Read Konyak Naga JOB 3 Bible Online

JOB 3 - Konyak Naga bible

JOB 3

¹Tüophei me Job-e ju ep hüyange I puhpu nyih te phoi wümne wang.

³“Tao puhpu nyihte phoiwüm tamtüoh; aope ya tao kahta ne seanyu me küwwe wang phoiwüm tamtüoh!

⁴Tüopa nyih-a wangnyak ne leih tamtüoh, Kahwang. Tüopa nyih shaaji teihne tahtam; shaaji aope-o nishe tüopa te wangngai tah peitam.

⁵Tüopa nyih-a wangmang hüyange wangnyak ülu ne mengtam tüoh; wangphom-e büangtam tüoh, hüyange wangngaite ünyakke shüngtam tüoh.

⁶Tüopa ya-a wangphom ünyak jeipuwe yüotamtüoh; Wangpeng tepu nyih yo me om ne tahtamtüoh; Lekeng tepu nyih lungtet me tah-om-tüoh.

⁷Hüke ükeng hüyange mongmei ye-ompu yaning ja ne lingtam tüoh.

⁸Phongyengpa aoyinne yengching phoi tükke oklak shing, tüopa nyih te phoitam tüoh she itüoh.

⁹Phombung me ngepu shanhalan ütee tahngai; tüopa ya ngoikülak monghümpu yenangpe angtam tüoh;

¹⁰hangjingne ünyu naonyoi taküp yeküptampu jingne, hüyange ü-mükshao mepu shaoshi yelotampu jingne!”

¹¹“Hangne tao ünyu sea me li ne yetampu, yejema-a tao puhpu phei jam she lipupa taowe lenghah shepu!

¹²Hangne ü-nyuwe yha yungkeng me Tao paipu? Hangne yhawe üte düam uh?

¹³Hüwante tao li shima-a, shaapa-a tao toloimeiye ngoh hahshepu;

¹⁴hüyange ahngnokyin lingeyepu kahtoknyu ahnglan hüyange wanglam lampalan shipu kih-e ngoh hahshepu.

¹⁵Ahngpalan aoyin nok me hon hei khümme maayange ngohnang iman kih-e tao shiteiye ngoh hahshepu;

¹⁶Yejema-a hangne üne-o manpuhtampu naha kih-e tao yemutam, wangngai aope-o manngepu naodak-ha kih-e?

¹⁷Tüokenma-a shaaji ümengpalan-e yeshih yekhah, hüyange towe nyaipalan-e üküm ne toloimeiye laknang.

¹⁸Tüoken me-a küpnok me küopalan-o jamshe nyailüm meinang; iman-e shom-aipalan üngwünpu yejai.

¹⁹Tüoken me üjoi üyong kahta lili ngohnang, hüyange imante shom-aipalan mepu rhapalan-o shapu yenangpe ngohnang.”

²⁰“Hangne kahtalan shaoshi yatenge nyoine tam? Hangne mongshang mongmengpu kahtalante wangngai pha?

²¹Iman-e lilak jingne tan, hüpoi hatüo aope-o yepei tam; iman-e toinyu nanha phei-a mangjongpa shelengpu!

²²Aoyin loishe hoongli mongong; hüyange aope iman-e mangjong tüo mongmei?

²³Hangne I tailam-a lowe angyange, aote Kahwange pepeyange angpu kahta te üyin phapu?

²⁴Hangjingne hahying nanlei, ü-lüoshümhepu üte pei, tao ukhyoongpu-a yeng shok-tampu kih peinang.

²⁵Ütingme Tao nyampu hüyange nyamme teihpu lili üte peiteki.

²⁶Tao chingmei yenang, toloimeipu yenang, hüyange ü-shaoshipu aope-o üküm yenang.”