Read Konyak Naga WOITEI 6 Bible Online

WOITEI 6 - Konyak Naga bible

WOITEI 6

¹Hüwante Youngwanpawe Mosa te i, “Ahngpa te Taowe hanghe linglak nange ngelak: wongnangpu ü-yak ngohtepuwe Iye iman taine tamlak; wongnangpu ü-yak ngohtepuwe Iye yoi kahmük mepu iman jang teilak.”

²Kahwange Mosa phei ngao hüyange i, “Taowa Youngwanpa.

³Tao Abraham tangte, Isaac tangte hüyange Jacob tangte Ütahpa Kahwang ne ngai, hüpoi iman tangte Taowe Ü-üjaopa min ‘Youngwanpa’, hatüo Taowe ü-nying nyingte imante shingne yetampe ngoh yangki.

⁴Taowe üne-o Kanan kahtok hanghepa me yinkempa ja kih-e iman nyoi, tüopa kahtok iman te phalak Taowe iman phei jiengjeppu-o ling yangki.

⁵Sha-a Egypt lan-e rha ne angpu Israel hayimlan shap yoongpu Tao jaiteki; hüyange Taowe Ü-jiengjeppu teih tüoteki.

⁶Tüokhei Israellante itüoh, ‘Taowa Youngwanpa, hüyange Taowe numan Egyptlan hangkiyih mepu woiteilak, hüyange iman-e shapu phangme ngohpu numan yinlak hüyange yakhongpu hüyange ngaophünpu üyong kaiye Taowe numan yinne tamlak;

⁷Taowe numan-a ü-kahtalanne yahlak, hüyange Taowa numan Kahwang ne menglak. Hüyange aope numan Egyptlan hangkiyih mepu Taowe numan tantamlak kei, Youngwanpa numan Kahwang-a Tao ngoh nang she numan-e shinglak.

⁸Hüyange Abraham, Isaac hüyange Jacob te phalak hanghepa kahmük jingne Taowe ü-yak hong, tüopa kahmük yete Taowe numan woipeilak; hüyange hatüowa numante mothlei tamlak jingne phalak. Taowa Youngwanpa ngohnang.’”

⁹Tüokhei Mosawe Israel hayimlan phei ngao; hüpoi mongjang paine tam-e hüyange shüpshe yenangpe sha-apu yatuhshao me ngohpu kaiye iman-e Mosa ngao te mong yepha.

¹⁰Hüwante Youngwanpawe Mosa te ngao,

¹¹“Yayong tüoh hüyange Egypt ahngpa te Israel hayimlan I kahtok mepu taine tamtüoh she itüoh.”

¹²Hüyangpoi Mosawe Youngwanpa sheshao me ngaowe i, “Leihuyah, Israel hayimlan-e nehoi üte yejai; hüma-a tao jupen sho yekhüppu kahta jate ahngpawe hangke jailak?”

¹³Hüpoi Youngwanpawe Mosa hei Aaron nite ngaokeng phawe i, “Israel lante hüyange Egypt ahngpate hüke Egypt kahtok mepu Israellan numan-e woiye ngailak jingne ngaokeng phateki” she itüoh.

¹⁴Hatüolan-a iman noksalan wujüng üshanglan ngohnang: Israel üwangne puhpu ha Reuben me naoshe peli: Hanoch, Pallu, Hezron, hüyange Carmi; tüolan-a Reuben noksalan.

¹⁵Simeon me naoshe wok ngoh: Jemuel, Jamin, Ohad, Jachin, Zohar, hüyange Shaul Kananlan sheko mepu ha; iman-a iman min me ngaipu puhu tepu pajeiyonglan ngoh nang.

¹⁶Levi me naoshe lüm ngoh: Gershon, Kohath, hüyange Merari: iman-a iman minme ngaipu puhu tepu pajeiyonglan ngoh nang. Levi nyupuh wangpeng gho ja phei me delüm me nyit lwngmei ne nyoi yangki.

¹⁷Gershon me naoshe ni ngoh: Libni hei Shimei, hüyange iman me huhayimlan üngang ngoh yangki.

¹⁸Kohath me naoshe peli ngoh: Amram, Izhar, Hebron, hüyange Uzziel; hüyange Kohath nyupuh wangpeng ghoja phei me delüm phei me lüm lwngmei ne nyoi yangki.

¹⁹Merari me hayim naoshe ni ngoh yangki. Mahli hei Mushi. Hüke tüolan-a iman jing huhayimlan phei Levi puhulan ne ngoh yangki.

²⁰Amram me I sheko ne menglak jingne Ipa ünao Jochebed yah; hüyange yhawe Ite Aaron hei Mosa ni puhtam. Hüyange Amram nyupuh wangpeng gho ja phei me delüm me nyit lwngmei ne ngohyangki.

²¹Izhar me naoshe lüm ngoh: Korah, Nepheg, hüyange Zichri.

²²Uzziel me naoshe lüm ngai: Mishael, Elzaphan, hüyange Sithri.

²³Hüyange Aaron-e Nahshon ünao Amminadab üha, Elisheba sheko ne yah. Hüyange yhawe Ite Nadab, Abihu, Eleazar, hüyange Ithamar puhtam.

²⁴Korah me naoshe lüm ngoh: Assier, Elkanah, hüyange Abiasaph; iman-a Korah puhu mepu yanpu huhayimlan ngoh nang.

²⁵Hüyange Aaron üha Eleazarwe Putiel yhalalan yo mepu ja shekonyu ne yah; hüyange yhawe Ite Phinehas puhtam. Tüolan-a Levi nokphong puhulan tepu noksa üshanglan ngoh nang.

²⁶Hatüowa tüopa Aaron hei Mosa ni muh aoyinte Youngwanpawe “Egypt mepu Israellan ükhong ükhong lingyange woi ngaitüoh she ngaotam.”

²⁷Egypt mepu Israellan woi ngailak jingne Egypt Ahngpa Pharaoh te ngaopu tüopa Mosa hei Aaron imni muh ngohnang.

²⁸Aope Egypt kahtok me Youngwanpawe Mosa te ngao,

²⁹lye Ite i, “Taowa Youngwanpa ngohnang. Taowe nangte ngaowe tampu shemin lamphe Egypt ahngpate ngaotüoh.”

³⁰Hüpoi Mosawe Youngwanpate jan-e i, “Leihuyah, tao ngao yeman pe ngaopu kahta ja, hüma-a hangne ahngpawe ü-ngao jailak?”