Read Konyak Naga JOB 22 Bible Online

JOB 22 - Konyak Naga bible

JOB 22

¹Hüwante Temanpa Eliphazwe jan:

²Kahwang jingne kahta-a wongpong ne menglak a? Juteih konjong pheipupa nehoi Ite wongpong ne menglak a?

³Nang khakshupupa ne mengpuwe Kahwangte-meipu ngohlak a? Yejema-a nang lamnyu meiye angpuwe Iye küw jetüolak a?

⁴Nange Kahwangte nyampu jingne Iye nangte teetampu hüyange nang ngao phünpu a?

⁵Yeje, hüpoi nange ünu jamloi lingyangpu jingne; tüo lili-a nange lingyangpu ünu jingne peinang.

⁶Hangne-o üjepute nang jeiheinaote toitei tam, nange I mepu inkhek yahtai hüyange inlak yenangpe tangko me tüoh.

⁷Towe nyaiye yengle palante nange yeng yephape ling, hüyange aoyin seanyao nange nük ye uhtam.

⁸Nange nang wong hüyange nang mothkat-a kahtok nopu yahlak jingne hei jon.

⁹Nange wamnyulan yakkengme tei ne tam, hüyange khahhalan mepu nyie-e yah hüyange imante yemeipe jon.

¹⁰Tüokhei sha-a nang neikonne tün tünyange ngohnang, hüyange mokhshe peipu wengtuh-e nang shangnang.

¹¹Nang wangngai-a nange ü-nge oklak ne nyakteki, hüyange yeng muleampuwe nangte yüohnang.

¹²“Kahwang-a shedaopupa wangdang me ngohpu ne yeje a? Hüyange iman yeonge daowe ngohyapoi, shanhalante leiye yetai a?

¹³Tüoyangpoi nange tongnang, ‘Kahwange hang shingpu? I-a lowe ngohnang Iye temante ngaophün lak?

¹⁴Hüke I wang hei kahtok nipa shüpneiye kem, jeile-ehpu wangphom-e büangpu jingne Iye ye-ngelak’ she nange teihpu a?

¹⁵Hanghe lamnyu me ümenglan kemnang, tüopa ülangpa lamnyu me nang jinte kemne mongpu a?

¹⁶Iman-a iman jing hipak ngoishao me nye-yahteinang, iman nokjinga muleampuwe kinteinang.

¹⁷Iman-e Kahwangte i, ‘Toman shaha tüohpha!’ ‘Ütahpawe tomante hanghe lingpu oklak?’

¹⁸Tüoyangpoi iman jaalun-e nok maa-e tampuwa Kahwang ngohnang, ümenglan juteih taowe shinge ye-ok.

¹⁹Khakshupu lan-e ümenglan shaoshipu ngenang, hüyange mongmei nang, hüyange ümeng yenangpu kahtalan nyi-e inang,

²⁰Ümenglan-e ange nangpu khongküm menge winnang, hüyange hangheyin towe ngohlakei vünne shuwe tam nang.

²¹“Kahwang phei chingmei lingyah hüyange I phei weihkhupu laktüoh; hüke lingma-a, nangte moiman peilak.

²²Iye nyüowe tampu yahtüoh; nang mongjangme I ngao angtüoh.

²³Üting, nang innenyaiye Kahwang tangte leih yetüoh, hüyange nenok me lingyangpu toimeng khongkümpu mahne tamtüoh.

²⁴Nangjing hon wintüoh; nangjing shemeipupa hon-a eawahpu yengyin tokme shüngtam tüoh.

²⁵Hüyange Ütahpa Kahwang-a nang hon ne mengtam tüoh, hüyange nangjing shongnyu jan ne I khüm ne mengtam tüoh.

²⁶Hüwante nange jinte Kahwangte monghümlak hüyange nang jingne mongmei lamnyuwa I she nange ngelak.

²⁷Nange Ite yoplak, Iye nangte janlak, hüyange nange jiengjeppu dopu phapu oklak.

²⁸Nange lingpu khongkümpu me nange okpu ngelak, hüyange nang lamnyu me wangngai teelak.

²⁹Kahwange otapalan shui ye nang, hüpoi innenyaipalan Iye yinlak. Aoyin yemei iman nehoi Iye yinlak.

³⁰Nang ümeng yenangpe ngohma-a, hüyange hanghe ling ütingpa me ngohma-a, Iye nang yintamlak.”