Read Konyak Naga JOB 30 Bible Online

JOB 30 - Konyak Naga bible

JOB 30

¹“Hüpoi shaapa-a ü-phei naoli lan-e üte nyitam nang! Iman payimlan-a jinte tenok nyee-ükhong yo me kuiha ne nehoi ye-i-pe taowe ang.

²Iman-a jamloi nya-mengtepu kahtalan, üjingne toi linge tamne jamloi khupalan.

³Iman jamloi toinan hüyange nyaowele, tüokaiye iman-e wangnyak me kahtok üwan, phaonyu jong me pee yalah lante shainang.

⁴Iman-e phaonyu jong mepu peephaolan bheiyah hüyange tüolan hah, hang üwüng üyao-o yenangpu lailick yalah nehoi hah!

⁵Moilan-e iman-a kuhpalante jangpu kih-e ükhong mepu üngwünne jange teinang.

⁶Iman longsa me, wakkhüw nah me shaopu kahsa me nyoi ne ngai.

⁷Iman taiye phaonyu jong me yinmoklan kih-e wünne ka-nang, hüyange peshüm phang me üpong yetüope moppe jem nang.

⁸Angsakosolan, min yenangpu chingyang halan! Iman kahmük mepu jange tei.

⁹“Shaapa-a taowa iman hayimlan-e hem ne meng tamnang; iman sheshao me taowa nyitoi ne mengetam.

¹⁰Iman-e üte yeonge nuwe phoinang; ü-sheshao me iman-a jamloi meinang she teih, hüyange peiye ü-shetate iyphao nehoi phaowe tamnang.

¹¹Hangjingne ima-a Kahwange ü-weanglah khaiye hüyange wong yenangpe linge tam, iman ü-phin me mongshih ngaiye menge yong.

¹²Ü-yakjah ye me üyin yeshienpu ükhong yongnang; iman-e üya jingne tünkam angnang, hüyange tao khaitamlak lamnyu tümnang.

¹³Iman-e ü-lamnyu tienyange tao menge winlak jingne ngang nang; hüyange tüopa lakke tamlak jingne ao-o yenang.

¹⁴Iman-e üwo ja kaiye ü-üyin lamnyute shokke tam hüyange ü-tangme sünge tam-e peinang;

¹⁵Nyam nyam shepuwe üte naowe pei; ü-minyong ngampai wangyange puwe teipu kih tei, hüyange ü-toinyu nanha wangphom ja leye linteki.

¹⁶“Sha-a tao pali she ngohnang; tao shangepongpu jingne shesa meipu yenang.

¹⁷Wangnyak me ü-waante yelakpe jeihdak; tüoken me nyah-e jeihdakpu aope-o yelak.

¹⁸Kahwange üte ü-üngme phüt hüyange ü-nyemo nyeih toiloi menge tam.

¹⁹Iye tao sham yo me shüppe tam. Taowa mak ü-oun ja hüyange vünla ne mengteki.

²⁰O Kahwang, taowe nangte nyik, hüpoi nange aope-o yejan; hüyange aope taowe yop, nange üte mong yepha.

²¹Nange üte mengshi puphei kon; nang wong khongkümpuwe üte shaoshi yateng pha nang.

²²Nange tao wangyang me puwe teine tam; hüyange nange tao wangyang wangyi me poine tam.

²³Üting, hangjingne nange tao li ne tamlak jingne, hüyange üyin me ngohpalan jingne tüm yange angpu jemlak nyoite woilak she taowe shing nang.

²⁴“Hangne nange mengtepu kahta ja, ao hango lingne ye-oklak hüpoi shüpshe pha she hei ilakpa te shümpu?

²⁵Shaoshi pongpu kahtalan phei tao-o jamme yeshap a? Hüyange aoyin toinan tüolan jingne mong yemeng teih a?

²⁶Hüpoi aope taowe mongmei hüyange wangngai jingne mong hümme tan, hüpoi shaoshipu hüyange wangnyak yelakpe pei.

²⁷Taowa mongshangpu hüyange jeihdakpu kaiye tamme shonge khoih teki; nyih ja phei me nyih ja she shaoshipu ünyei pei teki.

²⁸Wanghe ütee hango yenangpe taowa wangmang me kemnang; tao ükhong sheshao me yongnang hüyange jamlak jingne yoppe tongnang.

²⁹Tao waowe eapuwa hiyan yejema-a yengmom awnyu waopu kih-e mongmeng puphei shaha.

³⁰Ü-püm hei tangta üshowa nyakke mengteki; taowa ü-dak phongte ki.

³¹Hipak ja me ümeken me hoongli mongongpu hem wüng jai, sha-a taowe shappe yoongpu hei mang shappu shaha jainang.