Read Konyak Naga JOB 33 Bible Online

JOB 33 - Konyak Naga bible

JOB 33

¹“Hüpoi sha-a, O Job, taowe hanghe ilakne ngoh nang, khongkümpute nange kentinge jaikei.

²Leihuyah, taowe üju epnang; üju mepu yee-e ngao nang.

³Ü-ngaolan khongkümpuwa lingeyahpu phei, hüyange taowe hanghe shing ü-jupen-e ngaonang.

⁴Kahwangpa yahawe tao linge ngai hüyange Ütahpawe üte üyin pha.

⁵Nange okma-a üte janpha; nange ngaolaklan tümtüoh.

⁶Kahwang sheshao me nang hei taowa ja, tümni moini kümp kahtok mepu linge ngai.

⁷Tüokhei nang üte nyamlak ne hang ülamo yenang; taowe nang tangme wong yejonlak.

⁸“Ütingme, taowe jai-e nange ngaoyangki, hüyange nange ngaopu nang ngao taowe jaiyangki.

⁹Nange i, ‘Taowe yepüoh, taowe hango püohpinne yeling. Üme ümeng yenang hüyange ünu mepu yanne ngohnang.

¹⁰Hüpoi Kahwange üte shümlak jingne ümeng yamnang, hüyange Iye tao wepa ja leye inang.

¹¹Iye ü-ya me yankeilei shatam; tao kemme yongpu lili te Iye yomnang.’

¹²“Hüpoi Job, taowe nangte iphaning, nang püohnang. Kahwang-a kahta phei sheyongpupa.

¹³Kahta jawe ngaotongpu te aope-o janne üye she hangne nange Kahwangte ümeng phapu?

¹⁴Kahwange sha-a sha-a ngaoyapoi Iye hanghe iyapeih aowe-o mong yepha.

¹⁵Wangnyak me aope kahtalan shinang, Kahwange mangme hüyange himang me ngao nang.

¹⁶Iye imante Iye hanghe i tüopa jaine tamnang; hüyange Iye deingao phapute iman nyamnang.

¹⁷Kahwange imante ünu lingpu mepu laklak jingne hüyange iman otapu mepu yinne tamlak jingne ngaonang.

¹⁸Kahsa mepu üyin yintamlak jingne, yanglow-e I üyin mahtamlak mepu yinlak jingne;

¹⁹“Kahwange kahta jate daktin shonpu kaiye, hüyange I pümtangta me jeihtampu kaiye tingtam nang.

²⁰Tüokaiye iman jute hahying hango yemei, hüyange shemeipupa hahying hahyah poi khahnang.

²¹I pümtangta jienmah nang; hüyange I üwaan khongküm ütah me ngaiye ngenang;

²²I-a yimchingte taine oteiye ngohnang hüyange I üyin-a lipu lampu ne mengtei-e.

²³Aowe shingpu Ite jamlak jingne wangdang shongmokpa pei ne ok, Kahwang jing haja yo mepu wangdang shongmokpa ja, aowe kahtanyuha te iman toishao jeng teih tüone tamnang.

²⁴Shüpshepuwe wangdang shongmokpawe hüke ilak, ‘I lantam shih! I-a yimchingte taine tamlak yeje. I lantamlak jingne hatüo me lanmee ngohnang.

²⁵Ipümtangta shela ne menge yelak hüyange nishe wongnang lak’;

²⁶hüwante Iye yoplak hüyange Kahwange Ite janlak; Iye Kahwang sheta ngelak hüyange mongmei puwe üngwünlak. Kahwange I jingne toishao lili khakshuwe nyinge tamlak.

²⁷Iye ükhongte ilak, ‘Taowe ünu ling. Taowe khakshuwe yeling; hüpoi Kahwange üte shüm-e yeyetam.

²⁸Iye tao yimching te tailak mepu tükke ang, hüyange tao sha-a ngoiye üyin me ngohnang.’

²⁹“Kahwange tüolan khongküm kahtate ni hei lüm me lingnang;

³⁰Kahsa mepu iman üyin yaha yah yelak jingne, hümme nakshih, iman-e üyin wangngai ngelak.

³¹Sha-a, Job, taowe hanghe iyapeih jaikei; jünge ngohkei hüyange taowe ngaokü ning.

³²Hüpoi nange ihupu ütam ngohma-a, taowe jaipha ning. Nang ütingpa me ngohnang she taowe mongmei sheiye yahlak.

³³Hüpoi tüone yejema-a, jünge ngohkei hüyange üte jaipha, hüyange taowe nangte konjong nyüopha ning.”