Read Konyak Naga WOITEI 8 Bible Online

WOITEI 8 - Konyak Naga bible

WOITEI 8

¹Tüophei me Youngwanpawe Mosa te i, “Ahngpa tangte tai tüoh, hüyange Ite itüoh, ‘Hüke Youngwanpawe inang, “üte yoppe khümlak jingne ü-kahtalan taine tamtüoh.

²Hüpoi nange iman taine yetamma-a, leihuyah, Taowe nang kahmük üshei ye me lukh phei shaonah ne tamlak.

³Hüyange Nile me lukh maawe yanlak; iman yan-e ahngnok te ongkülak, hüyange shinleng nyoite ongkülak, hüyange nang shinleng tangme, hüyange nang shaoshanpalan noksa te hüyange nang kahtalan tangme, hüyange an ngüwpu sheng mongme hüyange an nyütpu shengkhao ümongte ongkülak.

⁴Lukhlan-a nang tangme, nang kahtalan hüyange nang shaoshanpalan tangme pah-e hütkülak.” ’”

⁵Hüyange Youngwanpawe Mosa te i, “Aaronte itüoh, yengyinlan tangme, shaohalan tangme hüyange yengnunglan tangme wongjoi jonyange nang yak notüoh, hüyange Egypt kahtok me lukh ngaine tamtüoh.”

⁶Tüokhei Aaron-e Egypt yeng tangme yoi yak no; hüyange lukh ngaiye Egypt kahtok maa.

⁷Hüpoi yepahipalane-o iman toishao kih-e linge hüo, hüyange imane-o Egypt kahtok me lukh ngaine tam.

⁸Hüwante ahngpawe Mosa hei Aaron ni nyik-e i, “Ü-mepu hüyange ü-kahtalan yo mepu lukh yahteilak jingne Youngwanpa te yop tüoh, hüyange iman-e Youngwanpa te toidopu phalak jingne taowe nang kahtalan taine tamlak.”

⁹Mosawe ahngpa te i, “Taowe mongmei sheiye nang jingne yoplak. Nang jingne, nangjing shaoshanpalan jingne, hüyange nang kahtalan jingne taowe aope yoppe tamlak, hipak hei itkei. Hümme nakshih Nile me ngohlak tokte kaiye ümeken me-o yenangpe lukh mahtamlak.”

¹⁰Ahngpawe janne i, “Ngainyih.” Hüyange Mosawe i, “Nange tongpu kih-e taowe linglak, hüyange hüwante toman Kahwang Youngwanpa kih-e ülao Kahwang ao-o yenang she nange shinglak.

¹¹Nang mepu, nenok mepu, hüyange nang shaoshanpalan hüyange nang kahtalan mepu lukh yanlak; iman Nile me hei ngohlak.”

¹²Tüokhei Mosa hei Aaron ni ahngpa mepu ngai; hüyange Mosawe ahngpa kaiye lukh ngaine tamme ngohpu jeng me lye Youngwanpa te üngwünne yop.

¹³Hüyange Youngwanpawe Mosawe ipu kih-e ling; hüyange noksalan mepu, gho nyoilan mepu hüyange kahko mepu lukhlan-a liküm.

¹⁴Hüyange Egyptlan-e tüolan-a jamshe moijem-e phonge ang; hüyange kahmük me ünam pe.

¹⁵Hüyangpoi aope ahngpawe lukh likümpu nge, Youngwanpawe ngaoyangpu kih-e I mongjang üngei ne menge ye, hüyange ahngpawe Mosa hei Aaron ni ngao yeyah.

¹⁶Youngwanpawe Mosate i, “I jing wongjoi phei kahtok te heaplak jingne Aaron te itüoh, hüwante Egypt kahtok nopu kahmak khekkhek ne menge ngailak.”

