Read Konyak Naga JOB 21 Bible Online

JOB 21 - Konyak Naga bible

JOB 21

¹Hüwante Job-e jan:

²“Taowe hanghe iyapeih meimei-e jaitehu; hüyange numan mepu toloimeitam pupa-a halan ne mengtüoh.

³Ngaolak jingne üte hipak yahkei, hüyange tüophei me aope taowe ngaowe sholakei, numan-e lengma-a üte phoiwüm tüoh.

⁴Taowe ngaopuk hümpu-a hangko kahta te hei? Tao hangne nün-ye-oklak?

⁵Üte leiyah hüyange yashantüoh; hüyange nang ju me yak-e yimtüoh.

⁶Aope üte hanghe ngai tüopa teih tüolakei, tao mokh-e, hüyange ninne jint-ne teihnang.

⁷Hangne Kahwange kahta ümenglan jinlao ne tam-e, iman wu ne tam-e hüyange okkeshangne tampu?

⁸Iman me hayim hüyange huyim ngohnang, hüyange iman jongpute leine üyin angtam nang.

⁹Kahwange iman noksalante mahlakpa hango yepeitam; iman aope-o nyampu phei yenyoi.

¹⁰Iman jing mahu üponglan-e yeshaipe üli jongyatam nang; iman mahu ünyulan-e üha puhnang hüyange aope-o mengyewin.

¹¹Iman-e iman hayimlan mantoop kih-e teinang; hüyange iman hayim neikon-e lokleinang.

¹²hüyange kongki ümtük hüyange viwo shengli wünge poloknang.

¹³Iman üyin chingmei ngoh-e linnang hüyange shaoshi ye-ngepe yimshon te ta nang.

¹⁴‘Ümenglan-e iman shaha tüohpha,’ she Kahwangte inang; iman üyin jingne Kahwange mongpu iman-e yeyahhu.

¹⁵‘Kahwang shaoshanlak wongpong yenang’ yejema-a, ‘Ite yoppu me ümei ngaipu hango yenang ja’ she iman-e teih nang.

¹⁶Iman-e okkeshangpuwa iman yoi wong kaiye oknang she iman-e inang, hüpoi iman juteih wanglam-a taowe yemong.

¹⁷“Ümenglan vüntük hangshin me mahnang shi? Hangshin me wengtuh iman tangte peinang shi? Hangshin me Kahwange I mongshih ngaipuwe shaoshi tam-e phanang shi?

¹⁸Hangshin me iman wangnyange puwe teipu tahphan kih-e, yejema-a wangyang wangyi me puwe teipu kahmak kih-e teihnang shi?

¹⁹Numan-e inang ‘Ipa ünu jingne nahate shaoshi tamnang.’ Yeje! Kahwange ünulante imante shaoshi ne tamtüoh; Iye hatüowa iman ünu jingne linge tamnang she Iye hüone tamtüoh.

²⁰I yoi mük-e I mahpu nge ne tamtüoh; iman-e ütahpa Kahwang mongshih ngaipu nge ne tamtüoh.

²¹Kahta ja üyin jin linne taitephei me, I hayim mongmeiye ngohyalak she Iye üting me mongshange teihlak a?

²²Aowe aoyin ütangpa nyoi jinglan me ngohpute nehoi ngao phün, tüopa Kahwangte kahtawe nyüowe tampu ok lak a?

²³Kahta ütam iman lipu nyih te ngoiye nütte ngohnang; iman moh hahyange mongmei me linang;

²⁴I pümtangta mei-e uhying, hüyange Ijing waan-a waanli wangman-e.

²⁵Ütam-a mongmei lan she yeshingpe iman nyoinang hüyange ükhah mongjang phei linang.

²⁶Iman üshei jakih-e kahmak me linang hüyange munang; iman khongküm yonge hahnang.

²⁷“Üte ümengpa linglak jingne nange hanghe teihyange tümnang taowe shing nang.

²⁸Numan-e inang, ‘Shaapa-a kahta üyongpa nok a üpu? Aowe ümengpa ling, tüopa kahta nyenok üpu?’

²⁹Aoyin kemme yong nang iman phei numan-e tei yengao a? Iman-e yah yepu ngaolan numan-e yeshing a?

³⁰Ütuh hipak me kahta ümenga tükke angnang, hüyange mongshih ngaipu nyih me iman yinnang.

³¹Ümeng kahta te ümeng pholak yejema-a Iye lingyangpu Ite leih phalak ao-o yenang.

³²Aope I mangjongte yah teilakei, nyamlak yenangpe yomyangpu I mangkoksa te angnang,

³³haja tokte haja mang lünge tainang, hüyange kahtok nehoi I mang tang me jünge toloi meinang.

³⁴Hüma-a numan! Angsa te numan-e üte toloimeiye tamlak jingne ngang nang! Numan-e jan ne yepu lili-a tahleih shaha!”