Read Konyak Naga JOB 29 Bible Online

JOB 29 - Konyak Naga bible

JOB 29

¹Job-e phinne ngaopu üne-o ngaone ükong wang, hüyange hüke i:

²“Oh, Kahwange üte paowe angyangpu hipak kih-e üte ü-üyin nishe tüopa hipak ngoishih phang she teih nang.

³Aope ü-shangtang me I jing vüntük hüotam, hüyange I wangngai-e tao wangnyak kaiye kem!

⁴Aope tao jaalun tüowa tüolan nyih hipak ne ngoh, hüyange Kahwang shümpalan-e tenok yinne ang.

⁵Ütahpa Kahwang-a hüwante ü-phei ngoh, hüyange taowa ü-hayimlan-e neikon yange ngoh.

⁶Aope ü-yafünlam-a düamyeng phei poi jao, hüyange longnyuwe üte minnga-a yengyin ne menge yüntam!

⁷Aope tao chingnyu peten te ngai, hüyange chingjem nyoi me taowe ü-shotjing yah,

⁸naoshe lan-e tao ngepu phei jam she nyoijing sheng, hüyange üte wangshüm phalak jingne lwngmeilan yong.

⁹Ahnghalan-e ngao ipu mepu lak, hüyange iman ju me iman yakke yüm;

¹⁰Ükhe-üyonglan-e ngao yengai hüyange iman yee deptao me yepope lak.

¹¹Aope na-e jai, tüowe üte ngaopha, hüyange aope mük-e nge, tüowe saki pha.

¹²Hangjingne toinanpalan üngwünpute, taowe imante jam; khah-halan ao tangte leih üyepalan taowe yintam.

¹³Shaoshi loishe ponge pali shepulan mepu minyongpu üte pei, hüyange taowe ülam yenangpu wamnyulante pao.

¹⁴Taowe nyemo inpu kih-e, khakshupupate innetam; taowe khakshuwe ngaophünpu-a ü-phakshaoh hüyange shangnyeihkhek ne menge ngoh.

¹⁵Taowa mük müopalan mükne hüyange yafaipalan ya ne ngoh.

¹⁶Toinanpa jingne taowa Ipa kih hüyange tao yeshing okpe pongpu yinpa taowe yam.

¹⁷Mengshipu kahtalan wong taowe menge win, hüyange iman ütuh mepu yintam.

¹⁸Taowe teih, ‘Tao ü-yoinok me lilak, ü-nyihlan-a pheihkek shin-e ngohlak.

¹⁹Taowa jinte yengme teamme ngohpu pee yalah kih, hüyange hanghepa pequilan nyim teamme ngohnang tüokih-e ngoh yangki.

²⁰Ü-müktishiwa ü-phei jaoshe muh ngoh, hüyange ü-weanglah-a ü-yak me üla me muh.’

²¹“Iman-e taowe hengpute, jünge tan-e ngoh hüyange taowe hanghe ngao tüote kentinge jai;

²²taowe aope ngaowe sholakei iman-e paowe ngaolak ne hango yengai. Waiyeng yütpu kih-e ü-ngao yüt;

²³kahhampalan-e lümlei hipak me waite nyikpu kih-e moilan-e ü-ngaolan jaiye yah.

²⁴Aope taowe imanpa me monghümpu yenangpe papu ngelakei taowe imante nyi-e tam; ü-sheta ngaiphaih-e hüowante iman mongyongne tam.

²⁵Taowe hangkiyih üshei yah hüyange ülam hüowe tam; ahngpa jawe I phei pulan woipu kih-e taowe iman woi, hüyange iman shappe yoongpu üshei me taowe toloimei tam.