¹⁷Tüokhei Aaron-e yoi wongjoi phei kahtok te heap, hüyange Egypt kahtok mepu kahmak nopu khekkhek ne menge ngai, hüyange kahta hei yinmok moilan tangme pah.

¹⁸Hüwante yepahipalan-e iman-e iman wanglam kih-e linge khekkhek ngaitamlak jingne ngang, hüpoi iman-e okpu ye nge. Khekkhek üngang kahta hei yinmok moini me pah.

¹⁹Hüyange yepahipalan-e ahngpa te i, “Hatüowa Kahwang yaklan ngohnang!” Hüpoi Youngwanpawe ngaotampu kih-e, ahngpa mongjang wanne mah, hüyange lye Mosa hei Aaron ni ngaote yejai.

²⁰Tüophei me Youngwanpawe Mosa te i, “Ngainap shomme taitüoh hüyange I yengyin te laiwante ahngpa phei hüotüoh, hüyange Youngwanpawe hüke inang she Ite itüoh, ‘Iman-e üte yoppe khümlak jingne ü-kahtalan tai ne tamtüoh.’

²¹Nange hüke taine mintam she ima-a, leihuyah, nang tangme, nang shaoshanpalan hei nang kahtalan tangme hüyange nenok te hooi üngang taowe shonlak. Hüyange Egyptlan nok khongkümpu me hooi maalak, hüyange kahmük-a hooiye maawe phongyange ngohlak.

²²Hüpoi kahtoknyu me Tao Youngwanpa she nange shinglak jingne Taowe tüonyih-a ü-kahtalan ngohjing Goshen kahmük pa-a yinne anglak, hüyange tüome hooi ngohne yetamlak.

²³Hüke ü-kahta hei nang kahta nipa me Taowe yoi yoi ne anglak. Tüopa shaonahpu toishaowa ngainyih ngailak.”

²⁴Youngwanpawe hüke ling: hüyange hooi üngang ahngnok te hüyange I shaoshanpalan noksa te peine tam. Hüyange Egypt kahtok üshei ye me hooi ngaine tamme mengne tam.

²⁵Hüwante ahngpawe Mosa hei Aaron nite nyikyange i, “Tai tüoh, tüopa kahmük mongme muh, numan-e Kahwang te toidopu phatüoh.”

²⁶Hüpoi Mosawe jan-e i, “Hüke linglak yeshukülak. Hangjingne Egypt lan-e nupu Youngwanpa toman Kahwang te toman-e toi do lakne ngoh nang: Toman-e Egyptlan-e nupu iman sheshao me toidopu linge ngeküma-a iman-e tomante longe yeshüp lak a?

²⁷lye tomante ngaowe tampu kih-e, toman-e nyih lüm lam wanwüng jengte taiye Youngwanpa toman Kahwang te toidolak wongpong.”

²⁸Tüokhei ahngpawe i, “Numan hi meiyange jaiye ütai ne ima-a, numan Kahwang Youngwanpate wanwüng jeng te taiye toidolak jingne taowe numan taine tamlak üjingne yop pha.”

²⁹Hüwante Mosawe i, “Leihuyah, tao nang sheshao mepu taipu phei jam she, ngainyih ahngnok mepu, nang shaoshanpalan mepu, hüyange nang kahtalan mepu hooi yan-e tailak jingne taowe Youngwanpa te yoplak. Hüpoi nange tomante üne-o lüppe lowe tahling, hüyange Youngwanpa te toido ne kahtalan tailak mepu tahtien.”

³⁰Tüokhei ahngpa sheshao mepu Mosa yan-e taiye Youngwanpa te yop;

³¹hüyange Mosawe tongpu kih-e Youngwanpawe linge tam. lye ahngpa mepu, I shaoshanpalan mepu hüyange I kahtalan mepu hooi üngang yahtei; hüyange ja nehoi yetüoh.

³²Hüpoi tüopa ün me-o ahngpa mongjang wanne mah hüyange üne-o lye kahtalan taine yetam.