Read Konyak Naga JOB 24 Bible Online

JOB 24 - Konyak Naga bible

JOB 24

¹“Hangne Ütahpawe ngao ilak nyih ja, hüke aoyinne I shaoshan iman jingne ütingpa ngaophünpu nyih ye-itpu?

²Kahtalan-e yikeng long bhei win nang; iman-e nyeelan kuhnang hüyange uhyingnang.

³Iman-e khahalan jing gado aiye tainang, hüyange wamnyulan jing mahu üpong yhawe pheeisea manpha manpha tükke angnang.

⁴Iman-e toihalan-e iman meitam tüolak mepu tiennang hüyange toihalante phette taiye lolak jingne kangnang.

⁵Tüokhei toihalan, phao gado kih-e, phaonyu üko me hahying yamnang; ümeken me-o iman-e iman hayimlan jingne hahying yetüo.

⁶Iman jingne yejepu kah mepu iman-e tahyah nang, hüyange kahta ümenglan-e wulick kah mepu wuwünglick khai nang.

⁷Inlak yenangtei-e, iman wangnyak phapan tangko me linnang; Wangshüm meine inlak iman me hango yenang.

⁸Kahtang mepu yünne tapu waiye imante team nang, hüyange lolak ken yenangpu jingne iman-e longnyu longsa me lonang.

⁹Khahalan naotak me rha ne nyie yahnang, hüyange toihalan hashih nahalan-a pheeisea nanleiye yahnang.

¹⁰Iman inlak inkhek yenangpe tangko me tainang; wheat tah yahjang yah-e iman-a seanyao nang.

¹¹Iman-e minnga jingne olive, hüyange wuwüngti jingne wuwünglick phütnang, hüyangpoi imanpa-a yengle nang.

¹²Chingnyulan me mayah yange ngohpalan hüyange towe nyaipalan üngwün nang, hüpoi Kahwange iman-e yoppu ngao yeyah.

¹³“Wangngai yeyahpe tienpu kahtalan ngohnang, iman-e tüopa jeng yeshing yejema-a ümeken me tüopawe lam hüo yetai.

¹⁴Toihalan hüyange hango yenangpalan toilak jingne wang manngaipe kahta toipalan shinyang nang; hüyange yaning me Iye kuh-e I kemnang.

¹⁵Phwngngampalan-e wangmangpu tannang; aowe-o ye-nge tamlak jingne Iye shangme inkhek lümnang.

¹⁶Wangmang me kuhpalan-e nok mengnang, hüpoi wangngai ye-ngelak jingne nyihning me iman lonang.

¹⁷Hangjingne iman khongkümpu jingne wangnyak jeilehpu-a napning kih-e ngohnang; hangjingne iman-a jeilehpu wangnyak shümpalan ngohnang.

¹⁸“Kahta ümenga muleampuwe phwnge teinang, hüyange I jing meitam kahtokte Kahwange phoiwüm tamnang; I shaaji wulick kah hamne yeta.

¹⁹Wanglümpu hei heleipu jingne yi ea mahpuke, tüokih-e ünu lingpu kahtalan-a yimshon-e nyie yahnang.

²⁰Naonyoi-o iman pemah, iman me kahta hahpu yong mongmei, iman teihtüopu shaaji yenang; tüokhei ümenglan-a pee ja kih-e toitanang.

²¹“Iman-e wamnyulante yemeipe jon, hüyange ha-nao yenangpu shekolante shüpshe yehüopu jingne ngainang.

²²Tüoyangpoi I üngan wong kaiye Kahwange wongnangpalan üyin angtam nang; I üyin ngohlak she Iye ütingyelak yapoi, I laonang.

²³Kahwange iman üyin meiye ange tamne ok, hüpoi hipak lep iye imante mük-e leiye angnang.

²⁴Hipak ütenjapu jingne iman-a jaalunne tamnang, tüoyangpoi I hüng ja leye kui mahnang, wongli üshaoh lange winpu kih-e wintam nang.

²⁵Hatüo hüke üjeja she ütam jawe ipu oklak a? ütam jawe hatüo ü-ngaowa üting üjeja she saki phalak a?”