Read Konyak Naga JOB 12 Bible Online

JOB 12 - Konyak Naga bible

JOB 12

¹Hüwante Job-e jan:

²Üting, numan-a kahtalan ngohnang. Aope numan lilakei numan phei jam-e konjong-o lilak.

³Hüpoi numan-e hanghe shinge ok, jakih-e taowe-o shing oknang; tao hanghe me-o numan phei shephang pupa ne yeje; numan-e ngaoyangpu lili-a khongküm puwe shing nang ja.

⁴Shaapa-a ü-shümpalan-e nehoi üte nyitam nang; tao jaoshe-e hüyange ümeng yenangpe ngohyapoi, iman-e nyitam nang; hüpoi hipak ja ngohyangki Kahwange taowe yoppu te jan.

⁵Aoyin nyailüm mei-e ngoh, yatuhshao ümeng jingne phoi, hüpoi aoyin ya yemong tüolan jingne tüowa tümyange ngohnang.

⁶Kuhleihpalan nyenoklan-a chingmei me, hüyange aoyinne Kahwangte yaole iman ütuh yenangpe, Kahwang-a iman wongne nyoi.

⁷“Hüpoi yinmoklante tongtüoh, hüyange iman-e nangte nyüophalak; Wang awhalante, hüyange iman-e nangte ngaophalak.

⁸Yejema-a kahtoknyute tongtüoh, hüyange iman-e nangte nyüophalak; yejema-a yengching nyahlante, iman-e nangte jai ne tamphalak.

⁹Tüolan khongkümpu yome aohepawe tüolan-a Youngwanpa yak-e yeling ja she ipu oklak?

¹⁰Yaha ngohpu üyin yinmok khongküm, hüyange kahtanyuha lüohepu khongküm, I yak me ngohnang.

¹¹Yee-e hahyingte jüp nyüopu kih, na-e ngao jai-e yenyüo a?

¹²Wupalan me konjong yetüo a? Jinlaowe ngohpalan me shing okpu ye ngoh a?”

¹³“Kahwang me konjong hei üngan wong ngohnang. I me üpongtüowe okpu hüyange toi ling oklak üngan wong ngoh nang.

¹⁴Iye hanghe khüw winlakei, aowe-o tüopa linge yepu ye-ok; Iye ütamja küppe angma-a, aowe-o lantampu ye-ok.

¹⁵Aope Kahwange wai tükke anglakei heleinang; aope Iye yeng eplakei muleam peinang.

¹⁶I me wong hüyange konjong ngohnang; lowe tampu hüyange lowetampupa moini I üngan me.

¹⁷Iye wanglam lampalan mengtam nang, hüyange pongtehpalan üngapa ne mengtam nang.

¹⁸Iye ahngpalan yanve yeitam nang hüyange iman shieng me nye phin tam nang.

¹⁹Iye ngengpalan phoyange yahteinang, hüyange aoyin wongnange ngoh, kawintam nang.

²⁰Iye ngao ipalan ngao yeyah, hüyange wupalan juteih wintüoh nang.

²¹Iye ahnghalan wüotüo tampu shoktam nang, hüyange wongnangpalan shienghit lantam nang.

²²Iye wangnyak mepu toinan ülu ngenang, hüyange wangnyak ünyak-a wangngaite yah ngainang.

²³Iye jatlan-a üyongne lingtam nang, hüyange iman mahtam nang; Iye jatlan-a kheyongne tam nang, hüyange iman yan ne tam nang.

²⁴Iye iman woipalan ngawoone tamnang hüyange iman üpong yetüope hüyange mahtamlak jingne waakem ne tam nang.

²⁵Iman wangnyak me pomme yamnang hüyange Iye iman-a yu jookpalan kih-e paala ne tam nang.”