Read Konyak Naga JOB 10 Bible Online

JOB 10 - Konyak Naga bible

JOB 10

¹“Tao ü-üyin-e eangteki , Taowe hanghe ngaohuwe teih, hüke ngaolak; hüyange ü-yaha khah-e phoipu me taowe ngaolak.

²Taowe Kahwangte ilak, tao tahyeitam; Hangne nange ü-phei tüipu, üte ipha.

³Hüshin-e mengshilaka nang jingne shupu a? Nange nang jingne linge ngaipute nyiyaiye tamlak a? Hüyange ümenglan-e konpu konte mongmeiye leilak a?

⁴Nang me iymei mük ngoh nang a? Kahtawe ngepu kih nange ngenang kü a?

⁵Nangjing nyihlan-o kahtalan jing kih ngohyapu a? Yejema-a nang wangpenglan-o kahta jing wangpeng shin ne hei?

⁶Taowe püohpin pu hüyange ü-ünu phopu, hatüowa hangshi?

⁷Üme ümeng yenang hüyange nang yak mepu yinlak jingne ao-o yenang she nange shingya peyoi, hangne hüke jontampu?

⁸Nang yakke taowa ling hüyange yaowe ngai, hüyange sha-a tüolan yakke muh tao menge tamnang.

⁹Teihtüoyah nange taowa kümp kahtok-e lingngai; hüyange nange taowa tüpla ne khoih tam ne ipu a?

¹⁰Nange taowa düamyeng kih-e yünnetam, hüyange düamkeen kih-e yelingtam a?

¹¹Nange ü-püm waan hei lahjüng phei yaowe ling, hüyange waante ühak hei üsho phei lümme tam.

¹²Nange üte üyin pha hüyange yelakpe ken, hüyange nange paowe tükpuwe ü-üyin angtam.

¹³Tüoyangpoi sha-a taowe shinge peinang, tüolan hipak khongküm pume nange üte ümeng linglak jingne lowe tümme ngoh yangki.

¹⁴Taowe ünu omyashi she nange yomme ngoh yangki, om ma-a nange üte ünu minwin she ilak tüm.

¹⁵Taowe ünu ompu phei jam she tao nang phei chingmei yenanglak; hüpoi aope taowe khakshupu ling, taowe minmei tüopu yenang. Tao shaoshi yatengpu hüyange wüopuwe lümyange ngohnang.

¹⁶Taowe okkeshangpu ütam ngoh ma-a, yengkong mailang kih-e nange üte jang nang; hüyange üte maayahtamlak jingne nange yashan toi nehoi ling nang.

¹⁷Nange hipak lep iye ü-phei tüi-e saki ümeng angnang; ü-yekaote nang mongshipuwa ngaikhan ngai nang; nange hipak lep iye üte ümeng linglak üla tümnang.

¹⁸“Hangne nange tao puh ne tampu? Aowe-o man-ngepe tao lipu shemei hah shepu!

¹⁹Sea mepu tingkhakke mangjong te taipupa, ngaine yetampu shinne meihah shepu,

²⁰Ü-üyin jin-a shaaji linpu ne yeje a? Taowe towe tüohpu hipak me mongmei nüng; ü-shaha tüoh pha!

²¹Tao aope-o leih yeyelak, wangmang hüyange wangnyak kahtokte taishao me;

²²nyak-akpu yashüm, hüyange nüngneipu kahtok ümeken me wangngai muh nyak-ake ngohnang.”