOITEI 40 - Konyak Naga bible

WOITEI 40

¹Youngwanpawe Mosate i,

²“Üwangpa leatepu üwangpa nyih me nange khümjing nyenok lingtüoh.

³Yongtüoh nange ngaokhüm pen ngohpu ghonuwa tüome angtüoh, hüyange nokshao yeme jhotnye shongtüoh.

⁴Hüyange nange khaowa yah inne angtüoh hüyange tüopa tangme toinan üyinshinne angtüoh. Hüyange nange vüntük yongjing ümongte intüoh hüyange tüopa tangme vüntüklan angtüoh.

⁵Sünyet jaklak jingne hon wümjonga jiengjeppu ghonu sheshao me angtüoh, hüyange khümjing nyenok nokshao yeme jhotnye shongtüoh.

⁶Jakke dopu phalak jingne khümjing nyenok sheshao me wümjonga angtüoh.

⁷Yengjon yankhonga khümjing nyenok hei wümjong nipa me angtüoh hüyange tüopa-a yenge maatamtüoh.

⁸Neikonpu ghonyoi ngaitam tüoh, hüyange tüopatepu nokshao yeme jhotnye shongtüoh.”

⁹“Tüophei me nange üjao minnga yahpuwe khümjing nyenok hüyange tüopa me ngohpu toinan khongkümpute shokke tam-e jaowe tamtüoh, hüyange hatüowa üjao ne menglak.

¹⁰Tüophei me, wümjong hüyange tüopatepu toinan khongkümpute minnga phowe tam-e jaowe tamtüoh, hüyange tüopa-a lanshe üjao ne menglak.

¹¹Tüophei me üne-o yengjon yankhong hüyange tüopatepu yajenth hüke muh linge jaowe tamtüoh.”

¹²“Tüophei me nange Aaron hüyange Ihalan khümjing nyenok tafün shongme peitam tüoh, hüyange jaowe shawe yeng yüotüoh she imante itüoh.

¹³Aaronte ngengpa nyemo yahne tamtüoh, Ite minnga photam tüoh, hüyange hüke linge I jaoweshawe tamtüoh, hümme nakshih lye ngengpa ja ne ü-shaoshan lak.

¹⁴Hüyange nange I halan-o woipeiye imante phakshaoh shaoh-e tamtüoh.

¹⁵Tüophei me iman üpate nange minnga phowe tampu meimei kih-e imante minnga phowe tamtüoh; hümme nakshih iman-e ngengpa ja ne ü-shao shanlak. Tüo kih-e minnga pho tampu kaiye jin khongkümpu jingne iman ngengpa ne linge tamnang.”

¹⁶Youngwanpawe ngaowe tampu kih-e khakshuwe Mosawe lamphe li ling.

¹⁷Nishepupa wangpeng üwangpa lekeng üwangpa nyih me khümjing nyenok-a yongpu okyangki.

¹⁸Hüyange Mosawe tüolan tepu yajenthlan ang, tüopatepu pelaolan ang, tüopatepu peilei wenaolan sha, hüyange tüopatepu shong nyien.

¹⁹Khümjing nyenok tangme lye yüohne tümpuwe küp hüyange Youngwanpawe ngaowe tampu meimei kih-e tüopa tangme ütok me yüohlakke büange tam.

²⁰Hüyange Iye ngaokhüm longsheng ni yahpuwe jiengjeppu ghonu me ang. Ghonu mepu shüptet te lye sheam shatam hüyange ghonu tangme shüpshe shotjing ang.

²¹Tüophei me lye ghonuwa khümjing nyenokte yahpei, hüyange tienlak nanjingne jhotnye jhotte tam. Hükih-e linge Youngwanpawe Ite ngaowe tampu meimei kih-e jiengjeppu ghonu-a tienne ang.

²²Hüyange khümjing nyenok apyekao, nyenok me jhotnye ü-atye me lye khaowa ang;

²³hüyange tüopa tangme lye Youngwanpate dopu an-a üyin shinne Youngwanpawe ngaowe tampu meimei kih-e ang.

²⁴Hüyange lye khümjing heyekao khao phei jan hüowe khümjing nyenok me vüntük yongjing ang.

²⁵Hüyange Youngwanpawe Mosate ngaowe tampu kih-e Youngwanpa sheshao me vüntük-a pah.

²⁶Iye hon wümjonga khümjing nyenok me jhotnye sheshao me ang.

²⁷Hüyange Youngwanpawe ngao tampu kih-e wüngwükke meiye pepu sünyet jak.

²⁸Khümjing nyenok nokshao yeme lye jhotnye shonge tam;

²⁹hüyange tüoken jhotnye sheshao me dopulan jakke tamlak jingne lye wümjonga ange tam. Tüopa tang me Youngwanpawe ngao tampu meimei kih-e lye jakke dopu hüyange hahying dopu toido.

³⁰Hüyange lye yengjon yankhonga khümjing nyenok hüyange wümjong nipa me ang, hüyange tüopa me yeng maawe ang.

³¹Mosa, Aaron, hüyange Ihalanne tüopa me iman yak hei imanjing ya tuhpho.

³²Hangkih tingme iman khümjing nyenokte yejema-a wümjongte onglakeih, Youngwanpawe ngao tampu mei mei kih-e tuhpho.

³³Mosawe khümjing nyenok hei wümjong neikonne ghonyoi linge ngai hüyange ghonyoi nokshao yekao me jhotnye shonge tam. Hükih-e Mosawe toi khongkümpu tümme sho.

³⁴Hüwante wangphom-e khümjing nyenokte yüoh; hüyange Youngwanpa ompu phihlangpu wangngaiye maa.

³⁵Tüojing üne, khümjing nyenok ümongte Mosa ye-ong ok. Hangjingne tüopa tangme wangphom ngoh, hüyange Youngwanpa müktishiwapuwe maawe ngoh.

³⁶Aope khümjing nyenok mepu wangphom yahtei lakei hüwante nakshih Israel lan-a iman lakjing mepu ülao nyoite taipu okyangki.

³⁷Hüpoi hipak hangshin laowe tüoken mepu wangphom yah yeteipe ngoh lakei, iman lakjing mepu iman yayeyong.

³⁸Hangjingne iman waakem-e peiyangpu hipak üshei me Youngwanpa ompu wangphom khümjing nyenok tangme nyihning me hüyange wangnyak me khümjing nyenok noktok me vün loongpu iman-e nge ngoh yangki.