Read Konyak Naga JOB 28 Bible Online

JOB 28 - Konyak Naga bible

JOB 28

¹“Ütingme noong ngohnang ümeken me khüm shaonang; hüyange hon shienne yahjing nyoijinglan ngohnang.

²Kahtawe kahmong mepu yan shaonang hüyange longyo mepu laang jakke ngainang.

³Kahtalan-e shenyak shelu shepu pheaknang; iman-e shelupupa kahtok yam nang; hüyange longnyu jingne wangnyak me shüonang.

⁴Kahta ao-o ünyoipu üjai me yejema-a kahtanyuha ya aope-o manlokpu, kahtalan-e longdung shaonang. Tüoken me iman-e wüngmakke toi lingnang, kahsa wu me jhotyange lüpshüp nang.

⁵Kahtok kaiye hahying ngaitam nang. Hüpoi kahtok ümong me tüopa kahtok ja muh khüw-e phüppe vün hahnang.

⁶Kahtok ümong mepu long yo me sapphires omme ngohnang, hüyange tüopa kahmak yo me hon omme ngohnang.

⁷“Noongmong mepu lamnyu awlan lanshao hanghe-o mannge, hüyange tüolan tang me pongkon aope-o manpu.

⁸Yengkong mailang yejema-a otapu ülao yinmok aope-o tüopa wüngmakpu lamnyu me mankem.

⁹“Kahtalan-e shewanpupa longnyu shao nang, kahtanglan-a iman lamnyu ne shaowe winnang.

¹⁰Iman-e longnyu lüowe kahsalam shao wante, iman-e toinyu long tüonang.

¹¹Iman-e yengyin ngaijing ken shao. Hüyange hanghe lowe ngoh wangngaite yah ngainang.

¹²“Tüoyangpoi konjonga ümeken me tüolak? Shinge yahlak jingne teman-e ümeken me nyüolak?

¹³Konjong kahtalan yo me tüolak ne yeje; Tüopa ütingpa jeng aowe-o shinge yenang.

¹⁴Shelupuwe inang, ‘Hatüo üme yenang;’ yengchinge inang, ‘Hatüo ü-phei yengoh.’

¹⁵Hatüowa shemeipupa hon phei shak ne ye-ok, yejema-a tüopa pheei jingne khüm phei tok ne ye-ok.

¹⁶Shemeipupa hon, hüyange onyx toinyu longe tüopa ümee ne phapu ye-oklak.

¹⁷Hatüowa hon phei sheyih sheyongpu, hon hei peilei yaha wan phei shenyeipu.

¹⁸Konjonga sheak yejema-a phutti yejema-a yüknyu phei sheyih sheyongpupa.

¹⁹Shemeipupa topaz hüyange ütingpa hon ne-o konjong phei phinne tokne ye-ok.

²⁰“Hüma-a konjong ümeken mepu ngaipu? Ümeken me teman-e shinge yahlak jingne nyüolak!

²¹Yinmoknyuha aowe-o tüopa ngene ye-ok, puwe ngohpu awha nehoi ye-nge.

²²Lipu hüyange mahpu lan-e nehoi, ‘Toman-e ngaowoong hei jai ki’ she inang.

²³“Kahwang shahawe konjong ümeken nyoi mepu tüo lamnyuwa shingnang.

²⁴Hangjingne ima-a Iye kahtoknyu üküm ngoiye ngenang, wangphang me hanghe ngoh khongkümpu ngenang.

²⁵Aope Kahwange wangyangte I wong pha, hüyange yengching hangshin ngohlak sheamme nyüo;

²⁶aope Kahwange wai-a ümekente yeilak tümme sho; hüyange wangkhong-wangkhak wangphom kempu lamnyu tümme sho;

²⁷Hüwante Iye konjong nge hüyange tüopa hangshinpu tokke lei. Tüopate hüke Iye mongpu tüm me sho.

²⁸Hüyange Iye kahtate i, ‘Youngwanpate nyamlepu-hatüowa konjong, hüyange ünu mepu yanpu-a shingyahpu.’ ”