Read Konyak Naga JOB 32 Bible Online

JOB 32 - Konyak Naga bible

JOB 32

¹Tüokhei Job-e yoi nying nyingke khakshuwe ngohnang she teihpu ngohpu jingne, kahta lümme Ite yejanpe lak.

²Hüpoi Elihu she minpu yongyange tüopate leiye ngoh pupawe I mongshih ngaipu shaaji tükke ye-ok, hangjingne ima-a Job-e Kahwangte phoiwüm yange I tingnang pu ne she ngao. (Elihu-a Buz huhayim, Barakel üha, hüyange Ram puhu mepu ne ngohyangki.)

³I-a üne-o Job shümpalan lümte-o mongshih ngai. Iman-e Jobte janne yelak lam yetüo, hüke ngohpu kaiye Kahwangpa hi yeshupu ne ngaiye hüo.

⁴Hangjingne ima-a tüome ngohpu yo me Elihu-a naolipa, tüokhei moilan-e ngaowe min-shokei she Iye tan.

⁵Hüpoi kahta lümme Job te janne yepu ye-okpe Iye nge, I mongshih ngai.

⁶Hüyange Buzaipa Barachel üha Elihuwe jan: “Taowa naolipa, hüyange numan-a lwngmei, tüokhei taowe hanghe teih ngaolak jingne nyam-e ngoh yangki.

⁷Taowe ü-nying nyingte i, ‘Lwngmeilan-e ngaotüoh, hüyange numan-e shinge ngohpu konjong nyüotamkei.’

⁸Hüpoi Ütahpa Kahwang yaha hanghepa kahta tangte peinang, hüyange imante konjong pha nang.

⁹Lwngmei ne mengpu khei she kahtawe kentamongtingpu ne yeje, yejema-a ütingpa hanghe shinglak jingne wupa shahate phapu ne yeje.

¹⁰Tüokhei sha-a, ‘Numan-e üte jaikühu; taowe hanghe teih numante iküning.’

¹¹“Numan-e aope ngaoyapeih taowe nünne jaiye ngohyangki, hüyange aope numan-e kentamongting pu phei üpongyimpu ngao yamyapeih tanne ngoh yangki.

¹²Taowe shangnyakke mongpha hüyange numan-e okpu ye-ngepu taowe jai; Job-e hanghe ngaoyangki numan-e yeshu she yelan ok.

¹³Numan me konjong ngohnang she numan-e hangke i oklak? Numan-e okpu ye-nge, tüokhei Kahwange Jobte janlak.

¹⁴Job-e ü-phei yeje, numan phei ngaoyangki, hüpoi numan-e janpu kih-e taowe aope-o yejanlak.

¹⁵“Imante ngaokümpu yang, Job; iman me nangte ngaowe iman yelak hango yenang.

¹⁶Aope iman-e hango yengaope ngohwante tao-o hüke hei tanne ngohlak a? Iman shaaji ngaolak hango yenangpe tüo me yongyange ngoh nang.

¹⁷Yeje, shaapa-a taowe-o taowe teihpu janpu phalak hüyange taowe hanghe teih nangte ipha ning.

¹⁸Tao yengaope ngangshe hei tanne ngohnang. Taowe yengaope hangke jam yengoh ok.

¹⁹Taowe, ngaolak jingne hipak yetüolak ne mengma-a, wuwüngti üla maashok yange ngohpu meisho nyekhok phüppu kih-e tao phüplak yang.

²⁰Tao yengaope yengoh ok; taowe ü-ju eplak hüyange ngaolak yang.

²¹Tüopa teingaopu me taowe ao phei-o min jam, taowe ao phei-o minyei minya.

²²Hangjingne hangke yeiyalakei taowe yeshing, hüyange taowe hüke lingma-a Kahwang üte mamshe shangne tamlak.