Read Konyak Naga JOB 31 Bible Online

JOB 31 - Konyak Naga bible

JOB 31

¹“Taowe naoyha ümei jate ü-mük-e lahnyikke yeleilak she jiengjeppu ja taowe yah.

²Ütahpa Kahwange temante hanghe linglak? Kahtanyuhawe lingyangpu toite Iye hangke leih phalak?

³Iye aoyinne yeshupu ling imante mahtampu hüyange menge tampu yeshon a?

⁴Taowe lingpu khongküm Kahwange ye-nge a, hüyange ü-yakaipu lili Iye iye yelei a?

⁵“Tao ngaoleih me kem ngohpu ne mengma-a, yejema-a lolamlak jingne ü-ya mokpu mam-e kem ngohyangpu ne mengma-a;

⁶Kahwange toklak me tao khakshuwe tokke leihu, hüyange tao hangshin yepüoh yepinpe ngoh Iye ngelak.

⁷Tao ütingpa lamnyu mepu lüppe yepu ne mengma-a, yejema-a ünupate tao yütne tampu ne mengma-a, ü-yak ünu me nuwe tampune mengma-a,

⁸hüma-a ü-deiha liha mengne tamtüoh, yejema-a taowe linge ngaipu hahying ülaolan-e hahne tamtüoh.

⁹“Taowe ü-yupinok shekonyu te monghahne tamyangpu ne mengma-a, hüyange Inok tafün shong ü-at yeme lowe tanne ngohyangpu ne mengma-a,

¹⁰hüma-a ü-shekowe ülao kahta ja heei minyang shih hüyange ülao kahta ja shinleng me minshi shih.

¹¹Hangjingne tüo kihpu-a wüolakpa, hükihpu ümeng toi lingpupa-a li ne tamlak.

¹²Hatüowa ümee yetüohpu khongkümpu hahkümpu, menglakpa yimnyu vün kih-e ngohlak; tüopawe ü-kah yalah me pheak-e hah shulak.

¹³“Aope ü-shaoshanpa hei shaoshannyulan, iman-e ü-phei ngao ngaiyapeih, taowe ngaotingpa me ngao yephüntampe ngohma-a,

¹⁴Taowe hüke yelingpu ne mengma-a, hangke tao Kahwang phei hüolak? Aope ü-ngaophün ne Kahwang peilakeih taowe hangke janlak?

¹⁵Aoheye ünyu sea me tao linge ngai, Iye iman-o yelingngaipu a? Hüyange shejawehei toman naonyoi me yelingtam a?

¹⁶“Taowe toihalante minjam she lanyange ngohma-a, yejema-a wamnyulan shaoshipute yeleipu ne mengma-a;

¹⁷Yejema-a taowe hah ngohyange khah-halan nyaowe leye teine tamyangpu ne mengma-a;

¹⁸hangjingne tao naoshewante muh, khahhalan jingne üpa kih-e, hüyange tao puhpu phei jamshe, wamnyute püotükyangki.

¹⁹Nyemo yenang tei-e ütam mahpu ngewante, yejema-a toinanpu kahta ja inlak yenangpe ngewante,

²⁰taowe Ite mat phei takpu inkhek, hanghepa üjing mantoop mepu takke ngai hatüo pha. Hüwante Iye I mongjang üsheiye üte minyong pha.

²¹Taowe gho me ngaowante taowe muh oklak she shingyange khah halante taowe yeshupe lowe lamyangpu ne mengma-a,

²²hüma-a ü-yaksea phaktamtüoh; ü-phaktang mepu yaksea-a khaiyange yeine tamtüoh.

²³Hangjingne ima-a Kahwang mepu ütuhte tao nyamnang, taowe hükihpu aope-o yelinglak.

²⁴“Taowe hon-a ü-monghüm toine lingtamyange ngohma-a, yejema-a jaoshepu hon te ü-mong nyeng jing she nyik ngohma-a,

²⁵ü-moth yongtepuwe, hüyange ü-yakke üngang yah peitepuwe, tao mongmei-e ngohma-a;

²⁶Taowe müktishiwapu wanghete yejema-a shemei yaomapu linnyu te khümyangpu ne mengma-a,

²⁷imante minyong phawe ü-yakte juwe jüpyange taowe tüolante yihnoonyangpu ne mengma-a,

²⁸hükihpu ünute-a lipuwe ngao phünlak; hatüowe taowe ütahpa Kahwang yeyahpu hüonang.

²⁹“Ü-wepalan shanghah shaoshi pute tao mongyemei yangpu ne mengma-a, yejema-a aope iman mahshupu hüoyapeih hüwante tao homtük-e mongmei yangpu ne mengma-a,

³⁰iman litüoh she yopyange taowe aope-o ü-juwe ünu ye-om.

³¹I mei phei aoheye mongme huwe yehah she ü-nyenok me aoyin ngoh, iman-e iyangpu ne mengma-a;

³²Yinkempalan taowe tenok me ngoine tam hüyange aope-o iman chingyangko me shi ne yetam,

³³Ülao kahtalan-e iman ünu lolak jingne ngangpu kih taowe ü-ünu lowe angne yeteih yangpu ne mengma-a;

³⁴hangjingne kahtalan-e hanghe ikülak tüote tao nyampuwe Taowe nok mongme lowe jünge ang, hangjingne iman-e teekülakte tao nyam;

³⁵Taowe hanghe ngaoyapeih aowe-o yejaipu a? Taowe ngaoyangpu lili-a üting she taowe jiengnang. Ütahpa Kahwange üte minjan pha. Ü-phei weihpalan-e ngaomeng peipu ne mengma-a tüolan-a nyantamtüoh, tüome nakshih taowe tüolan-a ngelak.

³⁶Ütingme taowe tüolan-a otapu phei ü-phaktang me weilak hüyange ü-shang me shaoshaoh kih-e shaohlak.

³⁷Taowe lingyangpu lili taowe Kahwangte ilak, hüyange I shongme ahngpa kih-e taowe Ite tonglak.

³⁸“Taowe hampu kahtok taowe kuhyangpu ne mengma-a hüyange ütingpa nokpu mepu yahyangpu ne mengma-a;

³⁹tüo me ngaipu hahying taowe hahyangpu ne mengma-a, hüpoi tüopa ngaine tampu kahhampa seanyao ne tampu ne mengma-a,

⁴⁰hüma-a wheat tah hüyange barley nanleiye, hüng hüyange huhpheipu hüng ngai shih.” Job ngaolan kümnang.