Read Konyak Naga WOITEI 9 Bible Online

WOITEI 9 - Konyak Naga bible

WOITEI 9

¹Hüwante Youngwanpawe Mosa te i, “Ahngpa tangte taitüoh, hüyange Ite itüoh, ‘Hüke Hebrewlan Kahwang Youngwanpawe inang, “Üte yoppe khümlak jingne ü-kahtalan taine tamtüoh.

²Nange iman taine yetampe iman üne-o tükke angma-a,

³leihuyah, kahjee me nange tampu yinmoklan, koiponglan, gado hei udh, mahu ükhong hüyange nyee ükhong tangme dak yeonge yemeipu ja ngaine tam-e Youngwanpa yak hünglak.

⁴Hüyange Israel lan-e tampu yinmok hei Egyptlan-e tampu yinmok nipa me Youngwanpawe tampu ngaitamlak; hüyange Israellan jing yinmoklan-a hango yelilak.” ’”

⁵Tao, Youngwanpawe tüopa linglak jingne hipak-a “Ngainyih she itnang.”

⁶Üne nyih lye ngaoyangpu kih-e Youngwanpawe ling, hüyange Egyptlan-e tampu yinmok khongkümpu li; hüpoi Israellan jing tampu yinmok ja nehoi yeli.

⁷Hüyange ahngpawe hanghe ngaiyangki shinglak jingne shonne tei, hüpoi Israellan jing yinmok ja nehoi yeli she ngaowe tam. Hüyangpoi I üngeine meng hüyange kahtalan taine yetam.

⁸Hüwante Youngwanpawe Mosa hei Aaron nite i, “Jaklong vünjüo mepu tüpla yakpoih ja yayah; hüyange ahngpa sheshao me Mosawe tüolan-a wangte phutüoh.

⁹Tüolan-a Egypt kahtok nopute kahmak ükhoih ne menge yanlak, hüyange üken phe me tüolanne tüm ne ngaiye tamlak tüopawe kahta hei yinmoklan khongkümpute maa ne ngailak.”

¹⁰Tüokhei iman-e vünla ütam yahyange ahngpa sheshao me yong; hüyange Mosawe hatüo wangyete phutam, hüyange tüopawe kahta hüyange yinmok lante tüm ne ngaiye maa ne meng.

¹¹Mosa sheshao me yepahipalan peiye yongpu ye-ok, hangjingne ima-a ülao Egyptlan khong kümpute ngaipu kih-e imante-o tüm ngaiye maa.

¹²Hüpoi Youngwanpawe ahngpa üngei ne linge tam, hüyange Youngwanpawe ipu meimei kih-e, ahngpawe Mosa hei Aaron ni ngao te yejai.

¹³Hüwante Youngwanpawe Mosa te i, “Ngainyih shomme ahngpa phei hüotüoh, hüyange Ite itüoh, ‘Hüke Hebrewlan Kahwang Youngwanpawe inang, “Iman-e üte yoppe khümlak jingne ü-kahtalan taine tamtüoh.

¹⁴Shaapa-a Taowe nang jing shaoshanpalan hei nang kahtalan shahate shaoshi ne yetamlak, hüpoi Taowe nango omme shaoshi ne tamlak, hümme nakshih nange kahtoknyu nopu me ü-kihpu ao-o yenang she shinglak.

¹⁵Taowe nang hüyange nang kahtalan tangme daktin ngaine tamlak ne ü-yak hongshih ma-a, nanga kahtok mepu jaoshe-e mahteiye ngoh hahshepu!

¹⁶Hüpoi nangte ü-wong hüolak hüyange ü-min kahtoknyu üshei yeme ponge tamlak jingne müktakpe angyange taowe nang üyin me angyangki.

¹⁷Tüoyangpoi sha-ate ngoiye nange iman teine mintam she ü-kahtalan phei tüi-e nang nying nyingke nang yongelüo nang.

