Read Konyak Naga JOB 1 Bible Online

JOB 1 - Konyak Naga bible

JOB 1

¹Job she minyange Uz kahtok me kahta ja ngohyangki; tüopa kahta wange ngoipu hüyange ümeng yenangpe, hüyange Iye Kahwangte nyam, hüyange ümengpa yelinglak jingne kenting.

²I me naoshe nyit hüyange naoyha lüm ngoh;

³hüyange I me nyee haja nyit, udh haja lüm, hüyange kah hampu mahu üpong nipet gho nga, gado gho nga, hüyange shaoshanpalan üngang ngohyangki. Tüokhei heongye me ngohpu üshei phei I shehakpupa ne ngohyangki.

⁴Job hayimlan-e iman nokden lep iye yoi phei shupu nyih me mo ling, tüopa me omlak jingne ülao lan-o pei, hüyange hipak phe me iman phei hahyinglak jingne iman naoyim sheko lüm te nyik-e ngohyangki.

⁵Molaipu napjeih she, Job shonge shinlüo hüyange iman jaowe tamlak jingne hayimlan pümlep ipu jingne jakke dopu phawe ngoh. Hangjingne Job-e i, aowe shing, ü-hayimlan-e ünu omme ngohne ok hüyange iman mongjang me Kahwang te phoiwümme ngohne ok. Hüke Job-e yelakpe ling.

⁶Nyih ja wangdang pinlan iman nying nyingke Youngwanpa sheshao me jemlak jingne pei, hüyange satan-o iman yo me pei.

⁷Youngwanpawe satante i, “Nang ümeken mepu peipu?” Satan-e Youngwanpate jan-e i, “Kahtoknyu me tai tai yeye hüyange tüopa me ta ta ong ong she kempupa.”

⁸Hüyange Youngwanpawe satante tonge i, “Ü-shaoshanpa Job nange ngeye okya?” “Kahtoknyu me wange ngoipu hüyange ümeng yenangpu kahta, Kahwangte nyampu hüyange ümengpa te nupu Ikihpu ao-o yenang.”

⁹Satan-e jan-e i, “Hango yenangpute Job-e nangte nyamlepu a?

¹⁰I neikonne, Inok neikonne, hüyange I me nangpu khongkümpu neikonne, üshei ye me nange yomnang. Hüyange nange sheminlamphe hüyange kahmük nopu maawe yinmok Ite pha.

¹¹Hüpoi sha-a leppu ja me I me nangpu khongkümpu nange yahtei tehu! Iye nang sheta me nangte phoiwüm külak.”

¹²Youngwanpawe satante i, “Meiteki,” “Leihuyah, I me nangpu khongkümpu nang yak me ngohnang; Ite hei nange tahjon!” Tüokhei satan Youngwanpa sheshao mepu yanne tai.

¹³Nyih japu hipak me Job hayimlan I jeiyong nok me mo mowe wuwüngti yinge ngohwante,

¹⁴ngaolan kipa ja Job tangte phette pei. Hüyange hüke i, “Toman mahu üponglan phei kah hokke ngoh, hüyange gadolan-a toman shongme heeihah-e ngoh,

¹⁵mokhshe Sabeanlan-e shümme pei, hüyange khongküm kuh taiteki. Iman shaoshanpalan-e ü-shaha tüohyange nang shaoshanpalan khongküm toiteki. Nangte ngaolak jingne tao ü-shaha taipu okyangki.”

¹⁶I üne-o ngaowe ngohwante, ülao shaoshanpa ja pei hüyange i, “Wangyuwe nyeelan hüyange nyeeyompalan iman khongkümpu toiteki. Nangte ngaolak jingne tao ü-shaha taipu okyangki.”

¹⁷I üne-o ngaowe ngohwante, ülao shaoshanpa ja pei hüyange i, “Chaldealan ükhong lüm ne shümme peiye udhlan yah, hüyange nang shaoshanpalan khongküm toiteki. Nangte ngaolak jingne tao ü-shaha taipu okyangki.”

¹⁸I üne-o ngaowe ngohwante, ülao shaoshanpa ja pei hüyange i, “Nanghalan nangha jeiyongpa nok me mo mowe wuwüngti yinge ngoh,

¹⁹hüwante wanwüng jeng yekao mepu waishihwangkhah wongnangpu pei ngoi. Iman ngohpu nokte shung hüyange nok toita-e iman khongküm toiteki. Nangte ngaolak jingne tao ü-shaha taipu okyangki.”

²⁰Hüyange Job yong hüyange mongmengpuwe I jing inkhek hitte win. Hüyange I shanglin, hüyange kahtok te lamme tayange yop.

²¹Iye i, “Ünyu sea mepu tao ükeng me pei hüyange tao ükeng me leihyelak. Youngwanpawe pha, hüyange sha-a Iye yahtei nang, Youngwanpa min yongtüoh!”

²²Tüolan lili mepu hüke ngaipu peiyapoi, Job-e Kahwangte phoiwümme ünu ye-om.