Read Konyak Naga JOB 19 Bible Online

JOB 19 - Konyak Naga bible

JOB 19

¹Hüwante Job-e jan:

²Hangshin laowe numan-e üte ngao uhtam ne! Hüyange ngaomeng kaiye paikhoih tampu?

³Pen te ngoishe numan-e üte yaoleyangki; üte ümeng lingne numan yewüo a?

⁴Ütingpa me tao püohpin ngohyapoi, Taowe püohpinpuwe üte hei shahlak.

⁵Üphei-a numan shemeipupa she, hüyange tao shao shipuwa ü-ünu ütahte ngainang she teih ngaoma-a,

⁶hüma-a tüo shingyah, hüke Kahwange ü-ngao püohpin ne tamyangki; hüyange ü-neikon-e yoi shaan shaiyangki.

⁷Taowe üngwün yapoi taowa püohpa ne lingtam, jan yepu hango yenang. Ütingpa ngaophün tamlak jingne taowe üngwünpute aowe-o yejai.

⁸Kahwange tao tailam tienteki, hüyange taowe yekai ok; Iye ü-lamnyuwa wangnyak me lo ne tam.

⁹Ü-minyong ngampai Iye khoktam, hüyange ü-shang mepu ahngpa shaoshaoh yahteiteki.

¹⁰Iye üshei yekao me tao phün-hit teki, hüyange taowa teine tamteki; Iye ümonghümpuwa pee ja kih-e bhei tamteki.

¹¹I mongshih ngai, hüyange ü-phei tüi-e wenneka nang; hüyange taowa I jingne wepa ümeng she teih nang.

¹²Üte shümlak jingne Iye yoi nyahponglan shon; hüyange iman-e ü-nyenok omme yahyange neikon-e kahsa shao.

¹³“Iye tenok noksa-a Ü-mepu yeonge jai-e angtam; hüyange ü-phei teishinpalan khongküm ü-mepu toklüp küm ne tam.

¹⁴Üpheipulan hüyange shümpa ümeilan shaaji yanteki; Ü-shümpalan-e tao pemei teki.

¹⁵Aoyin tenokte yinne ngoiye ngoh iman-e tao pemeiteki; Ü-shaoshanpu naoyhalan-e yinpa hüyange ülao kahtalante teihpu kih üte teihteki.

¹⁶Taowe ü-shaoshanpate nyik, Iye yejan, taowe üte jampha she Ite tongyapoi yelei.

¹⁷Ü-shekowe ü-lüo yepehu, hüyange ü-phei jam-e puhpu ünaolan ü-shong te yepei.

¹⁸Nahalan nehoi aope iman-e tao nge, phoi tamnang hüyange nyi-tamnang.

¹⁹Ü-mongjüm lan üshei-e üte nuwe lei; aoyinte taowe ünyei ken iman ü-phei tüi-e yongnang.

²⁰Ü-waana üsho hei lümyange ngoh nang, hüyange pali she hei tao üyin me ngoh nang.

²¹Numan ü-shümpalan! Üte shüpshe tampha! Kahwang yakke üte shütte taiteki.

²²Kahwange shaoshi tampu kih-e hangne numan-e üte shaoshi tampu? Üte wangman-e shaoshi yepha tam a?

²³“Ütamjawe ü-ngaolan teihtüo yange, hüyange tüolan-a laitep ja me nyan-e angshih phang she taowe teihnang!

²⁴Yejema-a jinjinte minngoh te ne, ü-ngaolan-a long ja me yanjüp-ha phei watte nyanshih phang!

²⁵Hangjingne Ü-yinyepa üyin me ngohnang she taowe shing; hüyange üküm yeme I kahtok me yongkülak.

²⁶Ü-püm, daktin ne hah taiyapoi, hatüo püm tangta me ngohwante muh taowe Kahwang ngelak.

²⁷Ü-mük-e taowe I ngelak, hüyange I-a yinpa ja ne-a yemenglak. Nange ngaopu jingne ümong hümpuwa payangki.

²⁸‘Teman-e hangke I shaoshi üyong phei pongtamlak’ she nange ima-a, ‘Ümeng yalah tüokülak’.

²⁹Hüpoi sha-a, yanglow te nyamyah, yanglow hanghepa ünu tang me Kahwang mongshih ngaipuwa yah peinang, hümme nakshih numan-e kahphünpa ja ngohnang she shinglak.”