Read Konyak Naga JOB 20 Bible Online

JOB 20 - Konyak Naga bible

JOB 20

¹Hüwante Naamathpa Zopharwe jan:

²“Jaikhu! Nange tao shangmuwe tamnang, sha-a taowe yejanpe yengoh ok.

³Nange hanghe üte ngaoyangki hatüowa teetampu, hüpoi taowe nangte hangke janne yelak shingnang.

⁴Nange shingya, hatüo ülang memuh kahtoknyu me hangko kahta ngaitampu me pei-e,

⁵ümeng kahtalan-a hipak laowe mongmeiye yengoh ok, hüyange Kahwangte yemengpalan mongmei-a ütenja jingne hei she,

⁶I-a wang ngoiye daowe onge üyongne jongyapoi, jamloi yonglüopuwe I shange wangphom yüoyapoi;

⁷hüpoi I-a yoi ih ja leye puwe mahnang. Aoyinne I shinge ngoh, iman-e, ‘I ümeken me taipu shi?’ she yashanlak.

⁸I-a shinmang ja leye, wangnyak me ngepu himang ja leye mahlak, hüyange nishe aope-o ye-ngelak.

⁹mük hanghe ye I nge shaaji I ye-ngelak, I ngohyangpu nyoi mepu shaaji I ye-ngepe laklak.

¹⁰I hayimlan-e toihalante yayeng yamlak, hüyange I yakke I moth leih phalak.

¹¹I püm-a üne-o naoshe hüyange wongnangju me, hüpoi hatüo mamshe kahmak ne menglak.

¹²“I ju me ümengpa meiye teihyapoi, Iye yoi yeephang me tüopa lo yapeyoi,

¹³Iye tüopa lünge taine yemongyapoi, hüyange Iye yoi ju me küwyange ngohyapoi;

¹⁴tüoyangpoi I seanyu me nük-a ükhah ne meng, soihüng ütam khahpu phei shekhah she khah.

¹⁵Ümeng kahta Iye yopu moth-a faiye ngainang; Kahwange I seanyu mepu nehoi yahye nang.

¹⁶Iye pu soihüng hüplak, soihüng pheipu puwe I toitamlak.

¹⁷Yaoyüp ngaipu yengyin hüyange zahtai jelo yünpu ngene I üyin me yengohlak.

¹⁸Iye towe nyaiye linge ngaipu khongküm tüohlak; I moth tangme hoongli mongonglak yetüolak.

¹⁹Hangjingne Iye toihalante shangne tam hüyange yeleipe tüoh, hüyange ütam jawe weyangpu nokte yakke lük hüyange nyie-e yah.

²⁰“I sea aope-o yemoh tepuwe, Iye monghümpu moth Iye üjingha nehoi yeyo oklak.

²¹Aope iye hah, hango yetüoh pe hahküm, tüokhei sha-a I jaalunpuwa üküm ngoi peinang.

²²I sheminlam phe-e wangngoiye ngohyapoi, I toinan nang, toinanpu üju khongkümpu I tangme peilak.

²³Aope Iye yoi sea mohlakeih, Kahwange I phei tüi-e mongshih ngaipu, hüyange I tangme waikeipu kih-e yaklüktampu peilak.

²⁴I yan ngouyang mepu yinlak jingne nganglak, hüpoi shakphan yan wenglah-e Ite keppe yeilak.

²⁵Iye hatüo teaknang, hüyange hatüowa shiengshüm yekao me ngainang; hüyange phihlangpu lahhan-a I mang mepu teakke yahnang; I tang me nyam nyam shepuwe ngoi nang.

²⁶Iye tünne angpu shemin lamphe menge küm; kahta yakke yejakpu vünne I hüyange Inok khongkümpu hah.

²⁷Tüopa kahta ünu wangdange pheakke ngai, hüyange kahtokke I phei tüi-e saki pha.

²⁸I jing moth üshei Kahwang mongshih ngaipu muleampuwe menge winlak.

²⁹Hatüowa ümeng kahtalan-e monghümpu, Kahwange iman jingne nyinge tampu mong hümpuwa hatüo.”