Read Konyak Naga JOB 16 Bible Online

JOB 16 - Konyak Naga bible

JOB 16

¹Hüwante Job-e jan:

²“Hükihpu ngaolan taowe maa-e jaiyangki; numan-e phapu toloimei-a shaoshi üyong nehei ngoh nang.

³Numan-e yelakpe ngaowe ngohlak a? Numan-e hipak lep iye ükümpa ngao ngaopu ngohlak a?

⁴Numan ü-nyoi me shot hüyange tao numan nyoi me shot ngoh shihma-a, numan-e ngaowe tampu lili taowe-o ngao hahpei. Taowe kentamong tingpu phei ü-ngüm shengyange numante yekümpe ngaotam hahpei.

⁵Taowe hengtampu ngaowe numan wongnang ne tamhahpei hüyange numan toloimei tamlak jingne yelakpe ngaohah pei.

⁶“Hüpoi taowe ngaopu hanghe-o üte yejam, hüyange yengaope ngohpuwe-o üte jeihdakpu yelaktam.

⁷Ütingme, O Kahwang, nange tao boiye tamteki; nange tenok lanshe toi tamteki.

⁸Nange tao pho; nanga ü-wepa. Taowa üsho hei üwaan shaha, hüyange taowe püohpu phei tüi-e she kahtalan-e inang.

⁹I mongshih ngaiye Iye tao hitte tam, hüyange üte müktak; Iye üte yoi fa ngaowe tam; ü-wepawe üte yemeipe leinang.

¹⁰Kahtalan-e üte ümeng ngaotam nang; iman ü-neikon-e jemyange ü-shetate yakpha khüw-e lei tamnang;

¹¹Kahwange yejaoyeshapalan te tao phayangki, hüyange ümenglan yak me shongkülonge shüptamnang.

¹²Tao nyailüm mei-e nyoi ngoh, hüpoi Kahwange tao üng me phütte yah, hüyange shu-ngüm-e hüyange khoi tam. Iye taowa wonne wange weihlak jingne jon;

¹³I jing wenglah jonpalan-e ü-neikon nang; shüpshe yenangpe Iye ü-titoi te lüt tam nang, hüyange kahtok te ü-yukhah shaitam nang.

¹⁴Iye üte maako shakhan sha; naomeipa ngaloong pu kih-e Iye üte shüm nang.

¹⁵Tao shappe yoong hüyange monnye inkhek ne in, hüyange tao tüome kahmak yo me ye-okpe shot.

¹⁶Shapyoong puwe ü-sheta taakke, hüyange ü-mük peakteki hüyange tüngkünei ngaiteki.

¹⁷Tüoyangpoi taowe toilange ümeng lingpu hango yenang, hüyange taowe Kahwangte yoppuwa ütingpa me ngohnang.

¹⁸“O kahtok, üte lingpu ümeng tah lo tam! Ütingpa jingne taowe üngwünpu hüke tah tüoh!

¹⁹Sha-a nehoi, ü-phei jam-e üjingne saki phawe yonglak jingne wangdang me ütam ja ngohnang.

²⁰Ü-shümpalan-e üte yaowe lenang; Kahwang tangte ü-mükphi yünnang.

²¹Kahta jawe yoi shümpa ja jingne yoppe tongpu kih-e ü-jingne Kahwangte yoppe tonglak jingne taowe kahta ütam lengnangki.

²²Hangjingne aope wangpeng ütenja linlakei, tao aope-o leih yeyelak lamte yayonglak.