Read Konyak Naga JOB 14 Bible Online

JOB 14 - Konyak Naga bible

JOB 14

¹“Shekowe puhtampu kahta jin shoh nang; hüyange maa-e shanghah shaoshi ngohnang.

²I jupeng ja leye pengngai nang hüyange kuimah nang, yashüm ja leye I yenangpe mahnang.

³Hükihpu ja te nange mük shüohpu a? Hüyange nang phei ü-ngaophün nang kü a?

⁴Aoheye yejaoyeshapu mepu jaoshepu ngaipu oklak? Aowe-o ye-oklak.

⁵Kahta jin hangshin laolak-I üyin me lekeng hangshin ngohlak, shaome muh nange itte tümyange ngohnang. Nang tüome ngohteki, hüyange hatüo jeilei ne ye-oklak.

⁶Ite leipu angtüoh hüyange I shaha tüotüoh; nanpawe nan-e shoyange toloimeipu kih-e I toloimei ne tamtüoh.

⁷“Hangjingne pee ja jingne mong hümlak ne-o ngohnang; tüopa akke winpune mengma-a, tüopa me üne-o nishe nian-e ngailak, hüyange tüopa nian-e ngaipuwa yelak lak.

⁸Kahmong me yalah ülangne mengyapoi, hüyange pejüng kahtok me liyapoi,

⁹tüoyangpoi yeng ngohpu nanjingne pephao üha kih-e nian-e ngailak.

¹⁰Hüpoi kahta-a linang, hüyange I jingne hatüowa üküm; I linang, hüyange I ümeken me ngohnang shi?

¹¹Yünne ngohpu yengyin lakpu kih-e, hüyange yengtung ea mahpuke,

¹²tüokih-e aope-o yange yeyelak ne kahta li nang. Wangdanghi hüke ngohphei ma-a iman aope-o yelüolak; iman shipu mepu aope-o iman yepolak.

¹³Nange taowa lipu kahtoknyu me lowe angne tamhu nang; nang mongshih ngaipu manlak manlak tao lowe ngohnang, nange tao teihtüolak hipak ja itte tampha.

¹⁴Kahta ja lima-a I üne-o yange yelak a? Tao lanne mantam mantam, ü-üyin wehok nyih khongkümpu ngoiye taowe tanlak.

¹⁵Nange nyiklak, hüyange taowe nangte janlak; hüyange nange lingngaipu yinmok üte nange moimanlak.

¹⁶Tüoyangpoi ü-yakai lilite nange yomnang, hüyange nange ü-ünute hüke yetüohtam.

¹⁷Taowe püohpinpu nyekhok ja me tüm shanang, hüyange nange ü-ünu tang me küptamnang.

¹⁸“Hüpoi kahtang leamme tapu kih-e, hüyange ü-oun me ngohpu long khüoh teinangpu kih;

¹⁹yenge longa kinne taipukih, hüyange wai üyong keipuwe kahyao phwnge tainang; tüokih-e nange kahta monghümpu menge tamnang.

²⁰Nange kahta tangme okpu ngenang hüyange I jin jintepu jingne shonne teinang; nange I sheta jeileitam nang I li ne tamnang.

²¹I hayim okkeshange ngainang, hüpoi Iye hatüo aope-o yeshing, yejema-a aope iman shaoshipu phei ngohlakei Iye tüopa-o yeteih tüo.

²²I yoi püm tangta me dakpu, hüyange I yoi kenmong shapyoongpu Iye hei shingpei nang.”