Read Konyak Naga JOB 13 Bible Online

JOB 13 - Konyak Naga bible

JOB 13

¹“Leihuyah, ü-mük-e tüolan khongküm ngeyangki, ü-na-e jaiyangki, hüyange tüopa shingyangki.

²Nange hangshin shing, teshinne taowe shing nang. Tao nangphei shephangpu ne yeje.

³Hüpoi taowe Ütahpa phei ngaohu nang, hüyange ü-ngaowa Kahwang phei taowe teingao hunang.

⁴Numan-a üpong yetüopu tangme tahleih-e lümyange ngohnang; numan-a aowe dakpa ja nehoi meitampu ye-okpu mulipa leye ngohnang.

⁵Hango yengaope ngohtüoh me, numan-a konjong pheipulan she teihlak!

⁶Sha-a taowe ngaopu jaipha, hüyange ü-jupen-e yoptongpu te jaiyah.

⁷Kahwang jingne numan-e yeshupe ngaolak a? Hüyange Ite lolam-e ngaolak a?

⁸Numan-e I shaoyinne ngang nangkü a? I jeng ghonyoi me teingaolak jingne numan tainang kü a?

⁹Iye numan shongte owe peiye leima-a, Iye ümeilam ülam ja nehoi ngelak a? Numan-e kahtalan lowe lamme tampu kih Kahwango lowe tam oklak she teihnang kü a?

¹⁰Nange lowe shetaleipu hüoma-a, Iye ütingme nangte teelak.

¹¹I üngan-e nang yenyamtamlak a? Hüyange I wangshüm-e yemüktishiwa lak a?

¹²Numan mepu detngao vünla shinne tan; numan-e tokteipu ngaowa kümp khüoh pukih-e.

¹³“Jünge ngohtüoh hüyange taowe ngaolak jingne hipak yahkei, hüyange hangke ngailakei hüke ngaitam tüoh.

¹⁴Taowe ü-fa me ü-mei yahlak, hüyange ü-yak me ü-üyin anglak .

¹⁵Leihuyah, Iye tao toilak; tao monghümlak yenang; hüpoi I sheshao mepu ü-lamnyu taowe tienlak.

¹⁶Hatüowa ü-yinyetampu ne ngohlak, hangjingne Kahwang yenyampu kahta I shongte yepeilak.

¹⁷Ü-ngaote mei mei-e jaitüoh, hüyange taowe keptampu ngao nang na me ongtam tüoh.

¹⁸Sha-a leiyah, taowe ü-ngao üyin shien-e tümteki, Tao shuwe lingtam külak she taowe shing.

¹⁹Ü-phei ngao teilalak aohe ngohnangki? Ngohpu ne mengma-a, tao jünge ngohlak hüyange lilak.

²⁰O Kahwang, üte ülam ni hei yahkei, hümme nakshih tao ü-nying nyingke nang sheshao mepu yelolak.

²¹Nang yak ü-mepu yeong jai-e yantaitüoh, hüyange nange nyamshaopuwe tao mokhne tahtam.

²²Tüophei me ngaotüoh, hüyange taowe janpha ning. Yejema-a taowe ngaopha ning, hüyange nange üte janpha.

²³Ü-ünulan-a hangshi? Hanghe püohpu taowe ling ei? Hanghe mengyangpu jingne üte jangpu?

²⁴Hangne nange nang sheta lopu? Hangne nange üte wepa kih-e konpu?

²⁵Wangyange puwe teipu phümyak jate nange nyamshao tamlak a? Tahphan ja te nange janglak a?

²⁶Nange üte yeonge khahpu ümeng phanang, tao naha me ngohwante lingyangpu jingne nehoi nange yah peinang.

²⁷Nange ü-ya me yankeilei shatam; ü-yakai lili nange yom; hüyange ü-ya mee nehoi nange tokke lei.

²⁸Tüo kaiye, taowa boiye taipu pee ja leye khainang; hüyange mütte hahpu nyemo kih-e tainang.