Read Konyak Naga JOB 15 Bible Online

JOB 15 - Konyak Naga bible

JOB 15

¹Hüwante Temanpa Eliphazwe jan:

²“Deitahpu kahta jawe wangyang ngaote janlak a? Hüyange yoi nying nyingke heongye wangyange seamuh tamlak a?

³Wongpong yenangpu ngao phei yejema-a hango yeling oklak ngao ngaopu phei, Iye teingaolak a?

⁴Hüpoi, nange Kahwangte nyampu tüohnang, hüyange Kahwang sheshao me phünphawe yoppu nyüo nyüoshe mahtam nang.

⁵Nange püohpinpuwa nang ngao kaiye hüonang; deitahpu ngaopa me pitte mahlak jingne nang ngang nang.

⁶Taowe nang yemei she ilak üjingne wongpong ne yeje; nange ngaopu ngaokek liliye nang yeitam nang.

⁷“Nang üwangne ngaipu kahta she teihnang kü a? Aope Kahwange kahtanglan ling, tüome nang ngoh a?

⁸Kahwange lowe tümme tapu me nang omyang a? Hüyange kahtanyuha shinge manpu kon-a nang jingne hei meng a?

⁹Nange shingpu toman-e hang yeshingpu? Nange shingpu toman-e yejai okpu ne hei?

¹⁰Shang shaotephei hüyange wupalan, hüyange nangpa phei nehoi lwngmeilan toman phei ngohnang.

¹¹Kahwange meiye tampu hüyange nang phei nyaishüm-e ngao pu a nang jingne üjoiha ne mengpu a?

¹²Hangne nang mongjang yeyoh okpu? Hüyange hangne nang mük taak-e ngaipu?

¹³Tüojingne nang yahawe Kahwang phei tüi-e yongnang; hüyange nang ju mepu hükihpu ngao ngaine tam nang?

¹⁴I jaoshe ngoh oklak ne kahta-a hanghe? Yejema-a shekowe puhpu ja, I khakshuwe ngoh oklak a?

¹⁵Kahwange yoi wangdang shongmokpalan te nehoi mong yehüm; I sheshao me wangdanglan nehoi yejao,

¹⁶hüma-a nunushepu hüyange yejaoyeshapu, hüyange yeng yingpu kih ünu yingpu kahta jang jang hangke üjoipa ne ilak!

¹⁷“Taowe nangte hüopha ning, üte jaipha; taowe hanghe ngepei, tüopa iphaning.

¹⁸Deitahpu kahtalan-e hanghe iye ang, iman payimlan mepu hanghe jaiyah hango lowe ye-ang;

¹⁹aoyinte hei kahtok-a pha, hüyange iman pa me yinpa ao-o linyetai.

²⁰Üyin jinküm-e, hüke shaoshine tampalan jingne wangpeng hangshin ityange ngoh, teshin-e ümenglan-a shangshih-e shaoshi nang.

²¹I na me nyam nyam shepu ngaowünge poklak, hüyange aope Iye taowa yinpu okteki she teihlakei kuhleihpalan-e Ite shümlak.

²²Wangnyak mepu yin oklak I jingne monghümlak yenang, hangjingne ima-a üken ja me I toilak jingne yanglow tanne ngohnang.

²³Hekola me hahlak yam-e, ‘Hatüo ümeken me?’ she iye iman waa-nang. Iman jingne ngoikülak hipak-a wangnyak me ngohnang she iman-e shingnang.

²⁴Shangpongpu hüyange shaoshi-e I nyam ne tam nang; Ahngpa ja shapju me tai ne tümpu kih-e, iman-e I naotam nang.

²⁵Hangjingne Iye Kahwang phei tüi-e yak no, hüyange üshei okpupa shao me ota.

²⁶Ree shejeipupa khüwyange, I phei tüi-e woowapu phei phetnang;

²⁷hangjingne I sheta üyao shaha, hüyange I shiengshüm me ühak neiyange,

²⁸Iya heamtepu chingnyu ja me ngohlak hüyange ümeken me ao-o ünyoipu noklan ngoh, hüyange hatüowa long phonge tüohpu ne meng.

²⁹I hakpa ne hipak laowe yengohlak; Iye ompu hanghe-o üküm ngoiye yengohlak. I yashüm nehoi yenangpe mahlak.

³⁰I wangnyak mepu yeyan oklak. I-a pee ja leye hanghepa üqui üyaklan vünne shuwe tam, hanghepa üyoilan wangyange puwe teinang.

³¹I jajang japute monghümlak jingne wangngoiye pompune mengma-a, hüma-a I hünghao ne-a hatüo jajangjapu menglak.

³²I hipak linne mantaipe I kuimahlak, peequi ja leye kuimahlak hüyange aope-o üyoi yengailak.

³³I-a wuwüngwu hanghepawe manyimpu wuwünglick te powe tamnang tüokih-e ngohlak; üpeng yeitampu olive pee kih-e ngohlak.

³⁴Hangjingne Kahwang yeshingpu kahtalan huhayim yenanglak , hüyange yakjai yahpuwe wepu noklan-a vünne shutam nang.

³⁵Iman-e ümengpa ü-o-we tamnang hüyange ünu ngaitam nang, hüyange iman mongjange jinte lowelamlak tüm nang.”