Read Konyak Naga JOB 2 Bible Online

JOB 2 - Konyak Naga bible

JOB 2

¹Ülao nyih ja wangdang pinlan iman nying nyingke Youngwanpa sheshao me jemlak jingne pei, hüyange satan-o I nying nyingke Youngwanpa sheshao me pei ngoi.

²Youngwanpawe satante tong, “Nang ümeken mepu peipu?” Satan-e Youngwanpate jan-e ye, “Kahtoknyu me tai tai yeye hüyange tüopa me ta ta ongong she kempupa.”

³Hüyange Youngwanpawe satante i, “Ü-shaoshanpa Job nange ngeye okya? Kahtoknyu me wange ngoipu hüyange ümeng yenangpu kahta, Kahwangte nyampu hüyange ümengpate nupu I kihpu ao-o yenang. Hangne-o yejepute I menge tamlak jingne nange I phei tüi-e nange üte yohyapeyoi, sha-a te ngoiye I ütingpa me tükyange ngohnang.”

⁴Satan-e Youngwanpate jan-e i, “Kahta jawe üyin tükke anglak nanjingne I me ngohpu khongküm phakülak.

⁵Hüpoi sha-a nange nang yak nowe I waan hei meite mayah tamküma-a Iye nang sheta te phoiwüm külak.”

⁶Tüokhei Youngwanpawe Satante i, “Meiteki, I-a nang wong phang me ngohnang, hüpoi nange I üyin hei tahyah.”

⁷Tüophei me Satan Youngwanpa sheshao mepu yanne tai, hüyange shangtang mepu tawe yalan ngoiye maa üyong Job tangme ngaine tam.

⁸Job-e I nying nyingke maa te kotlak jingne longtük khüoh ja yah, hüyange I taipuwe makwinjing me shot.

⁹Hüwante I shekowe Ite i, “Nange üne-o ütingpate tükyange ngohpu a? Kahwangte phoiwüm tüoh hüyange litüoh.”

¹⁰Job-e jan-e ye, “Nange-a juteih yenangpu sheko jawe ngaopu kih ngaonang! Aope Kahwange temante meipu phayapeih, teman-e tüopa-a yah. Hangke teman-e ümengpa shonwante yemei she ilak shi?” Hüke tüolan shangepongpu üshei me Job-e I jupenne ünu ye-om.

¹¹Sha-a Ite wengtuh tüolan khongküm peipu Job shümpalan lüm-e jaiye, iman-e yoi yoi nyoi mepu pei; Teman chingnyu mepu Eliphaz, Shuah kahtok mepu Bildad, hüyange Naamath kahtok mepu Zophar: hüyange iman mongmengpu hüoyange I toloimeiye tamlak, I tangte peilak jingne iman-e jamshe hipak it.

¹²Aope üjai memuh iman-e I nge, hüpoi I yang she yeshing ok; hüwante iman-e ngao ngaiye shap, hüyange mongmenge iman liliye yoi yoi inkhek hit, hüyange wangyete iman shangtang me kahmak phu.

¹³Tüophei me iman tüoken me nyih nyit pha nyit I phei kahtok me shot; hüyange aowe-o Ite ngao ja nehoi yengao; hangjingne I shaoshipuwa jamloi yongpu she iman-e nge ok.