Read Konyak Naga JOB 34 Bible Online

JOB 34 - Konyak Naga bible

JOB 34

¹Hüwante Elihuwe i:

²“Numan kentamong tingpalan, shinge manpu kahtalan; sha-a taowe hanghe iyapeih tüote jaipha.

³Hangjingne jüppe nyüopuwe hahying ümei shingnang, hüke aope nawe jainyüolakei kentamongtingpu ngao jainang.

⁴Teman jingne hanghe ütingpa ngohnang, tüopa lehah. Hanghe meinang tüopa teman yo me shinge anghah.

⁵Hangjingne Job-e iyangki, ‘Taowa noknga, hüpoi Kahwange ü-meitam nyieyahteki.

⁶Tao khakshuwe ngohyapoi, taowa tahleihpa ne inang. Tao tahtüolak ne yengoh yahpoi, I jing lahhan-e meipu ye-oklak ne mapha teki.’

⁷Job kihpu kahta ao ngohnangki? Aoheye yeng kih-e phoiwümpu yingnang?

⁸Iye ünu kahtalan phei shüppe jemlak lengnang hüyange ünulan phei jamme I kemnang.

⁹‘Kahwange mongpu me kemlak jingne ngangpu me hang ümei-o yenang’ she Iye iyangki.

¹⁰“Tüokhei numan üpongtüopalan, üte jaipha! Kahwange ümengpa lingnang she, hüyange khongküm okkeshangpupawe ünu linglak she, hatüo aope-o yeje.

¹¹Iye kahtalante iman-e hanghe lingyangki tüojingne hünghao ümei pha nang, hüyange iman-e hangke leng hüke jonne tamnang.

¹²Ütingpa me, Kahwange ümengpa yelinglak, hüyange üshei okkeshangpupawe ngaotingpa yeleih kheihlak.

¹³Aoheye I yak me kahtoknyu-a phapu? Aoheye kahtoknyu khongkümpu hangki Ite kitampu?

¹⁴Iye I yaha yoi tangte leih yene tamhuma-a, hüyange I lüo I tangte yah jem ne tama-a,

¹⁵hüma-a üyin me ngohpu lili jamshe lilak hüyange tüpla ne muh menge mahlak.

¹⁶Nang me kentamongtingpu ngohma-a, tüo jaiyah; taowe hanghe i, shingyah.

¹⁷Nange ütingpa Kahwangte yaonang kü a? Iye ütingpa te müktak nang she nange teihnang kü a?

¹⁸Aoheye Ahngpate, ‘Nang ühak yekohpu,’ she, hüyange wanglamlampalante, ‘Numan üpalan,’ she inang shi?

¹⁹Iye wanglam lampalan phei yejing, yejema-a toihalan phei hakpalan te ünyei yejam; hangjingne ima-a Iye moilan linge ngai.

²⁰Kahta ja wangnyak me mokh she li ne ok. Kahwange kahtalante shütnang hüyange iman mahnang; Iye wongnangpalan yeshangpe toinang.

²¹“Hangjingne, kahta tai-ongpu lilite I mük-e lei ngohnang, hüyange iman ya-kai lili Iye nge nang.

²²Ünupa ja Kahwang mepu lolak jingne yeonge nyakpu wangnyak wange ümeken me-o yenang.

²³Kahwange kahta jate I taiye ngaophünlak jingne hipak itlak wongpong ne yeje.

²⁴Yam nyüowe yeleipe Iye wongnangpalan phak-khai ne tam nang; hüyange iman nyoi me ülaolan angtam nang.

²⁵Hangjingne ima-a iman-e hanghe ling Iye shingnang; Iye iman nowe shüpnang hüyange wangnyak me iman mahne tamnang.

²⁶Khongkümpuwe ngeye Iye ünulante iman nushakpu jingne shaoshi phanang.

²⁷Hangjingne ima-a iman I pheite woipu mepu lak hüyange I ngaokhümlan te ye-i-yeshepe ling.

²⁸Iman-e toihalante Kahwangte üngwünne tamlak ne kang, hüyange jamlak jingne nyikpu Iye jai.

²⁹Hüpoi aope I jingne ngohlakeih, aoheye I yeitamlak? Iye yoi sheta jüoma-a, aoheye I ngelak? Jat ja ne jeyah, kahta ja te jeyah, ja kih muh.

³⁰Hüke Kahwangte yenyampalan-e wanglam yelamlak; yejema-a aoyinne kahtalante lolam!

³¹“Ipuja me, kahta jawe Kahwangte, ‘Taowe yeshupe lingyangki; taowe üne-o hüke yelinglak she ima-a;

³²Taowe manngepu nange hüopha; taowe ünu om ma-a, taowe shaaji tüopa-a yelinglak.’

³³Nangte shulak ne Kahwange, hangjingne nange tüopa yeyahpu jingne shüm yelak a? Taowe yeje, nange letüoh; tüokhei nange hang shing üte ipha.

³⁴Üpong tüowe okpu kahta, hüke ü-ngao jaipalan kentamongtingpu kahta liliye hüke ilak,

³⁵‘Job-e hango yeshingpe ngaonang, hüyange I ngao me yahlak hango yenang.’

³⁶Job-e ngaoyangpu lili teih nyüohu; Iye ümeng kahta jaleye ngaoyangpu numan-e ngelak.

³⁷I me ngohpu ünuwe weihkhuwe yongpu püoyangki; toman khongkümpu sheshao me Iye Kahwang phei tüi-e phoiwüm yangki.”