Read Konyak Naga WOITEI 5 Bible Online

WOITEI 5 - Konyak Naga bible

WOITEI 5

¹Tüophei me Mosa hei Aaron ni Egypt ahngpa tangte tai hüyange i, “Hüke Youngwanpa, Israel Kahwange inang, ‘Wanwüng jengme iman-e üjingne mo ngohlak jingne Ü-kahtalan tai ne tamtüoh.’”

²Hüpoi ahngpawe i, “Youngwanpa-a ao shi?” “Taowe hangne I ngao jailak hüyange Israel tai ne tamlak shi? Taowe Youngwanpa yeshing; hüyange taowe Israel tai ne yetamlak.”

³Tüophei me Mosa hei Aaron ni-e jan-e i, “Hebrewlan Kahwange yoi nying nyingke tomni tangte ngai yangki. Youngwanpa toman Kahwang te toidopu phalak jingne wanwüng jengte nyih lüm lam me toman kem-e taine tampha she yop-e tong nang. Toman-e hüke yelingma-a daktin phei yejema-a wehok kaiye lye toman toi phalak.”

⁴Hüyangpoi Egypt ahngpawe Mosa hei Aaron nite i, “Iman-e linghümpu toishao te mong yephalak ne kahtalan te numan-e linge tampu tüowa hanghe shi? Numan toishaote leih yetüoh!”

⁵Ahngpawe yelakpe i, “Egyptlan phei-a numan kahtalan ünyei phongtepu. Hüyange sha-a numan-e toi yelingpe lak hunang!”

⁶Tüonyih muh ahngpawe shom-aipalan hei Israel yakjongpalante ngaokeng phawe i:

⁷“Üshongpu kih shaaji numan-e kahtalan te jaklong yaolak jingne tahjant tah pha; iman-e yoi nying nyingke taiye tahjant peine tamtüoh.

⁸Hüpoi üshongpe iman-e jaklong hangshinne yaowe ling yangki, numan-e imante teshinne muh lingne tamtüoh. Numan-e tüopa mepu ja nehoi yekomlak, hangjingne iman jook nang, tüojing ne iman-e ‘Toman Kahwang te dopu phalak jingne toman taine tampha she üngwün hüm nang.

⁹Kahtalante toiwan pha tüoh, tüome nakshih iman-e yak yengaipe linge ngohlak, hüyange iman tahleih ngao te mong phalak ne hipak yetüolak.’”

¹⁰Tüokhei shom-aipalan hüyange Israel yakjongpalan tai hüyange kahtalante ngaowe i, “Hüke ahngpawe inang, ‘Taowe numante shaaji tahjant yephalak.

¹¹Numan nying nyingke taiye, ümeken me numan-e tahjant tüolakei shai jemyah, hüpoi tüokhei she numan toishao tüomepu shoine yetamlak.’”

¹²Tüokhei kahtalan Egypt kahtok üshei yete tahjant yam-e shaijemlak jingne yan-e tai.

¹³Shom-aipalan-e imante hüke kange toi lingne tam-e i, “Tahjant ngohwantepu kih, numan nyihjeih meitam toishao shotüoh!”

¹⁴Hüyange Egypt mepu shom-aipalan-e toishaote leine angpu Israel yakjongpalante shüt, hüyange tonge i, “Üshongpe jaklong yaopu kih-e hangne numan kahtalan-e nyih jeihpu meitam khak shuwe linge üshopu?”

¹⁵Hüwante Israel yakjongpalan ahngpa tangte taiye hüke i, “Nang üyongpa, nang shao shanpalan te nange hangne hüke jonpu?

¹⁶Nang shaoshanpalante tahjant phawe yenang, hüyange iman-e tomante, jaklong yaotüoh she inang! Hüyange leihuyah, nang shao shanpalante shütnang, hüyangpoi yeshupuwa nang kahtalan me ngoh nang.”

¹⁷Hüyangpoi ahngpawe jan-e i, “Numan jooknang, numan jook nang; tüojing ne numan-e Youngwanpa te dopu phalak jingne toman taine tampha she inang.

¹⁸Sha-a yetüoh, hüyange toi lingtüoh; hangjingne numante tahjant hango yephalak, tüoyangpoi numan-e jaklongpa-a meitam khak shuwe yaowe linge ngaitüoh.”

¹⁹Aope iman te iman-e nyih jeih linghümpu jaklonga yekompe, üshong wante hangke linge pei hüke linglak wongpong she ngaoyapeih, Israel yakjongpalan-e iman-a ütuh me ngohnang she shinge pei.

²⁰Hüyange aope ahngpa sheshao mepu iman ngai taiyapeih, iman-e Mosa hei Aaron ni iman tan-e ngohpu lamme hüo.

²¹Hüyange iman-e imnite i, “Nang niye ahngpa sheshao me hüyange I shaoshanpalan sheshao me iman yak me yanglow shümne tam-e toman toitamlak ne toman min mengne tampu jingne, Youngwanpawe nang nite ngaophünpu phalak.”

²²Hüwante Mosawe Youngwanpa tangte leihyeyange i, “O Youngwanpa, hangjingne nang jing kahtalan te nange yemeipe jonpu? Hangjingne nange tao tüome shontam pu?

²³Tao ahngpa tangte nang min me ngaolak jingne pei phei me peiye lye kahtalante yemeipe jonnang; hüyange nange nang kahtalan yinlak jingne hango yeling!”