¹⁸Leihuyah, ngainyih hakih tingme, Egypt ngaipu nyih me wange sha-ate ngoipu mongme aope-o manyütpu yilong yeonge wongnange Taowe yütne tamlak.

¹⁹Tüokhei sha-a, nange tampu yinmok ükhong hüyange phao ye me ngohpu khongkümpu ai jem ne shontüoh; hangjingne phao me ngohpu kahta hüyange yinmok lili, nokte aiye yejempulan tangme yilong yeilak hüyange iman khongküm lilak.” ’ ”

²⁰Hüwante ahngpa shaoshanpalan yo me ütamme Youngwanpate nyamme teih, hüyange rhapalan hüyange yoi tampu yinmoklan nok me küone tam.

²¹Tüoyangpoi ülaolan aoyinne Youngwanpawe deingao phapu te mong yepha iman-e imanjing rhapalan hei yinmoklan üko me tüoh.

²²Hüyange Youngwanpa Mosa te i, “Egypt kahtok khongküm me, kahta hüyange yinmoklan tang me hüyange Egypt kahtok üshei yeme phümha weangyong khongkümpu tangme yilong yeitamlak jingne nang yak wang yete hongtüoh.”

²³Tüokhei Mosawe I wongjoi wang yete hong; hüyange Youngwanpawe wangkhongpu hei yilong shon, hüyange kahtok te vün yütne tam; hüyange Youngwanpawe Egypt kahtok me yilong yeine tam;

²⁴hüyange Egypt kahtok jat ja ne mengyang phei me sha-ate ngoiye aope-o manngaipu yeonge wong nangpu yilong hüyange yilong phei vün nyütyange yeipu ngoh yangki.

²⁵Hüyange Egypt kahtok üshei ye me, phao me ngohpu khongküm, kahta hei yinmok moini te yilonge shüp; hüyange yilonge phaome phümha weangyong khongkümpu phünne khoih ne tam hüyange phao mepu pee khongkümpu mengne tam.

²⁶Israel hayimlan ngohpu nyoi, Goshen kahtok shaha me yilong ye yei.

²⁷Hüwante ahngpawe Mosa hei Aaron nite nyikne shon hüyange imni te i, “Tenyih pa-a taowe ünu omyangki; Youngwanpa-a tinge ngoh nang, tao hüyange ü-kahtalan yeshupe ngoh nang.

²⁸Youngwanpa te yoptüoh! Hangjingne tomante wangkhong üyong khongpu hei yilong yeipuwe wangteki. Taowe numan taine tamlak, numan shaaji nyoi ngohlak wongpong ne yejelak.”

²⁹Mosawe Ite i, “Tao chingnyu mepu yayongpu phei jam she, ü-yak hongyange Youngwanpa te yoppe tonglak; hüyange kahtoknyuwa Youngwanpa jing she nange shinglak ne, wangkhongpu laklak hüyange yilong yeipu shaaji yengohlak.

³⁰Hüpoi nang hüyange nang shao shanpalan taowe shing nang, hüke numan-e üne-o Youngwanpa Kahwang te yenyam.”

³¹Pengkhai hei barley tah menge küm, hangjingne barley tah ngaiye ngoh, hüyange pengkhai-a peng teiye ngoh.

³²Hüpoi wheat hei spelt tah yemeng; hangjingne tüolan-a üne-o manngaipe ngoh.

³³Tüophei me Mosawe ahngpa tüohyange chingnyu mepu ngaiye taiye yoi yak hongyange Youngwanpa te yoppe tong. Hüyange wangkhongpu hei yilong yeipu lak, hüyange kahtok te shaaji wai yekei.

³⁴Hüpoi ahngpawe wai hei yilong yeipu hüyange wangkhongpu lakteki she aope nge, lye üne-o ünu omme I hüyange I shaoshanpalan mongjang wanne mah.

³⁵Hüyange Mosa kaiye Youngwanpawe ngaopu kih-e ahngpa mongjang hüke wanne mah hüyange lye Israel hayim taine yetam.